1 ኡሱፑን ጋላሳፐ ጉየ የሱሲ፥ ጰፅሮሳ፥ ያይቆባነ እያ እሻ ዮሃንሳ ባራ ኤክድ ባንታርካ ግዳናዉ ዙማ ቦላ ከይስ። [a] 2 ያን ኤንታ ስንꬃን የሱሳ ማላይ ኩመꬅ ላመትስ፤ እያ ሶምኦይካ አዋዳ ፆልቅስ። እያ ማኦይካ ዳሮ ቦፅስ። 3 ሄኮ፥ ሙሰይነ ኤልያስ እያራ ኦደትሽን በእዶሶና። 4 ጰፅሮስ የሱሳኮ፥ “ኑኒ ሀይሳ ሀሹ ይዳ። ነ ኮይኮ እስኖ ነዉ፥ እስኖ ሙሰስ፥ እስኖ ኤልያሳስ ሀይሳን ሄꬑ ሻቃራ ሻቃራና” ያግስ። 5 ጰፅሮስ ሄሳ ቡሮ ኦድሽን ቦꬃ ሻራይ ኤንታና ካምስ። ሻራ ግዶራ፥ “ታና ኡፋይስያ፥ ታ ዶስያ ናአይ ሀይሳ፥ እያ ስእተ!” ግያ ቃላይ ይስ። [b] 6 የሱሳ ታማረት ሄሳ ስእዳ ዎደ ዳጋምድ ባንታ ሶምኡዋራ ሳአን ኩንድዶሶና። 7 ሽን የሱሲ ኤንታኮ ሺቅድ ኤንታ ቦችድ፥ “ደንድተ፥ ያዮፍተ!” ያግስ። 8 ኤንቲ ꬎቁ ግድ በእያ ዎደ የሱሳፐ ሀራ ኦናካ በእቦኮና።

9 ኤንቲ ዙማ ቦላፈ ዎꬍሽን የሱሲ ኤንታኮ፥ “አሳ ናአይ ሀይቆፐ ደንዳና ጋካናዉ ሀ ህንተ በእዳባ ኦደስካ ኦዶፕተ” ግድ ኪትስ። 10 የሱሳ ታማረት፥ “ያትን፥ ህገ አስታማረት ኤልያስ ክርስቶሳፐ ካሰትድ ያና ግዳይ አይብሴ?” ያግድ ኦይችዶሶና። [c]

11 የሱሲ ዛሪድ፥ “ኤ! ኤልያስ ካሰት ይድ ኡባባ ጊግሳና። 12 ሽን ታ ህንተዉ ቱማ ኦዳይስ፤ ኤልያስ ካሰትድ ይስ። ኤንትካ እያ ቦላ ኮይዳባ ኦꬅዶሶናፐ አትሽን፥ እያ ሻክ ኤርቦኮና። ሄሳዳ አሳ ናአይ ኤንታ ኩሸን ዋየታና” ያግስ። [d]

13 ሄ ዎደ የሱሲ ግዳይ ፃማቅያ ዮሃንሳባ ግደይሳ አኬክዶሶና።

14 ኤንቲ ደርያፐ አሳኮ ስምያ ዎደ እስ አስ የሱሳ ስንꬃን ጉልባትድ፥ 15 “ጎዳዉ፥ ሀያና ታ ናኣስ ቃታርክ፤ እያ ሾጭድ የግያ ሀርገይ ዳሮ ኡንኤꬅድ ታማንነ ሃꬃን የጌስ። 16 ነ ታማረታኮ ኤሀስ፥ ሽን ኤንቲ ፓꬃናዉ ዳንዳእቦኮና” ያግስ።

17 የሱሲ ዛሪድ፥ “ህንተኖ፥ አማኖና ጌላ የለተꬃዉ አዉደ ጋካናዉ ታ ህንተራ ዳኔ? አዉደ ጋካናዉ ታ ህንተና ዳንዳአኔ? አነ ናኣ ሃ ኤክ ዪተ” ያግስ። 18 የሱሲ ቱና አያና ሀንቅን፥ ቱና አያናይ ናኣፐ ከይስ፤ ሄ ሳተንካ ናአይ ፓፅስ። 19 ሄሳፈ ጉየ፥ የሱሳ ታማረት ባንታርካ እያኮ ሺቅድ፥ “ኑኒ ቱና አያና ከሳናዉ ዳንዳእቦናይ አይብሴ?” ያግድ ኦይችዶሶና። 20 እ ኤንታኮ፥ “ህንተዉ አማኖይ ላፍዳ ግሾሳ። ታ ህንተዉ ቱማ ኦዳይስ፤ ጋሸ አይፈ መላ አማኖይ ህንተዉ ደእኮ ‘ሀ ዙማ ሀይሳፈ ደንዳዳ ገደ አꬋ’ ጊኮ ህንተዉ ኪተታና። ህንተዉ ዳንዳኤቶናባይ ዴና። 21 [ሽን ሄሳ መላይ ዎሳፐነ ፆማፐ አትሽን፥ ሀራን ከየና”] ያግስ። [e][f]

22 የሱሳ ታማረት ጋልላን ሺቅድ ደእሽን የሱሲ ኤንታኮ፥ “አሳ ናእ አሳ ኩሸን አꬍድ እመታና። 23 ኤንቲ እያ ዎꬋና፥ ሽን እ ሄꬓንꬆ ጋላስ ሀይቆፐ ደንዳና” ያግስ።