1 ኡባፈ ጌሽ ግድያ ግሾ ናቆ ያርሾ ዎጋይ ሀይሳ፤ 2 ፁሳ ያርሾ መሄይ ሹከትያ በሳን ናቆ ያርሾ መሄይ ሹከቶ፤ እያ ሱꬃይ ያርሾ በሳ ኦይዱ ባጋን ዉርፀቶ። 3 እያ ሞꬉዋ ኡባ፥ ሄስካ ጎይናፐ ብድ ዞኮ መቀꬃ ጋካናዉ ደእያ ሞꬉዋ፥ ኡሎ አሹዋ ካምዳ ሞꬍያ፥ 4 ናምኡ ክላሆታ፥ ኤንታ ካምዳ ሞꬍያነ ትርያ ፄራ ባጋ ኤክድ ያርሾ። 5 ካህነይ ሀይሳታ ታማን ፁሳ ያርሾ ኦꬅድ ጎዳስ ያርሾ፤ ሄስ ናቆ ያርሾ። 6 ካህነ ያራ ግድዳ አደ ኡባይ ሄ ያርሾ አሹዋ ሞ። ሄ ያርሾይ ኡባፈ ጌሽ ግድያ ግሾ ጌሻ በሳን ሜተቶ።

7 ናቆ ያርሹዋነ ናጋራ ያርሹዋ ዎጋይ እስኖ። ሄ መህያ አሾይ ናጋራ አቶተꬃስ ያርሽዳ ካህንያስ እመቴስ። 8 ኦንካ ፁሳ ያርሾ መሄ ኤህን ኤክድ ያርሽያ ካህነይ ሄ መህያ ጋልባ ባዉ ኤኮ። 9 ጮጨን ኮምፐትዳ ዎይኮ ኦቶን ካፅዳ ዎይኮ ባሸን ኡከትዳ ኡባይ ሄ ያርሹዋ ያርሽዳ ካህንያስ እመቴስ። 10 ቃስ ዛይተራ ሙኑቀትዳ ዎይኮ ሙኑቀቶና ካꬃ ያርሾ ኡባይ አሮና አደ ናይታ ኡባስ እስ ግና ሻከትድ እመቴስ።

11 እስ አስ እስፈተꬃ ያርሾ ጎዳስ ያርሽያ ዎደ እያዉ ደእያ ዎጋይ ሀይሳ፤ 12 እ ያርሸይ ጋላታ ያርሾ ግድኮ ሄ ያርሹዋራ እስፈ ዛይተራ ሙኑቅዳ ኡይꬁ፥ እርሾይ ገሎና ኡከትድ ዛይተን ትየትዳ ሌኦ ኡይꬁነ ሎኦ ꬊለፈ ዛይተራ ሙኑቀትዳ ኡይꬁ ሺሾ። 13 ሄ እስፈተꬃ ያርሹዋራ እስፈ እርሾራ ኡከትዳ ኡይꬃ እሞታ ኦꬅድ ያርሾ። 14 ሄ እስ እስ ኡይꬃፈ እሱዋ ደንꬅድ ጎዳስ ያርሾ ኦꬅድ ኤሆ። ሄስ እስፈተꬃ ያርሹዋ ሱꬃ ዉርፅዳ ካህንያስ እመቶ። 15 ሄ መህያ አሾይ ሄ ጋላስ ሜተቶ፤ ዎንታስ አይብካ አቶፎ።

16 ሽን እያ ያርሾይ ጋሶ ያርሾ ዎይኮ ዶሳ ያርሾ ግድኮ ሄ አሾይ ሄ ያርሸትዳ ጋላስ ሜተቶ፤ እያፐ አተይ ደእኮ ዎንተꬃ ጋላስ ሜተቶ። 17 ሄ አሹዋፐ ፓላህድ ሄꬓንꬆ ጋላስ ጋካናዉ ጋምእኮ ሄስ ታማን ፁገቶ። 18 እስ አስ ሺሽዳ እስፈተꬃ ያርሾ አሾይ ሄꬓንꬆ ጋላሳን ሜተትኮ እያ ያርሾይ ኤከተና፤ ያርሾይ ያርሸትዳዳ ታይበተና። ሄ ያርሾይ ቱና፤ እያፐ ምዳ ኦንካ ባ ናጋራን ኦይሸቴስ።

