1 እስራኤለ አሳይ ደንድድ፥ እያርኮ ግናን፥ ዮርዳኖሰፐ ሄፍንꬃን ደእያ ሞአበ ደንባን ዱንካንዶሶና።

2 እስራኤለ አሳይ አሞረታ ቦላ ኦꬅዳይሳ ኡባ ስፎራ ናአይ ባላቅ ስእስ። 3 እስራኤለ አሳይ ዳሮ ግድዳ ግሾ፥ ሞአበት ዳሮ ዳጋምድ ያይዶሶና። 4 ሞአበት ምድያመ ጭማታኮ፥ “ቦር ማታ ፕትድ ምድ ꬋይሰይሳዳ ሀ ዉደ አሳይ ኑ ዩሹዋን ደእያ ኡባ ምድ ꬋይሳና” ያግዶሶና።

ሄ ዎደ ሞአበ ካዎይ፥ ስፎራ ናአይ ባላቅ፥ 5 አማዋ ቢታን፥ ኤፍራፂሳ ሻፋ ማታን፥ ፓቶራ ካታማን ደእያ ብኦራ ናኣ ባላማኮ ሀይሳዳ ያግድ ኪትስ። “ግብፀፈ ከይዳ ዳሮ አሳይ ቢታ ኡባ ማእድ፥ ታ ማታን ዱንካንዶሶና። 6 ኤንቲ ታፐ ዳሮ ዎልቃማ ግድያ ግሾ፥ ሀያና ያዳ ኤንታ ባዳርክ። ኦን ኤር፥ ታ ኤንታ ፆናናዉነ ቢታፈ ከሳናዉ ዳንዳአና። ህዛ፥ ኔኒ አንጀይስ አንጀተይሳ ቃስ ኔኒ ባደይስ ባደትዳባ ግደይሳ ታኒ ኤራይስ” ያግስ።

7 ሞአበ ጭማትነ ምድያመ ጭማት ባደꬃ ሚሽያ ኤክድ ባላማኮ ብድ ባላቅ ግዳይሳ እያዉ ኦድዶሶና። 8 ባላም ኤንታኮ፥ “ሀች ቃማ ሀይሳን አቅተ፤ ጎዳይ ታዉ ኦደይሳ ታ ህንተዉ ኦዳና” ያግስ። ያንን፥ ሞአበ ሀላቃት ባላማራ ጋምእዶሶና።

9 ፆሳይ ባላማ፥ “ሀይሳቲ ኔራ ደእያ አሳት ኦኔ?” ያግድ ኦይችስ።

10 ባላም ፆሳኮ፥ “ሞአበ ካዎይ፥ ስፎራ ናአይ ባላቅ፥ 11 ‘ግብፀፈ ከይዳ ዳሮ አሳይ፥ ኤንቲ ቢታ ኡባ ኩምዶሶና። ኔኒ ያዳ፥ ኤንታ ባዳርክ። ኦን ኤር፥ ታ ኤንታ ፆናናዉነ ቢታፈ ከሳናዉ ዳንዳኦና አግከ’ ያግድ ኤንታ ታኮ ኪትስ” ያግስ።

12 ያትን ፆሳይ ባላማኮ፥ “ኔኒ ኤንታራ ቦፓ፤ እስራኤለ አሳይ አንጀትዳ ደረ ግድያ ግሾ፥ ኔኒ ኤንታ ባዶፋ” ያግስ።

13 ዎንተꬃ ጋላስ ዎንታ ባላም ደንድድ፥ ባላቃ ሀላቃታኮ፥ “ታኒ ህንተራ ቦናዳ ጎዳይ ድግዳ ግሾ፥ ህንተ ቢታ ስምተ” ያግስ።

14 ሞአበ ሀላቃት ባላቃኮ ጉየ ስሚድ፥ “ባላም ኑራ ዮና እፅስ” ያግዶሶና።

15 ዛሪድ ባላቅ ካሰይሳታፐ አꬎ ቦንቸትዳነ ታይቦን ዳሮ ሀላቃታ እያኮ ኪትስ። 16 ኤንቲ ባላማኮ ብድ፥ “ስፎራ ናአይ ባላቅ፥ ‘ኔኒ ታኮ ያናይሳ ነና አይብካ ተቆፎ። 17 ታ ነዉ ዳሮ ዎይቶ እማና፤ ነ ኦይችያባ ኡባ ታ ነዉ ኦꬃና። ሀያና ያዳ ሀ አሳ ባዳርክ’ ያግስ” ያግድ ኦድዶሶና።

18 ሽን ባላም ኤንታኮ፥ “ባላቅ ሀር አቶሽን ባ ካዎተꬃን ኩምዳ ብራነ ዎርቃ ታዉ እምያባ ግድኮካ ጎዳ፥ ታ ፆሳ ኪታ መንꬃዳ አይኮካ ፓጭሳናዉ ዎይኮ ጉጃናዉ ዳንዳእከ። 19 ጎዳይ ታዉ በሲያ ሀራባይ ደእኮ ታ ኤራና መላ ህንተካ ሀች ቃማ ሀይሳን አቅተ” ያግስ።

