1 ጎዳይ ሙሰኮነ አሮናኮ፥ 2 “ጎዳይ ህግያን ኪተትዳ ዎጋይ ሀይሳ፤ ቦርሶይ ባይና፥ እ ጋናን ቃምባር ዎꬍቦና ዞኦ ኡሱ ኤሀና መላ እስራኤለ አሳስ ኦድተ። 3 ካህንያ አላዛራስ እዮ እምተ፤ ጉታፐ እዮ ጋፃ ከስድ ካህንያ ስንꬃን ሹኮ። 4 ካህነይ አላዛር እ ሱꬃፈ ጉꬃራ ኤክድ ባ ብራꬍያን ጌሻ ዱንካንያኮ ስሚድ ላፑን ቶሆ ዉርፆ። 5 ካህነይ በእሽን ኡስያ ፁገቶ፤ ጋልባይ፥ አሾይ፥ ሱꬃይነ ቶጨይ ፁገቶ። 6 ካህነይ ዝጋ ምꬅ፥ ህሶጰ ታሸነ ዞኦ ቃጭና ኤክድ ኡስያ ኤፅያ ታማን የጎ። 7 ሄሳፈ ጉየ ካህነይ ባ ማኡዋነ ባ አሳተꬃ ሜጨትድ ጉታ ገሎ፤ ሽን ኦማርስ ጋካናዉ ዎጋዳ ቱና ግዳና። 8 ሄ ኡስዉ ፁግዳይስ ባ ማኡዋነ ባ አሳተꬃ ሜጨቶ፤ እካ ኦማርስ ጋካናዉ ዎጋዳ ቱና ግዳና።

9 “ሄሳፈ ጉየ፥ ሀራ ጌሻ አስ ኡስያ ፁገትዳ ብዱዋ ሺሽድ ጉታፐ ጋፃን ጌሻ በሳን ዎꬆ። እስራኤለ አሳይ ቱናተꬃፈ ጌሽያ ሃꬃን ጎኤታናዉ ሄስ ናገትድ ኡታና፤ ሄስ ናጋራፐ ጌሻናዉ ጎኤስ። 10 ቃስ ኡሴ ብዱዋ ሺሽዳ ኡራይካ ባ ማኡዋ ሜጮ፤ እ ኦማርስ ጋካናዉ ዎጋዳ ቱና ግዳና። ሀ ዎጋይ እስራኤለ አሳስነ ኤንታ ግዶን ደእያ ሀራ ደረ አሳስ መርና ዎጋ ግዳና።

11 “አሀ ቦችያ ኦንካ ላፑን ጋላስ ዎጋዳ ቱና ግዳና። 12 ቱናተꬃፈ ጌሽያ ሃꬃን ሄꬓንꬆ ጋላስነ ላፑንꬃ ጋላስ እ ባና ጌሾ፤ ሄሳፈ ጉየ፥ እ ዎጋዳ ጌሽ ግዳና። ሽን ሄꬓንꬆ ጋላስነ ላፑንꬃ ጋላስ እ ባና ጌሾና እፅኮ እ ጌሽ ግደና። 13 ሀይቅዳ አሳ አሀ ቦችያ ኦንካ ባና ጌሾና እፅኮ እ ጎዳ ዱንካንያ ቱንሴስ፤ ሄ ኡራይ እስራኤለ አሳ ግዶፈ ኩረቶ። ቱናተꬃፈ ጌሽያ ሃꬃይ እያ ቦላ ዉርፀትቦና ግሾ እ ቱና፤ እ ቱና ግድድ ጋምኤስ።

14 “እስ አስ ዱንካንያ ግዶን ሀይቅኮ ኦꬃና ዎጋይ ሀይሳ፤ ዱንካንያ ግዶ ገልያ ኦንካ፥ ቃስ ዱንካንያ ግዶን ደእያ ኦንካ ላፑን ጋላስ ጋካናዉ ቱና ግዳና። 15 ሄሳዳካ፥ ካመቶና ዶያ ደእያ ሚሸ ኡባይ ቱና ግዳና። 16 ቃስ ደንባን ሀይቅዳ አሳ አሀ ዎይኮ ሀርገትድ ሀይቅዳ አሳ አሀ ዎይኮ መቀꬅ ዎይኮ ዱፎ ቦችያ ኦንካ ላፑን ጋላስ ጋካናዉ ቱና ግዳና።

17 “ቱናተꬃፈ ጌሻናዉ ፁገትዳ ኡሴ ብዱዋፐ ጉꬃራ ኤካዳ ኦቶን የጋዳ ፑልቶ ሃ እያ ቦላ ትጋ። 18 ጌሻ አስ ህሶጰ ውርጮ ኤክድ ሃꬃን ናቅ ከስድ፥ ዱንካንያ፥ እያ ግዶን ደእያ ሚሽያነ አሳ ኡባ ቦላ ዉርፆ። ቃስ ሀይቅዳ አሳ አሀ ዎይኮ መቀꬅ ዎይኮ ዱፎ ዎይኮ ሀርገት ሀይቅዳ አስ ቦችዳ አሳ ቦላ ዉርፆ። 19 ጌይዳ አስ ሄꬓንꬆ ጋላስነ ላፑንꬃ ጋላስ ጌይቦና ኡራ ቦላ ዉርፆ። እ ላፑንꬃ ጋላስ ሄ ኡራ ቱናተꬃፈ ጌሾ፤ ሄ ጌይዳ አደይ፥ ባ ማኡዋነ ባ አሳተꬃ ሜጨቶ፤ ሄ ጋላስ ኦማርስ እ ጌሽ ግዳና።

20 “ሽን ቱና ኡራይ ባና ጌሾና እፅኮ፥ ሄ ኡራይ ጌሻ ዱንካንያ ቱንስዳ ግሾ፥ እስራኤለ አሳ ግዶፈ ኩረቶ፤ ቱናተꬃፈ ጌሽያ ሃꬃይ እያ ቦላ ዉርፀትቦና ግሾ እ ቱና። 21 ሀይስ ህንተዉ መርና ዎጋ ግዳና። ቱናተꬃፈ ጌሽያ ሃꬃ ዉርፅያ ኡራይ ባ ማኡዋ ሜጮ፤ ቃስ ቱናተꬃፈ ጌሽያ ሃꬃ ቦችያ ኦንካ ኦማርስ ጋካናዉ ቱና ግዳና። 22 ቱና ኡራይ ቦችያ አይብባይካ ቱኔስ፤ ቃስ ሄ ሚሽያ ቦችያ ኦንካ ኦማርስ ጋካናዉ ቱና ግዴስ” ያግስ።

<- ታይቦ ማፃፋ 18ታይቦ ማፃፋ 20 ->