1 ሄ ዎደ ቃማ ማባራ ኡባይ ባንታ ቃላ ꬎቁ ኦꬅድ ዬክዶሶና። 2 እስራኤለ አሳይ ሙሰ ቦላነ አሮና ቦላ ዙዙምዶሶና። ኩመꬃ ማባራይ፥ “ኑኒ ግብፀ ቢታን ደእሸ ዎይኮ ሀ መላ ቢታን ሀይቅዳ ግዶርኮ። 3 ኑኒ ማሻን ዉራና መላ ጎዳይ ሀ ቢታ ኑና አይስ ኤሂ? ኑ ማቸትነ ኑ ናይት ድኤታና፤ ሄሳ ሀናናፐ ጉየ ግብፀ ስሞይ ኑስ ኬሄኔ?” ያግዶሶና። 4 ኤንቲ እሶይ እሱዋኮ፥ “ኑና ካለꬅያ አስ ዶርድ ጉየ ግብፀ ስሞስ” ያግዶሶና።

5 ያትን፥ ሙሰይነ አሮን ሄ በሳን ሺቅዳ እስራኤለ ማባራ ስንꬃን ሶምኦራ ሳአን ጉፋንዶሶና። 6 ቢታ ዎቻናዉ ብዳ አሳ ግዶፈ ናወ ናኣ እያሱይነ ዮፎና ናኣ ካለብ ባንታ ማኡዋ ፔꬍዶሶና። 7 እስራኤለ ማባራኮ፥ “ኑኒ ካንꬅ ከይድ ዎችዳ ቢታይ ዳሮ ሎኦ። 8 ጎዳይ ኑናን ኡፋይትያባ ግድኮ ማꬅነ ኤስ ጎግያ ቢታ ኑና ገልሳና፤ ሄ ቢታ ኑስ እማና። 9 ሄሳ ግሾ፥ ጎዳ ቦላ ማካሎፍተ። ሄ ቢታ አሳስ ያዮፍተ፤ ኤንቲ ኑስ ኦይꬅካ ግዶኮና። ኤንታዉ ኤሾይ ባዋ፤ ጎዳይ ኑራ ደኤስ፤ ህንተ ኤንታዉ ያዮፍተ” ያግዶሶና። 10 ያትን እስራኤለ ማባራይ ኤንታ ሹቻን ጫዳናዉ ደንድስ።

ሄ ዎደ ጎዳ ቦንቾይ ፆሳ ዱንካንያን እስራኤለ አሳ ኡባስ ቆንጭስ። 11 ጎዳይ ሙሰኮ፥ “ሀ አሳይ ታና ካይ አዉደ ጋካናሴ? ታኒ ኤንታ ግዶን ኦꬅዳ ማላታታ በእሸ፥ አዉደ ጋካናዉ ታናን አማኖና እፃኔ? 12 ታኒ ኤንታ ጋዶን ሾጫዳ ꬋይሳና፥ ሽን ነና ኤንታፈ ዳርያነ ምንያ ካዎተꬃስ አዋ ኦꬃና” ያግስ።

13 ሙሰይ ዛሪድ ጎዳኮ፥ “ኔኒ ነ ዎልቃን ሀ አሳ ግብፀፈ ከስዳይሳ ኤርያ ግብፀት ሄሳ ስእኮ ዎይጋኔ? 14 ኤንቲ ሄ ቢታን ደእያ አሳስ ሄሳ ኦዳና። አቤት ጎዳዉ፥ ኔኒ ሀ አሳራ ደኤይሳ ኤንቲ ስእዶሶና። አቤት ጎዳዉ፥ ኑኒ ነና በእዳይሳ፥ ነ ሻራይ ኑ ቦላ ኩያትዳይሳነ ጋላስ ሻራ ቱሳን፥ ቃማ ታማ ቱሳን ኔኒ ኑና ካለꬅዳይሳ ኤንቲ በእዶሶና። 15 ያትን፥ ሀእ ኔኒ ሀ አሳ ኡባ እስ ቶሆ ዎꬋ ꬋይስያባ ግድኮ ነ ካሰ ኦꬅዳይሳ ስእዳ ካዎተꬃት፥ 16 ‘ጎዳይ፥ ሀ አሳስ እማና ግድ ጫቅዳ ቢታ ኤንታ ገልሳናዉ ዳንዳእቦና ግሾ መላ ቢታን ዎꬍ ꬋይስስ ያግድ’ ኦዳና።