19 ቱናባ ቦችዳ አሾይ ሜተቶፎ፤ እ ታማን ፁገታናዉ ኮሼስ። ሀራ አሹዋ ዎጋን ቱና ግዶና አስ ኦንካ ማና ጊኮ ሞ። 20 ሽን እስ አስ ቱና ግድ ኡትድ፥ ጎዳስ ሺቅዳ እስፈተꬃ ያርሾ አሹዋፐ ምያባ ግድኮ፥ ሄ ኡራይ አሳ ግዶፈ ኩረቶ። 21 እስ አስ ቱናባ ቦችኮ፥ አሳ ቱናተꬅ ግድን ዎይኮ ቱና መሄ ግድን ዎይኮ ሀራ እፀትያ ቱናባ ቦችድ፥ ጎዳስ ያርሸትዳ እስፈተꬃ ያርሾ አሹዋፐ ሚኮ፥ ሄ ኡራይ ባ አሳ ግዶፈ ኩረቶ።

22 ጎዳይ ሙሰኮ ሀይሳዳ ያግስ፤ 23 እስራኤለ አሳስ ሀይሳዳ ያጋዳ ኦዳ፤ ኮርማ ዎይኮ ማራዘ ዎይኮ ኮለ ሞꬎ አሹዋ ሞፕተ። 24 ሀይቅዳ መሄ ዎይኮ ዶእ ዎꬍዳ መህያ ሞꬉዋ ሀራባስ ጎኤትተፐ አትን፥ እያፐ አይባካ ሞፕተ። 25 ጎዳስ ታማን ፁሳ ያርሾስ ሺቅያ መህያ ሞꬎ አሹዋ ምያ ኦንካ ባ አሳ ግዶፈ ኩረቶ። 26 ህንተ ደእያ በሳን አዉን ግድኮካ፥ ካፎ ሱꬅ ዎይኮ መሄ ሱꬅ ሞፕተ። 27 ሱꬅ ምያ ኦንካ ባ አሳ ግዶፈ ኩረቶ።

28 ጎዳይ ሙሰኮ ሀይሳዳ ያግስ፤ 29 እስራኤለ አሳስ ሀይሳዳ ያጋዳ ኦዳ፤ ጎዳስ እስፈተꬃ ያርሾ ሺሽያ ኦንካ ሄ እስፈተꬃ ያርሹዋፈ ሻክድ ባ እሞታ ኦꬅድ ጎዳስ ዱማይድ ያርሾ። 30 ሄሳ እ ጎዳስ ታማን ፁሳ ያርሾ ኦꬅድ፥ ባ ኩሸን ኤክድ ኤሆ። ቃስ ሞꬉዋ አንጋሱዋራ ጋꬅ ኤህድ ዩሾ ያርሾ ኦꬅድ ጎዳ ስንꬃን ያርሾ። 31 ካህነይ ያርሾ በሳን ሞꬉዋ ፁጎ፤ ሽን አንጋሶይ አሮናስነ እያ አደ ናይታስ እመቶ። 32 ህንተ እስፈተꬃ ያርሹዋፈ ኡሻቻ ገዳ እሞታ ኦꬅድ ካህንያስ እምተ። 33 ሄ ኡሻቻ ገዳይ እስፈተꬃ ያርሹዋ ሱꬃነ ሞꬉዋ ያርሽያ ካህንያ ጋክያ ግሾ ግዶ። 34 ታኒ እስራኤለ አሳ እስፈተꬃ ያርሹዋፈ ዩሾ አንጋሱዋን ሺቅዳ ገዳ እስራኤለ አሳፐ ኤካዳ፥ ካህንያ አሮናስነ እያ አደ ናይታስ ግሾ ኦꬃዳ እማስ። ሄስ ኤንታ ጋክያ ኤንታ ግሾ ግድያ ግሾ እስራኤለ አሳይ መርናዉ ሄሳ ኤንታዉ እምሸ ዳና።

35 አሮንነ እያ አደ ናይት ካህነ ግድድ ሹመትዳ ጋላስ ጎዳስ ሺቅዳ ፁሳ ያርሹዋፈ፥ ሄስካ ኤንታዉ ግሾ ግድድ እመትስ። 36 ጎዳይ ኤንታ ካህነተꬃስ ትይዳ ጋላስ፥ ሄሳ ኤንታዉ እማና መላ እስራኤለ አሳ ኪትስ፤ ሄስ ያና የለተꬃን ኤቅድ ደእያ ዎጋ ግዳና።

37 ህዛ ፁሳ ያርሹዋ፥ ካꬃ ያርሹዋ፥ ናጋራ ያርሹዋ፥ ናቆ ያርሹዋ፥ ካህነት ትየትያ ዎደ ያርሸትያ ያርሹዋነ እስፈተꬃ ያርሹዋ ዎጋይ ሀይሳ። 38 እስራኤለ አሳይ ሲና መላ ቢታን ባንታ ያርሹዋ ጎዳስ ያርሻና መላ ጎዳይ ኪትዳ ጋላስ፥ ሲና ዙማ ቦላ ጎዳይ ሙሰ ኪትዳ ዎጋይ ሀይሳ።

<- ሌወታ ማፃፋ 6ሌወታ ማፃፋ 8 ->