1 ጎዳይ ሙሰኮ ሀይሳዳ ያግስ፤ 2 ፆምፐይ ቶኦና ኤፅሸ ዳና መላ እያዉ ኮሽያ ጉምእድ ፅልስዳ ሻማሆ ዛይተ ነዉ ኤሀና መላ እስራኤለ አሳ ኪታ። 3 ጌሻ ዱንካንያ ግዶን ደእያ ማርካተꬃ ማጋራጁዋፈ ካረ ባጋራ ኦማርሳፈ ዎንታ ጋካናዉ አሮን ጎዳ ስንꬃን ሄ ፆምፕያ ኡባ ዎደ ኤꬆ። ያና የለተꬃ ኡባስ ሄስ መርና ዎጋ ግዶ። 4 ፆምፐ ዎꬅያ ዋላህ ባይና ዎርቃ ኮጫ ቦላ ደእያ ፆምፐት ጎዳ ስንꬃን ኡባ ዎደ ኤፃና መላ አሮን ናጎ።

5 ታማነ ናምኡ ክሎ ግራመ ግድያ ሎኦ ꬊለ ኤካዳ ታማነ ናምኡ ኡይꬅ ኡካ። 6 ሄ ኡይꬃታ ኡሱፑና ኡሱፑና ናምኡ ማራን ጎዳ ስንꬃን ደእያ ዋላህ ባይና ዎርቃ ፃርጴዛ ቦላ ዎꬃ። 7 ጎዳስ ፁገታናዉ ሺቅዳ ካꬃ ያርሾ ግደይሳ ኤርሳናዉ፥ ናምኡ ማራታ ምየን ጌሻ እፃነ ዎꬃ። 8 ሀ ኡይꬃ ሳምባታን ሳምባታን ኡባ ዎደ አሮን እስራኤለ አሳ ግሾ መርና ጫቆ ኦꬅድ ጎዳ ስንꬃን ዎꬆ። 9 ሄስ አሮናነ እያ አደ ናይታ ጋክያ ግሾ፤ ኤንቲ እያ ጌሻ በሳን ሞ። ሄስ ጎዳስ ፁሳ ያርሹዋፈ ዎጋዳ አሮናነ እያ ናይታ ጋክያ ግሾ ግድያ ግሾ ኡባፈ ጌሽ።

10 ባ አየን እስራኤለ፥ ባ አዋን ግብፀ አስ ግድዳ እስ ኡራይ ደኤስ። እስ ጋላስ እ ሀራ እስራኤለ አሳራ ሄራን ዋትስ። 11 ባ አየን እስራኤለ ግድዳ ኡራይ ጎዳ ሱንꬃ ጫይስ፤ ያትን እያ አሳይ ሙሰኮ ኤህዶሶና። ሄ ኡራ አይያ ዳነ ኮቸ ግድዳ ደብራ ናአ። እ ሱንꬃይ ሳሎምቶ። 12 ሄ ኡራ ዋታነኮ ጎዳ ሸነይ ቆንጫና ጋካናዉ እያ ናግስዶሶና።

13 ጎዳይ ሙሰ ሀይሳዳ ያግስ፤ 14 ሄ ጫይዳ ኡራ ጉታፐ ጋፃ ከሳ። እ ጫይሽን ስእዳ አሳ ኡባይ ባንታ ኩሽያ እያ ሁጵያ ቦላ ዎꬆ፤ እስራኤለ ማባራ ኡባይ እያ ሹቻ ጫድድ ዎꬎ። 15 እስራኤለ አሳስ ሀይሳዳ ያጋዳ ኦዳ፤ እስ አስ ባ ፆሳ ጫይኮ፥ እ ባ ናጋራን ኦይሸታና። 16 ጎዳ ሱንꬃ ጫይያ አስ ሀይቆ፤ እስራኤለ ማባራ ኡባይ እያ ሹቻን ጫዶ። በተ አስ ዎይኮ ጋደ አስ ጎዳ ሱንꬃ ጫይኮ ሀይቆ።

17 አሰ ዎꬍዳ አስ ሀይቆ። 18 አሳ መሄ ዎꬍዳ አስ ኦንካ ባ ዎꬍዳ መህያ ግሾ ፓፃ መህያ ቃንፆ። 19 እስ አስ ባ ሾሩዋ ቆህኮ፥ እ ኦꬅዳይሳዳ እያ ቦላ ኦሰቶ። 20 መንꬅኮ መኦ፤ አይፈ ግሾ አይፈ፤ አቻ ግሾ አቸ። አሳ ቦላ ቆሆ ጋꬅዳ ኦንካ እ ጋꬅዳ ቆሁዋዳ እያ ቦላ ጋኮ። 21 መሄ ዎꬍዳ አስ ሄ መህያ ጋትያ ቃንፆ፤ ሽን አሰ ዎꬍዳ አስ ሀይቆ። 22 በተ አሳስነ እስራኤለ አሳስ ህገይ እስኖ ግዶ። ታኒ ጎዳ ህንተ ፆሳ።

23 ሙሰይ ሄሳ እስራኤለ አሳስ ኦድስ፤ ኤንቲ ሄ ጫይዳ ኡራ ጉታፐ ጋፃ ከስድ፥ ሹቻን ጫድድ ዎꬍዶሶና። ያትድ እስራኤለ አሳይ ጎዳይ ሙሰ ኪትዳይሳዳ ኦꬅዶሶና።

<- ሌወታ ማፃፋ 23ሌወታ ማፃፋ 25 ->