ሉቃሳ ዎንገላ 2

የሱሳ የለተꬃ

(ማቶ 1:18-25)

1 ሄ ዎደ ሮመ ቢታን ደእያ አሳ ኡባይ ታይበታና መላነ ሱንꬃይ ፃፈታና መላ ካዎይ አዉግስፆስ ኪትስ። 2 ሄስካ ቀረኖስ ሶረ ቢታ አይስያ ዎደ ኦሰትዳ ኮይሮ ታይቡዋ። 3 ሄሳ ግሾ፥ እስ እስ አስ ባ ሱንꬃ ፃፈታናዉ ባ የለትዳ ቢታ ብስ።

4 ዮሰፍካ ዳዊታ ኬꬃፈነ ያራፐ ግድዳ ግሾ፥ ጋልላ ናዝረተ ካታማፐ ደንድድ ዳዊታ ካታማ ግድዳ ይሁዳ ቤተለመ ብስ። 5 ብሸ፥ የላናዉ ዎደይ ዉርዳ እ ኦይች ዎꬅዳ፥ ማይራምራ ዎላ ፃፈታናዉ ብስ። 6 ኤንቲ ያን ደእሽን እዉ የሎ ዎደይ ጋክስ። 7 ባ ባይራ ናኣ የላሱ። ጩርቃራ ፃፃዳ እማꬅ አቅያ ኬꬃን በሲ ꬋይዳ ግሾ ዳራን መሄ ሙዝያ ጎንገን ዝንእሳሱ።

ሄንꬃንቾታነ ኪታንቾታ

8 ሄ ጋድያን ቃማ ዶርሳ ዉድያ ናግሸ ካረን አቅያ ሄንꬃንቾት ደኦሶና። 9 ጎዳ ኪታንቾይ ሀሳዮና ይድ ኤንታ ማታን ኤቅስ። ጎዳ ቦንቾይ ኤንታ ዩሹዋን ፖእስ፤ ኤንትካ ዎልቃማ ያሽ ያይዶሶና። 10 ሽን ኪታንቾይ፥ “ያዮፍተ! ሄኮ፥ አሳ ኡባስ ግድያ ግታ ኡፋይሳ ምሽራቹዋ ኤካዳ ያስ። 11 ሄስካ፥ ዳዊታ ካታማን አሸይስ ህንተዉ ሀች የለትስ። እ ጎዳ ክርስቶሳ። 12 ዞቃለ ናእ ጩርቃራ ፃፀትድ ጎንገን ዝንእዳይሳ ህንተ ደማና፤ ሄስካ ህንተዉ ማላ ግዶ” ያግስ።

13 ቆፖና ዳሮ ሳሎ ኪታንቾት ኪታንቹዋራ እስፈ ቆንጭድ፥

14 “ቦንቾይ ፆሳስ ꬎቃ ሳሉዋን፥

ሳሮይ ቢታ ቦላ ፆሳይ ዶስያ አሳስ ግዶ”

ያግድ ጋላትዶሶና።

15 ኪታንቾት ኤንታፈ ሻከትድ ሳሉዋ ከይዳፐ ጉየ ሄንꬃንቾት፥ “አነ ጎዳይ ኑስ ቆንጭስዳባነ ሀንዳባ በአናዉ ቤተለመ ቦስ” ያግዶሶና።

16 ኤንትካ ኤለስድ ብዶሶና። ማይራሞ፥ ዮሰፋነ ዞቃለ ናኣ ጎንገን ዝንእዳይሳ በእዶሶና። 17 በእ ስሚድ ናአባ ኤንታዉ ኦደቶይሳ፥ ቆንጭስድ ሄ በሳን ደእያ አሳስ ማርካትዶሶና። 18 ሄሳ ስእዳ ኡባይ ሄንꬃንቾት ኦድዳይሳን ማላለትዶሶና። 19 ማይራማ ሀንዳባ ኡባ ባ ዎዛናን ቆፓሸ ደአሱ። 20 ሄንꬃንቾት ኤንታዉ ኦደትዳይሳዳ ሀንን በእዶሶና። ሄሳ ግሾ፥ ባንታ ስእዳባስነ በእዳባ ኡባስ ፆሳ ቦንችሸነ ጋላትሸ ስምዶሶና።

የሱሳ ፆሳ ኬꬅ ኤፍዶሶና

21 ሆስፑንꬃ ቃማን፥ ቃፃሮ ዎደይ ጋክን፥ እ ቃንꬃታናፐ ስን ኪታንቾይ ዎꬅዳ ሱንꬃን የሱሳ ጌተትስ። [a] 22 ሙሰ ዎጋ መላ ኤንታ ጌሻተꬃ ዎደይ ፖለትዳፐ ጉየ ዮሰፋራነ ማይራምራ ዮጋ ናኣ ባንታ ጎዳስ እማናዉ የሩሳላመ ብዶሶና። 23 ሄስካ፥ ጎዳ ዎጋን፥ “አደ ግድዳ ባይራ ናእ ኡባይ ጎዳስ ዱማትዳይሳ ግዶ” ጌተትድ ፃፈትዳይሳ ፖላናሳ። [b] 24 ቃስ ጎዳ ዎጋን፥ ናምኡ ኩራቾ ዎይኮ ሆለ ያርሻናዉ ኤፍዶሶና። 25 ሄ ዎደ ጌሽነ አማኖራ ምኖ ግድዳ ስሞና ጌተትያ አስ የሩሳላመን ደኤስ። እ እስራኤለታ አቶተꬃ ናግሸ ደኤስ። ጌሻ አያናይካ እያ ቦላ ደኤስ። 26 ቃስ ክርስቶሳ በኦና ሀይቆናይሳ ጌሻ አያናይ እያዉ ቆንጭስን ኤርድ ደኤስ። 27 እ ሄ ጋላስ አያናይ ካለꬅን ፆሳ ኬꬅ ብስ። ናኣ አየራነ አዋራ ዎጋ ፖላናዉ ዮጋ ናኣ የሱሳ ኤክድ ገልዳ ዎደ፥ 28 ስሞን ሞክ ኤክድ ናኣ እድምድ፥