20 ሄ ቃማ ፆሳይ ባላማኮ፥ “ሀ አሳይ ነና ፄጋናዉ ይዳ ግሾ፥ ኔኒ ኤንታራ ባ፤ ሽን ታ ነዉ ኦደይሳ ፃላላ ኦꬃ” ያግስ።

21 ያትን ዎንተꬃ ጋላስ ባላም ባ ሃሪው ኮርድ ሞአበ ሀላቃታራ ብስ። 22 ሽን እ ብያ ግሾ ፆሳይ ሀንቀትስ። ሄ ዎደ ባላም ባ ሃሪው ቶግድ፥ ባ ናምኡ አይለታራ ብሽን ጎዳ ኪታንቾይ እያ ተቃናዉ ኦገን ኤቅስ። 23 ጎዳ ኪታንቾይ ማሻ ሾድድ ኦገን ኤቅዳይሳ ሀሪያ በአዳ፥ ኦግያ አጋዳ ጎሻ ግዶ ገላሱ። ባላም ሀሪው ኦገን ዛራናዉ ሾጭስ።

24 ያትን፥ ጎዳ ኪታንቾይ ናምኡ ዎይነ ጋደታፐ ግዶን ያ ባጋራነ ሀ ባጋራ ግምበን ድረትዳ ፁንꬃ ኦገን ኤቅስ። 25 ሀርያ ጎዳ ኪታንቹዋ በእዳ ዎደ ግምበ ድርሳኮ ሺቅዳ፥ ባላማ ቶሁዋ ግምበ ድርሳራ ኦይꬃሱ፤ ያትን እ ሃሪው ናምአንꬆ ሾጭስ።

26 ሄሳፈ ጉየ፥ ጎዳ ኪታንቾይ ስንꬃ አꬍድ፥ ሀድርስ ዎይኮ ኡሻች ስማናዉ ኦገይ ባይና ፁንꬃ በሳን ኤቅስ። 27 ሀርያ ጎዳ ኪታንቹዋ በአዳ፥ ባላም ቶግድ ደእሽን ዝንአሱ፤ ባላም ዳሮ ይሎትድ፥ ባ ፃምአን ሃሪው ሾጭስ። 28 ሄሳፈ ጉየ፥ ጎዳይ ሀረይ ዶና ዶይን፥ ሀርያ ባላማ፥ “ታ ነዉ አይ ኢስን ታና ሄꬑ ቶሆ ሾጫዲ?” ያጋሱ።

29 ባላም ዛሪድ፥ “ኔኒ ታና ይሎይዳ ግሾሳ፤ ታ ኩሸን ማሽ ደእያባ ግድያኮ ታ ነና ሀእ ዎꬋናሽን” ያግስ።

30 ሃሪያ ባላማኮ፥ “ኔኒ ሀች ጋካናዉ ቶግያ ነ ሃሪው ግድክና? ታኒ ነዉ ሀይሳዳ ሀና ኤርያና?” ያጋሱ።

ባላም ዛሪድ፥ “ሀና ኤራካ” ያግስ።

31 ሄ ዎደ ጎዳይ ባላማ አይፍያ ዶይን፥ ጎዳ ኪታንቾይ ሾደትዳ ማሻ ኦይክድ ኦገን ኤቅዳይሳ በእስ። እ ልች ግድ ሶምኦራ ሳአን ጉፋንስ። 32 ጎዳ ኪታንቾይ፥ “ነ ሃሪው ሄꬑ ቶሆ አይስ ሾጫዲ? ነ ኦገይ ታ ስንꬃን ጌላ ግድያ ግሾ ታ ነና ተቃናዉ ያስ። 33 ሀርያ ታና በአዳ ታ ስንꬃፈ ሄꬑ ቶሆ ሀራ ሶ ስማሱ። ሀርያ ሀራ ሶ ስማቦናባ ግድያኮ፥ ሀኖደ ታ ነና ዎꬋዳ ሀርው አሻናሽን” ያግስ።

34 ባላም ዛሪድ፥ “ታኒ ናጋራ ኦꬃስ፤ ኔኒ ታና ተቃናዉ ኦገ ቦላ ኤቅዳይሳ ታ ኤራብከ። ነ ዶሶናባ ግድኮ ታ ሀእ ጉየ ስማና” ያግስ።

35 ሽን ኪታንቾይ ባላማኮ፥ “ኔኒ ሀ አሳታራ ባ፤ ሽን ታ ነዉ ኦደይሳ ፃላላ ኦዳ” ያግስ። ያትን፥ ባላም ባላቃ ቢታ ሀላቃታራ ብስ።

36 ባላም የይሳ ባላቅ ስእዳ ዎደ አርኖና ሻፋ ጋፃን ባ ቢታ ዛዋን ደእያ ሞአበታ ካታማን እያ ሞካናዉ ብስ። 37 ባላቅ ባላማኮ፥ “ኔኒ ኤለሳዳ ያና መላ ታ ኪታብክና? ኔኒ አይስ ታኮ ኤለሳዳ ያብኪ? ታኒ ነዉ ኩሸ ዛራናዉ ዳንዳእክና?” ያግስ።

38 ባላም ባላቃኮ፥ “ሄኮ፥ ሀእ ታ ኔኮ ያስ፤ ሽን ታ አይኮካ ታፐ ጋናዉ ዳንዳእከ። ፆሳይ ታና ኦዳ ግዳባ ፃላላ ኦዳና” ያግስ። 39 ያትን፥ ባላም ባላቃራ ቅርያት-ሀፆታ ካታማ ብስ። 40 ያን ባላቅ መሄነ ዶርሰ ያርሽድ፥ አሹዋፐ ጉꬃራ ባላማስነ እያራ ደእያ ሀላቃታስ እሚስ።

41 ዎንተꬃ ጋላስ ባላቅ ባላማ ባሞት-ባኣል ጌተትያ በሳ ከስስ፤ ባላም ያን ኤቅድ እስራኤለ አሳፐ ባጋ በእስ።

<- ታይቦ ማፃፋ 21ታይቦ ማፃፋ 23 ->