ሉቃሳ ዎንገላ 10

ላፑን ታማነ ናምኡ ታማረት ኪተትዶሶና

1 ሄሳፈ ጉየ፥ ጎዳይ ሀራ ላፑን ታማነ ናምኡ [a] አሳታ ዶርስ። እ ባናዉ ቆፕዳ ካታማነ ጉታ ኡባ ስንꬃትድ ባና መላ ናምአ ናምአ ኦꬅድ ኪትስ። 2 የሱሲ ኤንታኮ፥ “ሄኮ፥ ሺቃና ካꬃይ ዳሮ ሽን ኦሳንቾት ጉꬃ። ያንያ ግሾ፥ ካꬃ ጎዳይ ኦሳንቾታ ኪታና መላ ዎስተ። [b] 3 ህዛ፥ ቢተ፥ ታኒ ህንተና ዶርሳታዳ ሱꬉመታ ግዶ የዳና። [c] 4 ህንተ ብያ ኦግያስ አይኮካ ኦይኮፍተ፥ ሚሸ ግድን ካꬅ ግድን ጫማ ኦይኮፍተ። ኦገ ቦላ ኦናካ ሳሮꬆፍተ።[d] 5 ህንተ ገልያ ኬ ኡባ ኮይሮትድ፥ ‘ሳሮይ ሀ ኬꬃስ ግዶ’ ያግተ። 6 ሳሮ ዶስያ አስ ሄ በሳን ደእኮ፥ ህንተ ሳሮይ ያን ሸምፓና፤ እፃስ ጊኮ ህንተ ሳሮይ ህንተዉ ስማና። 7 ኦሳንቾስ ዳሞዘ በሲያ ግሾ፥ ህንተ ገልዳ ኬꬃን ህንተዉ ሺሽዳባ ኡባ ምሸነ ኡይሸ ያን ጋምእተ። እሱዋ ሶፐ እሱዋ ሶ ዩዮፕተ። [e] 8 አይ ካታማካ ህንተ ገልያ ዎደ አሳይ ህንተና ሞክድ፥ ህንተዉ ሺሽዳባ ኡባ ሚተ። 9 ሄ ካታማን ደእያ ሀርጋንቾታ ፓꬅሸ፥ ‘ፆሳ ካዎተꬃይ ህንተኮ ማትስ’ ያግድ ኦድተ። 10 ሽን እስ ካታማ ገልያ ዎደ አሳይ ህንተና ሞኮና እፅኮ ዳባባ ከይድ ሀይሳዳ ጊተ:[f] 11 ‘ኑ ቶሁዋ ቦላ ደእያ ህንተ ካታማ ባና ፕቶስ፥ ሽን ፆሳ ካዎተꬅ ህንተኮ ማታትዳይሳ ኤርተ።’[g] 12 ፕርዳ ጋላሳን፥ ሀ ካታማፐ ሶዶመ ካታማስ ፕርድ ካዉሸ ግዳናይሳ ታ ህንተዉ ኦዳይስ” ያግስ። [h]

አማኖና እፅዳ ካታማታ

(ማቶ 11:20-24)

13 ካልድካ፥ የሱሲ፥ “ነኖ ኮራዝነ፥ ነኖ ቤተሳይዳ፥ አየ! ህንተናን ኦሰትዳ ማላታት ፅሮሳንነ ስዶናን ኦሰትዳኮ ያን ደእያ አሳይ ካዮ ማኦ ማእድ፥ ብድንꬃ ቦላ ኡትድ፥ በን ማሮታን ገል አጋናሽን። [i] 14 ሄሳ ግሾ፥ ህንተፈ አꬅድ ፅሮሳስነ ስዶናስ ፆሳ ፕርድ ካዉያና። 15 ነካ ቅፍርናሆማ፥ ሳሎ ጋካናዉ ነና ꬎቁ ኦꬃናዉ ኮያይ? ነ ዱገ ስኦለ ሆለታና” ያግስ። [j]

16 ቃስካ የሱሲ ባ ታማረታኮ፥ “ህንተና ስኤይ ታና ስኤስ፥ ህንተና ኤኮናይ ታና ኤከና፥ ታና ኤኮናይ ታና ኪትዳይሳ ኤከና” ያግስ። [k]

17 ላፑን ታማነ ናምኡ ታማረት ኪተትዳ በሳፈ ዳሮ ኡፋይትሸ ስምዶሶና። የሱሳኮ ሺቅድ፥ “ጎዳዉ፥ ነ ሱንꬃን ቱና አያናትካ ኑስ ኪተትዶሶና” ያግዶሶና።

18 የሱሲ ኤንታኮ፥ “ፃላሄይ ሳሎፐ ዎልአንꬃዳ ዎꬍሽን ታ በአስ። 19 ሄኮ፥ ሾሽነ ኮርነ የꬋና መላነ ሞርክያ ዎልቃ ዛራና መላ ማታ ህንተዉ እማስ። ህንተና ቆሀናባይ አይኮይካ ዴና። [l] 20 ግዶሽን፥ ህንተ ሱንꬃይ ሳሎ ማዝጋበን ፃፈትዳ ግሾ፥ ኡፋይትተፐ አትሽን፥ ቱና አያናት ኪተትዳ ግሾ ኡፋይቶፍተ” ያግስ።

21 ሄ ዎደ፥ የሱሲ ጌሻ አያናን ኡፋይትድ፥ “ሳሉዋ ሳኣ ጎዳዉ፥ ሀይሳ ጭንጫታፐነ ኤራንቾታፐ ገንꬃዳ ያላጋታስ ቆንጭስዳ ግሾ ጋላተታ። ኤ፥ ታ አዋዉ፥ ሄሳ ነ ኦꬃናዉ ሎኦ ሸነ ግድስ።

