15 የሱሲ ዮጋ ናይታ ቦላ ባ ኩሽያ ዎꬅድ አንጃና መላ አሳይ እያኮ ኤሆሶና። የሱሳ ታማረት ሄሳ በእድ “አይስ የሱሳኮ ኤሄቲ?” ያግድ ካጭዶሶና። 16 ሽን የሱሲ ናይታ ባኮ ፄግድ፥ “ዮጋ ናይት ታኮ ያናይሳ ድጎፍተ፤ ዮ ጊተ። አይስ ጊኮ፥ ፆሳ ካዎተꬃይ ኤንታዳ ሀንዳይሳታሳ። 17 ታኒ ህንተዉ ቱማ ኦዳይስ፤ ፆሳ ካዎተꬃ ዮጋ ናይታꬆ ኤኮናይ ኦንካ ያ ገለና” ያግስ።

18 አይሁደ ሀላቃታፐ እሶይ፥ “ኬሀ አስታማርያዉ፥ መርና ደኦ ደማናዉ አይ ኦꬆ?” ያግድ ኦይችስ።

19 የሱሲ እያኮ፥ “አይስ ታና ኬሀዉ ያጋዳ ፄጋይ? እስ ፆሳፈ አትሽን፥ ሀር ኬህ ባዋ። 20 ላሞፋ፥ ዎꬎፓ፥ ካይሶቶፓ፥ ዎርዶ ማርካቶፋ፥ ነ አዋነ ነ አይዉ ቦንቻ” ግያ ኪታ ኤራይ ግድ ኦይችስ። [b]

21 ኡራይካ፥ “ሄሳታ ኡባ ታኒ ናአተꬃፈ ዶማዳ ናጋሸ ጋምአስ” ያግስ።

22 የሱሲ ሄሳ ስእዳ ዎደ፥ “ህዛ፥ ነዉ እስባይ ፓጬስ፤ ነዉ ደእያባ ኡባ ባይዛዳ ማንቆታስ እማ፤ ሳሎን ነና ሻሎይ ናጌስ። ያታ ስማዳ፥ ታና ካላ” ያግስ። 23 ሽን ኡራይ ሄሳ ስእዳ ዎደ እያዉ ዳሮ ሻሎይ ደእያ ግሾ ዳሮ ቂሮትስ።

24 የሱሲ ኡራ በእድ፥ “ዱረ አሳስ ፆሳ ካዎተꬅ ገሎይ ዋንድ ኡንአንደሻ? 25 ዱረይ ፆሳ ካዎተꬅ ገላናይሳፈ ግማለይ ናርፐ ሉሆራ ካንይስ ካዉዬስ” ያግስ።

26 ሄሳ ስእዳ አሳይ፥ “ሄሳ ግድኮ ኦን አታኔ?” ያግዶሶና።

27 የሱሲ፥ “አሳስ ዳንዳኤቶናባይ ፆሳስ ዳንዳኤቴስ” ያግስ።

28 ጰፅሮስ፥ “ሄኮ ኑኒ ኑባ ኡባ አግድ ነና ካልዳ” ያግስ።

29 “የሱሲ ቱማ ታ ህንተዉ ኦዳይስ፤ ፆሳ ካዎተꬃስ ግድ ባ ኬꬃ ዎይኮ ባ ማችዉ ዎይኮ ባ እሻታ ዎይኮ ባ አዋነ ባ አይዉ ዎይኮ ባ ናይታ አግዳይ፤ 30 ሀ ዎድያን ዳኮ ዳሮ፥ ያና አላመን መርና ደኦ ኤኮናይ ኦንካ ባዋ” ያግስ።

31 የሱሲ ታማነ ናምአታ ባኮ ፄግድ፥ “አነ የሩሳላመ ቦስ፥ ናበት አሳ ናአባ ፃፍዳባ ኡባይ ያን ፖለታና። 32 እ አይሁደ ግዶና አሳስ አꬍድ እመታና። ኤንቲ እያ ቶቻና፥ ጫያናነ እያ ቦላ ጩታና። 33 እያ ጋራፍዳፐ ጉየ፥ ዎꬋና፥ ሽን ሄꬓንꬆ ጋላሳን እ ሀይቆፐ ደንዳና” ያግስ።

34 ሽን እያ ታማረት ሄ ኡባፈ እስባካ አኬክቦኮና። እያ ፁራይ ኤንታዉ ቆሰትዳ ግሾ እ ዎይግዳኮ ኤርቦኮና።

35 የሱሲ እያርኮ ማትያ ዎደ እስ ቆቀ ኡራይ ኦገ ጋፃን ኡትድ ዎሴስ። 36 ቆቀ ኡራይ አሳይ ሄ በሳራ አꬍሽን ስእድ፥ “እ አይቤ?” ግድ ኦይችስ። 37 ኤንቲ፥ “ናዝረተ የሱሲ ሀይሳራ አꬌስ” ያግዶሶና።

38 እ፥ “ዳዊታ ናአዉ፥ የሱሳ፥ ታና ማራርክ” ያግድ ዋስስ።

39 ስን ስን ብያ አሳት፥ “ስእ ጋ” ግድ ሀንቀትዶሶና። ሽን እ፥ “ዳዊታ ናአዉ፥ ታና ማራ” ያግድ ዳርስድ ዋስስ።

40 የሱሲ ኤቅድ ኡራ ባኮ ኤሀና መላ ኪትስ። ኡራይካ፥ እያኮ ሺቅን፥ 41 “ታ ነዉ አይ ኦꬃና መላ ኮያይ?” ያግድ ኦይችስ።