17 “ሄሳ ግሾ፥ ጎዳዉ፥ ነ ዎልቃ ኑና በሳ፤ ነ ኑስ ገልዳ ቃላ ቆፓ። 18 ‘ጎዳይ ኤለ ሀንቀተና፤ ማሮትነ ሲቆይ ኩምዳይሳ ናጋራነ ጌላተꬅ አቶ ገይሳ፤ ሽን ባልዳ ኡራ ሴሮና አገና። የልዳይሳታ ናጋራ ግሾ ሄꬓንꬆነ ኦይዳንꬆ የለተꬅ ጋካናዉ ናይታ ሴራና’ ያጋዳሳ። 19 ሀ አሳይ ግብፀፈ ከዮሶፐ ዶማዳ ሀች ጋካናዉ ኤንታ ማርዳይሳዳ ነ መርና ሲቁዋን ሀ አሳ ናጋራ አቶ ጋርክ” ያግስ።

20 ጎዳይ ዛሪድ፥ “ነ ኦይችዳይሳዳ ታ ኤንታ ማራና። 21 ሽን ታ ደኦ ግደይሳዳነ ታ ቦንቾይ ሳአ ኡባ ኩምዳይሳዳ፥ 22 ሀ አሳፐ እስ አስካ ሄ ቢታ በኤና። ግብፀ ቢታንነ መላ ቢታን ኦꬅዳ ማላታታ ሀ አሳት በእዶሶና፤ ሽን ኤንቲ ታሙ ቶሆ ታና ፓጭድ ታዉ ኪተቶና እፅዶሶና። 23 ሄሳ ግሾ፥ ታ ኤንታ ማይዛታስ እማና ጋዳ ጫቅዳ ቢታ ታና ካꬍዳይሳታፐ እሶይካ ገለና። 24 ሽን ታ አይለይ ካለብ ኤንታፈ ዱማትያ ግሾነ ታና ፖሎ ዎዛናፐ ካልዳ ግሾ፥ እ ካሰ ዎችዳ ቢታ እያዉ እማና፤ እያ ዘረꬃይካ ሄ ቢታ ላታና። 25 ሽን ሀእ አማለቃትነ ካናነት ዛንጋራን ደእያ ግሾ፥ ዎንቶ ዞኦ አባኮ ኤፍያ ኦግያ ኦይክድ መላ ቢታ ጉየ ስምተ” ያግስ።

