1 እስራኤለ አሳይ ሴፅማ ጌተትያ በሳን ዱንካንድ ደእሽን፥ እስራኤለ አደት ሞአበ ማጫታራ ላይማቶ ዶምዶሶና። 2 ሄ ማጫሳት ባንታ ፆሳታ ያርሹዋ ማና መላ ፄግዶሶና። ኤንቲ ሄ ያርሾ ካꬃ ምድ ኤንታ ፆሳታ ጎይንዶሶና። 3 እስራኤለት ብኤል-ፋጎራ ጌተትያ ኤቃ ጎይንዳ ግሾ ጎዳይ ኤንታ ቦላ ሀንቀትስ። 4 ያትን፥ ጎዳይ ሙሰኮ፥ “ጎዳ ሀንቆይ እስራኤለፐ ስማና መላ ካለꬅያ አሳ ኡባ ኤፋዳ ሴታ ጋላስ ጎዳ ስንꬃን ካቃ” ያግስ። 5 ሙሰይ እስራኤለ ዳይናታኮ፥ “ህንተ እሶይ እሶይ ብኤል-ፋጎራ ጌተትያ ኤቃ ጎይንዳ አሳ ኡባ ዎꬍተ” ያግስ።

6 ሙሰይነ ማባራይ ኡባይ ጌሻ ዱንካንያ ፐንገን ዬክሽን፥ እስራኤለታፐ እሶይ ምድያመ ማጫስዉ ኤንታ ስንꬃራ አꬅድ፥ ባ ኬꬃ አሳኮ ኤህስ። 7 ካህንያ አሮና ናኣ አላዛራ ናአይ ፕንሃስ ሄሳ በእዳ ዎደ ማባራ ግዶፈ ደንድድ፥ ቶራ ኤክድ፥ 8 እስራኤለ አድያ ካልድ ዱንካንያ ግዶ ገልድ፥ ኡራነ ማጫስዉ ቶራን ጫድድ ካንꬅ ከስስ። ሄስ ሀንን እስራኤለታ ዉርስያ ጋዶይ ኤቅስ። 9 ሽን ሄ ጋዶይ ላታማነ ኦይዱ ሙኩሉ አሳ ዎꬍስ።

10 ጎዳይ ሙሰኮ፥ 11 “ካህንያ አሮና ናኣ አላዛራ ናአይ ፕንሃስ እስራኤለ አሳ ግዶን ታኒ ታ ቦንቹዋስ ምሸተይሳዳ ምሸትዳ ግሾ፥ ታኒ ህንተ ቦላ ሀንቀትዳ ሀንቁዋ ዶሽስስ። ታኒ ታ ቃናትያን ኤንታ ፖሎ ꬋይሳብከ። 12 ሄሳ ግሾ፥ ታኒ ታ ሳሮተꬃ ጫቁዋ እያራ ጫቃናይሳ ፕንሃሳስ ኦዳ። 13 እ ባ ፆሳ ቦንቹዋስ ምሸትዳ ግሾነ እስራኤለ አሳስ ናጋራ አቶተꬃ ኤህዳ ግሾ፥ እነ እያ ኮቻይ መርናዉ ካህነ ግዳና” ያግስ።

14 ምድያመ ማጫሴራ ሀይቅዳ ኡራ ሱንꬃይ ሳሉ ናኣ ዝምራ ጌተቴስ። ሳሉ ስሞና ኮቻን እስ ኮቻ ሀላቃ። 15 ሀይቅዳ ምድያመ ማጫሰ ሱንꬃይ ኮዝቦ፤ እ አዋይ ዙር ምድያመታ ኮቻ ሀላቃ።

16 ጎዳይ ሙሰኮ፥ 17 “ምድያመ ቢታ አሳ ሞርክድ ኤንታ ዎꬍተ። 18 ኤንቲ ህንተና ሞርክድ ፓኦራን ጭምዶሶና ቃስ ቦሻ ጋላስ ፓኦራን ሀይቅዳ ምድያመታ ኮቻ ሀላቃ ናኤ ኮዝብ ጋሶን ህንተና ሞርክዶሶና” ያግስ።

<- ታይቦ ማፃፋ 24ታይቦ ማፃፋ 26 ->