ማርቆሳ ዎንገላ 4

ዘረꬅ ዘርያ ኡራ ሌምሶ

(ማቶ 13:1-9፤ ሉቃ 8:4-8)

1 የሱሲ ዛሪድ ጋልላ አባ ማታን ታማርሴስ። ዳሮ አሳይ እያ ማታን ዩሹዋን ሺቅን፥ አባን ደእያ ዎጎሉዋ ግዶ ገልድ ኡትስ፥ አሳ ኡባይ አባ ማታን ደኤስ። [a] 2 እ ኤንታ ዳሮባ ሌምሶን ታማርስስ። ታማርስሸ ሀይሳዳ ያግስ፦

3 “ስእተ! እስ ኡራይ ዘረꬅ ዘራናዉ ከይስ። 4 እ ዘርሽን፥ እስ እስ ዘረꬃይ ኦገ ጋፃን ዎꬍስ፤ ካፎት ይድ ምዶሶና። 5 እስ እስ ዘረꬃይ ጋርሳን ሻሎይ ደእያ ቢታ ቦላ ዎꬍስ። ዳሮ ቢት ባይና ግሾ፥ ሄ ዘረꬃይ ኤለስድ ዶልስ። 6 ሽን አው ከይዳ ዎደ ሹልስ። ሎይꬅድ ፃጶ የድቦና ግሾ፥ ኤለስ መልስ። 7 እስ እስ ዘረꬃይ አጉንꬃ ግዶን ዎꬍስ። ዶልዳይሳ አጉንꬃይ ድጭድ ጩልዳ ግሾ አይፈ አይፎና አትስ። 8 እስ እስ ዘረꬃይ አራዳ ቢታን ዎꬍድ ዶልስ። ድጭድ እሶይ ሀስታማ፥ እሶይ ኡሱፑን ታማ እሶይ ፄታ አይፍስ” ያግስ። 9 “ስእያ ሀይꬅ ደእያ ኦንካ ስኦ” ያግስ።

10 የሱሲ ኦድዳይሳ ስእዳ እስ እስ አሳትነ ታማነ ናምኡ ታማረት የሱሲ ባርካ ደእሽን፥ እያኮ ሺቅድ ሄ ሌምሱዋ ብርሸꬃ ኦይችዶሶና። 11 የሱሲ ኤንታኮ ሀይሳዳ ያግስ፦ “ህንተዉ ፆሳ ካዎተꬃ ፁራ ኤሮይ እመትስ። ሽን ሀራታስ ካዎተꬃፈ ካረን ደኤይሳታስ ኡባባይ ሌምሶን ኦደቴስ። 12 ጋሶይካ፥

“ ‘ኤንቲ ፄሎሶና፥ ሽን ደሞኮና።

ስኦሶና፥ ሽን አኬኮኮና።

ኤንቲ ደምያኮነ አኬክያኮ፥

ፆሳኮ ስማና

እካ ኤንታ ማራናሽን’ ”[b]

ያግስ። 13 የሱሲ ኤንታኮ፥ “ሀ ሌምሶይ ህንተዉ ገለኔ? ያትን፥ ሌምሶ ኡባ ህንተ ዋት አኬካኔ? 14 ዘረይስ ፆሳ ቃላ ዘሬስ። 15 ቃላይ ዘረትያ ዎደ ኦገ ጋፃን ዎꬍዳይሳት ቃላ ስእዳይሳታ። ሽን ፃላሄይ ኤለስድ፥ ይድ ኤንታ ዎዛናን ዘረትዳ ቃላ ማፅ ድጌስ። 16 ሄሳዳካ፥ ጋርሳን ሻሎይ ደእያ ቢታን ዘረትዳይስ ቃላ ስእድ፥ ኤለስድ ኡፋይሳን ኤከይሳ። 17 ሽን እያዉ ምኖ ፃጶይ ባይና ግሾ ሀእሳፈ አትሽን፥ ጋምኦኮና። ጉꬃ ዎደፐ ጉየ ቃላ ጋሶን ዋየይ ዎይኮ ጎድ ጋክያ ዎደ ኤለስድ ꬉበቶሶና። 18 አጉንꬃ ግዶን ዘረትዳይስ ቃላ ስኤይሳታ። 19 ሽን ሀ ሳአ ደኡዋስ ህርጎይ፥ ዱረተꬃ ዶሶይነ ሀራባ አሞተይስ እያ ዎዛናን ገልድ ቃላ ጩልያ ግሾ አይፈ አይፎና አትስ። 20 ሽን አራዳ ቢታን ዘረትዳይሳት ቃላ ስእድ ኤከይሳታ። ኤንቲ እሶይ ሀስታማ፥ እሶይ ኡሱፑን ታማ እሶይ ፄታ አይፍስ” ያግስ።

ጌማን ደእያ ፆምፐ

(ሉቃ 8:16-18)