26 ጎዳይ ሙሰኮነ አሮናኮ፥ 27 “ሀ ኢታ አሳይ ታ ቦላ አዉደ ጋካናዉ ዙዙማኔ? ታኒ እስራኤለ አሳ ዙዙንꬃ ስአስ። 28 ሄሳ ግሾ፥ ኔኒ ኤንታዉ ሀይሳዳ ጋዳ ኦዳ፤ ‘ታኒ ታ ደኡዋን ጫቃይስ፤ ህንተ ግዳይሳዳ ታ ህንተዉ ኦꬃና።’ ታኒ፥ ጎዳይ ሀይሳ ኦዳይስ። 29 አሳይ ታይበትያ ዎደ ላይꬅ ላታማነ እያፐ ቦላ ግድዳ አስ ኡባይ ታ ቦላ ዙዙምዳ ግሾ፥ ህንተ አሀይ ሀ መላ ቢታን ኩንዳና። 30 ዮፎና ናአ ካለባፐነ ናወ ናአ እያሱፐ አትሽን፥ ህንተፈ ኦንካ ታ ህንተና ላትሳናዉ ጫቅዳ ሄ ቢታ ገለና። 31 ህንተ፥ ‘ኑ ናይት ድኤት አታና’ ግዳ ህንተ ናይታ፥ ሄ ህንተ ካꬍዳ ቢታ ገልሳና፤ ሄ ቢታይ ኤንታዉ ላታ ግዳና። 32 ሽን ህንተ አሀይ ሀ መላ ቢታን ኩንድድ አታና። 33 ህንተ አማነትቦና ግሾ፥ ህንተፈ ዉርሰꬃ አሀይ ሀ መላ ቢታን ኩንዳና ጋካናዉ፥ ህንተ ናይት ሀ መላ ቢታን ዋየትሸ ኦይታሙ ላይꬅ ዶርሰ ሄማና። 34 ህንተ ቢታ ዎችዳ ኦይታሙ ጋላሳ ታይቦን፥ እስ ጋላሳስ እስ ላይꬅ፥ ኦይታሙ ላይꬅ ህንተ ናጋራ ግሾ ዋየታና፤ ሄ ዎደ ታ ህንተ ቦላ አይ መላ ሀንቀትዳኮ ህንተ ኤራና። 35 እስፈ ታ ቦላ ደንድዳ ሀ ኢታ ማባራ ቦላ ታ ሀይሳዳ ኦꬃና፤ ኤንቲ ሀ መላ ቢታን ኩንድ አታና ሀይሳን ኤንቲ ሀይቃና፤ ታ ጎዳይ ሀይሳ ኦዳይስ” ያግስ።

36 ሄ ቢታ ዎቻና መላ ሙሰይ ኪትዳ አሳት ስሚድ፥ ሄ ቢታባ ኢታ ኦዳ ኦድድ፥ ሙሰ ቦላ አሳይ ዙዙማና መላ ኦꬅዳይሳት፥ 37 ጎዳ ስንꬃን ቦሻን ሀይቅዶሶና። 38 ሄ ቢታ ዎቻናዉ ብዳ አሳፐ ዮፎና ናአይ ካለብነ ናወ ናአይ እያሱ ፃላል አትዶሶና።

39 ሙሰይ ሄሳ እስራኤለ አሳስ ኦድዳ ዎደ አሳይ ዳሮ ዬክስ። 40 ዎንተꬃ ጋላስ ዎንታ ጉራ ደንድድ፥ ገዘ ቢታ ከይድ፥ “ኑኒ ናጋራ ኦꬅዳ፥ ሽን ሀእ ጎዳይ ኑስ እማና ግዳ በሳ ፑደ ከያና” ያግዶሶና።

41 ሽን ሙሰይ ኤንታኮ፥ “ጎዳ ኪታ ህንተ አይስ መንቲ? ህንተዉ ሀነና። 42 ጎዳይ ህንተራ ዶና ግሾ፥ ቦፕተ፤ ህንተ ሞርከት ህንተና ፆናና። 43 አማለቃ አሳራነ ካናነ አሳራ ህንተ ኦለትድ ማሻን ሀይቃና። ጎዳስ ህንተ ኪተቶና እፅዳ ግሾ፥ ጎዳይ ህንተራ ዴና” ያግስ።

44 ሽን ኤንቲ ጎዳ ጫቆ ታቦተይነ ሙሰይ ጉታፐ ደንዶና ደእሽን፥ ደረይ ዳርያ ቢታ ባናዉ ምንድ ደንድዶሶና። 45 ያንን ደረይ ዳርያ ቢታን ደእያ አማለቃ አሳይነ ካናነ አሳይ ኤንታ ኦላን ፆንድ፥ ሆርማ ጋካናዉ ኤንታ የደꬅዶሶና።

<- ታይቦ ማፃፋ 13ታይቦ ማፃፋ 15 ->