29 “ጎዳዉ ነ ታዉ ገልዳ ቃላ መላ፥

ሀእ ነ አይልያ ሳሮን ሞይዛ።

30 ታ አይፈይ አሳ ኡባ ስንꬃን ነ ጊግስዳ፥

31 ነ አሹዋ በእስ።

32 ሄስካ ካዎተꬃታ ኡባስ፥

ፆሳ ኦግያ ቆንጭስያ ፖኦ፥

ነ አሳ እስራኤለስካ ቦንቾ”

ያግድ ፆሳ ጋላትስ። [c]

33 ዮሰፋራነ ማይራምራ እያዉ ኦደትዳባን ማላለትዶሶና። 34 ስሞን ኤንታ አንጅስ። አየ ማይራምኮ፥ “ሄኮ ዳሮ አሳ ዎዛና ቆፋይ ቆንጫና መላ፥ እስራኤለን ደእያ ዳሮታስ ኤንታ ኩንደꬃስነ ደንዱዋስ ፆሳን ዶረትስ። 35 ቃስ ኤቀተይሳታስ ማላ ግዳና። ነ ሸምፑዋራካ ቃስ ማሽ አꬋና” ያግስ። 36 ቃስ አሴራ ያራፐ ግድዳ ፋኑኤላ ናእያ ሃና ጌተትያ ናበይ ደአዉሱ። እያ ዳሮ ጭማሱ፤ እያ ባ ኮይሮ አዝናራ ላፑን ላይꬅ ደአሱ። 37 እ አዝናይ ሀይቅን ሆስፑን ታማነ ኦይዱ ላይꬅ ግዳና ጋካናዉ ቃማነ ጋላስ ፓጨይ ባይና ዎሳንነ ፆማን ፆሳ ኬꬃን ሀጋዛሱ። 38 እያ ሄ ሳትያን ባዳ ፆሳ ጋላታሱ፤ የሩሳላመ ዎዘተꬃ ናግያ ኡባስ ዮጋ ናአባ ማርካታሱ። 39 ዮሰፋራነ ማይራምራ ጎዳ ህግያን ኪተትዳ ዎጋ ኡባ ፖልዳፐ ጉየ ጋልላ ቢታን ደእያ ባንታ ካታማ ናዝረተ ስምዶሶና። [d] 40 ናአይ ድጭሸነ ምንሸ ብስ። ጭንጫተꬃን ኩምስ፤ ፆሳ አꬎ ኬሀተꬃይ እያ ቦላ ደኤስ።

የሱሲ ፆሳ ኬꬃን

41 ዮሰፋራነ ማይራምራ ፓስካ ባኣለ ቦንቻናዉ ላይꬃን ላይꬃን የሩሳላመ ቦሶና። [e] 42 የሱሳስ ታማነ ናምኡ ላይꬅ ግድያ ዎደ ካሰ ሜዘትዳይሳዳ ባኣለ ቦንቻናዉ ብዶሶና። 43 ባልያ ቦንችዳፐ ጉየ ሶ ስምያ ዎደ ናአይ የሱሲ የሩሳላመን አትስ። ሽን ዮሰፋራነ ማይራምራ እ የሩሳላመን አቶይሳ ኤርቦኮና። 44 እ ሶ ስምያ አሳራ ዎላ ደእያ ዳንን ኤንቲ እስ ጋላሳ ኦገ ብዶሶና። እ ባይናይሳ ኤርዳፐ ጉየ ባንታ ዳቦታነ ላገታ ማታን ኮይዶሶና። 45 እ ያን ꬋይን ኮይሸ ጉየ የሩሳላመ ጋካናዉ ብዶሶና።

46 ሄꬑ ጋላሳፐ ጉየ ፆሳ ኬꬃን አስታማረታ ግዶን ኡትድ ኤንታባ ስእሸነ ኤንታ ኦይችሸ ደእሽን ደምዶሶና። 47 እያ ስእያ ኡባይ እያ አኬካንነ ዛሩዋን ማላለትዶሶና።

48 ሶ አሳይ እያ ደምዳ ዎደ ማላለትዶሶና። እያ አያካ፥ “ታ ናአዉ፥ አይስ ኑና ሀይሳዳ ኦꬃዲ? ነ አዋራነ ታራ ነና ኮይሸ ኡንኤትዳ” ያጋሱ።

49 የሱሲ ኤንታኮ፥ “ታና አይስ ኮዬቲ? ታ፥ ታ አዋ ኬꬃን ዳናዉ በሰይሳ ኤረከት” ያግስ። 50 ሽን እ ኤንታኮ ግዳባ ኤንቲ አኬክቦኮና።

51 ሄሳፈ ጉየ፥ ኤንታራ እስፈ ናዝረተ ካታማ ብስ። ኤንታዉ ኪተትሸ ደእስ። እያ አይያ ሄ ኡባ ባ ዎዛናን ዎꬃዳ ናጋሱ። 52 የሱሲ፥ ጭንጫተꬃን፥ ጌሳንነ ቴማን ፆሳ ስንꬃንነ አሳ ስንꬃን ድጭስ። [f]

<- ሉቃሳ ዎንገላ 1 ሉቃሳ ዎንገላ 3 ->