21 የሱሲ ጉጅድ፥ “ፆምፐ ኤክድ፥ ዳቾፈ ዎይኮ አልጋፈ ጋርሳን ዎꬅያ አስ ደኢ? ꬎቃ በሳን ዎነዬ?[c] 22 ህዛ፥ ቆሰትዳባይ ኡባይ ቆንጨ ከያና፤ ጌምዳባይ ኡባይ ኤረቶና አተና። [d] 23 ስእያ ሀይꬅ ደእያ ኦንካ ስኦ” ያግስ።

24 ቃስ ኤንታኮ፥ “ህንተ ስእያባ አኬክድ ስእተ! ፆሳ ቃላ ህንተ ስኤይሳ መላ እ ህንተዉ አኬካ እማና። ኡባካ ህንተዉ ዳርስድ እማና። 25 እስባይ ደእያ ኡራስ ጉጅ እመታና፥ ባይናይሳፈ ሀር አቶሽን፥ እያዉ ደእያ ሄ ጉꬅያካ ኤከታና” ያግስ። [e]

ድጭያ ዘረꬃ ሌምሶ

26 የሱሲ ዛሪድ፥ “ፆሳ ካዎተꬃይ ባ ጋደን ዘረꬅ ዘርያ አሳ መላ። 27 ሄ ኡራይ ቃማ ꬍስኬስ፤ ዎንታ ደንዴስ። እ ባ ሁጰን ዋንያኮ ኤሮና ደእሽን ሄ ዘረꬃይ ዶሌስነ ድጬስ። 28 ቢታይ ካꬅ ባርካ እሜስ። ኮይሮ ዶልድ ድጬስ፥ ካልድ አይፋናዉ ጋምቡፄስ፥ ዉርሰꬃን ኩመꬃ አይፈ አይፌስ። 29 ሽን ካꬃይ ጋክያ ዎደ ኡራይ ኤለስድ ባጫራ ገል አጌስ” ያግስ። [f]

አይፈ ጉꬃ ምꬄ ሌምሶ

(ማቶ 13:31-34፤ ሉቃ 13:18-19)

30 የሱሲ፥ “ኑኒ ፆሳ ካዎተꬃ አይ ዳኔስ ጋኔ? ዎይኮ አይብራ ሌምሳኔ? 31 ፆሳ ካዎተꬃይ አይፈ ጉꬃ ምꬅ ዳኔስ። ሄ ምꬃ አይፍያ ዘርያ ዎደ ሳአን ደእያ ምꬃ አይፈ ኡባፈ ጉፄስ። 32 ዘርን ዶልድ አታክልተ ኡባፈ ግታቴስ፤ ዳሮ ዳሽ ዳዬስ። ካፎት እያ ታሽያ ቦላ ኬፅድ ኡታና ጋካናዉ ዳዬስ” ያግስ።

33 የሱሲ ሀይሳ መላ ዳሮ ሌምሶን አሳይ አኬካናዉ ዳንዳኤይሳ መላ ቃላ ኦድስ። 34 አሳስ ሌምሶይ ባይና ኦደና። ሽን የሱሲ ባ ታማረታ ፃላላራ ደእያ ዎደ፥ ኤንታዉ ኡባባ ብርሽድ ኦድስ።

የሱሲ ሆቢያ ሴርስ

(ማቶ 8:23-27፤ ሉቃ 8:22-25)

35 ሄ ጋላስ ሳእ ኦማርስን፥ የሱሲ ባ ታማረታኮ፥ “አባፈ ሄፍንꬅ ፕኖስ” ያግስ። 36 እያ ታማረት ዳሮ አሳ የግ አግድ፥ የሱሲ ካሰ ገል ኡትዳ ዎጎሉዋን ገልድ የሱሳ ባንታራ ኤፍዶሶና። ሀራ ዎጎሎትካ ያን ደኦሶና። 37 ዎልቃማ ጎተይ ደንድድ፥ ሆበይ ዎጎሉዋ ሾጭን፥ ኩማና ጋካናዉ ዎጎሉዋ ግዶ ሃꬅ ገልስ። 38 ሄ ዎደ የሱሲ ዎጎሉዋን ጉየ ባጋራ ቦርኮትድ ꬍስክስ። እያ ታማረት እያ ደንꬅድ፥ “አስታማርያዉ፥ ኑኒ ꬋይያ ዎደ ነ ስእ ጋዳ ፄላይ?” ያግዶሶና።

39 ያትን፥ እ ባርክድ ጎትያ፥ “ስእ ጋ” ግድ፥ አባካ፥ “ዎፑ ጋ” ግስ። ጎተይካ ስእ ግን ኡባባይ ዎፑ ግስ። 40 የሱሲ ባ ታማረታኮ፥ “አይስ ሀይሳዳ ባበቲ? ህንተዉ አማኖይ ዋንድ ꬋይዴ?” ያግስ።

41 ኤንቲ ዳሮ ባብድ ባንታ ግዶን፥ “ሀይስ ሀር አቶሽን፥ ጎተይነ አባይ ኪተተይስ ኦኔ?” ያግዶሶና።

<- ማርቆሳ ዎንገላ 3 ማርቆሳ ዎንገላ 5 ->