22 “ኡባባይ ታ አዋፐ ታዉ እመትስ። ናአይ ኦነኮ አዋፐ አትሽን፥ ሀር ዎይኮ ናአይ ቆንጭሳናዉ ኮየይሳፈ ሀር ኦንካ አዋ ኤረይ ባዋ” ያግስ። [m]

23 ካልድካ፥ የሱሲ ባ ታማረታስ ዱማ፥ “ህንተ በኤይሳ በኤይሳት አንጀትዳይሳታ። 24 ቱማ ዳሮ ናበትነ ካዎት ህንተ በኤይሳነ ስኤይሳ በአናዉነ ስአናዉ አሞትዶሶና፥ ሽን በእቦኮና፥ ስእቦኮና” ያግስ።

ቱማ ሲቆ

25 ሄኮ፥ እስ ጋላስ ሙሰ ዎጋ ኤርያ እስ ኡራይ ደንድድ የሱሳ ያግድ ፓጨ ኦይሾ ኦይችስ። “አስታማርያዉ፥ መርና ደኦ ላታናዉ ታኒ አይ ኦꬆ?” ያግስ። [n]

26 የሱሲ፥ “ሙሰ ማፃፋን ፃፈትዳይስ ዎይጊ? ነ ዋታ ናባባይ?” ያግስ።

27 አደይ ዛሪድ፥ “ ‘ነ ጎዳ ነ ፆሳ፥ ነ ኩመꬃ ዎዛናፐ፥ ነ ኩመꬃ ሸምፖፈ፥ ነ ኩመꬃ ዎልቃፈነ ነ ኩመꬃ ቆፋፐ ዶሳ። ቃስ ነ ሾሩዋ ነ ሁጰዳ ዶሳ’ ያጌስ” ያግስ። [o]

28 የሱሲ እያኮ፥ “ኔኒ ልከ ዛራዳሳ፥ ነካ ሄሳዳ ኦꬃ። ኔኒ መርናዉ ደኦን ዳና” ያግስ። [p]

29 ሽን ኡራይ ባና ፅሎ ኦꬃናዉ ኮይድ፥ “እ ታ ሾሮይ ኦኔ?” ያግስ።

30 እያ ኦይሻስ የሱሲ ያግድ ዛሮ እሚስ፤ “እስ አሰ ደኤይስ የሩሳላመ ካታማፐ ዱገ እያርኮ ካታማ ብሽን፥ ኦገ ቦላ ፓንጋት ከይድ ሾጭዶሶና። እያ ማኡዋ ቃር ኤክድ ሀይቆፐነ ፓፃፐ ግዶን የግድ ብዶሶና። 31 ጉየፐ፥ አይሁደ ካህነ እሶይ ሄ ኦግያራ ባ ቡሱ ብሸ ኡራ በእድ ደሽ ግድ አꬍስ። 32 ቃስ እስ ሌወ ደኤይስ ሄ በሳ ጋክሸ ኡራ በእድ፥ ሀራ ሶራ አꬍድ ብስ። 33 ሽን፥ እስ ሳማረ ቢታ አሰ ደኤይስ ሄ ኦግያራ ይሸ ኡራ በእድ እያዉ ቃትስ[q] 34 እያኮ ሺቅድ፥ እያ ማዱንꬃ ቦላ ዛይተነ ዎይነ ትግድ ቃችስ። ባ ሀርያ ቦላ ኡትስድ እማꬅ አቅያ ኬ ኤፍስ። ሄ በሳን እያዉ ኮሽያባ ኡባ ኦꬅስ። 35 ዎንተ ናምኡ ድናረ ከስድ እማꬃ ኬꬃ አዋስ እምድ፥ ‘ሀያና ሀ ኡራ ሎይꬃ ፄላ። ታኒ ነዉ እምዳይሳፈ ቦላራ ነ ከስያባ ኡባ ታ ነዉ ጭጋና’ ያግስ።

36 “ህዛ፥ ሀ ሄꬑ አሳታፐ ፓንጋት ሾጭዳ ኡራስ ሾሮተይ ነዉ ኦና ዳኒ?”

37 ኡራይ ዛሪድ፥ “እያዉ ቃትዳይሳካ” ያግስ።

የሱሲ፥ “ነካ ባዳ ሄሳዳ ኦꬃ” ያግስ።

የሱሲ ማርታነ ማይራም ሶን

38 የሱሲ ባ ታማረታራ ኦገ ብሸ እስ ጉታ ጋክስ። ያን ማርታ ጌተትያ እስ ማጫስያ፥ እያ ባ ሶን ሞካሱ። [r] 39 እዉካ ማይራሞ ጌተትያ ምችያ ደአዉሱ፥ ማይራማ ቃላ ስአሸ ጎዳ ቶሁዋ ማታን ኡታሱ። 40 ሽን ማርታ ዳሮ ኦሶን ኡንኤታዳ የሱሳኮ ሺቃዳ፥ “ጎዳዉ፥ ታ ምችያ ኦሱዋ ታ ፃላላስ የጋዳ ኡታ አግን ታ ዳቡርያ ዎደ ኔኒ በአሸ ስእ ጋይ? እያ ታና ማዳና መላ ኦድኪ” ያጋሱ።

41 ሽን ጎዳይ ዛሪድ፥ “ማርታ፥ ማርታ፥ ኔኒ ዳሮባን ኡንኤታሳነ መቶታሳ። 42 ግዶሽን፥ ኮየተይ እስባ ፃላላ። ማይራማ ሎኦባ ዶራሱ፥ ሄስካ ኢፐ ኤከተና” ያግስ።

<- ሉቃሳ ዎንገላ 9 ሉቃሳ ዎንገላ 11 ->