1 ጎዳይ ሙሰኮ ሀይሳዳ ያግስ፤ 2 “አሮናስ እያ አደ ናይታስነ እስራኤለ አሳ ኡባስ ሀይሳዳ ያጋዳ ኦዳ፤ ጎዳይ ኪትዳይስ ሀይሳ፤ 3 እስራኤለ አሳፐ ኦንካ ቦር ዎይኮ ማራዘ ዎይኮ ኮለ ጉታን ዎይኮ ጉታፐ ጋፃን ሹክድ፥ 4 ጎዳስ እሞታ ኦꬅድ እማናዉ ጌሻ ዱንካንያ ፐንገ ጎዳ ስን ኤሆና እፅኮ፥ እ ሄ ሱꬃን ኦይሸቴስ። ሄ ኡራይ ሱꬁ ጉስዳ ግሾ ባ አሳ ግዶፈ ኩረቶ። 5 ሄሳ ግሾ፥ እስራኤለ አሳይ ያርሾ መሄ ጮ ደንባን ሹከይሳ አግድ፥ ጎዳ ስንꬃን ጌሻ ዱንካንያ ፐንገን ደእያ ካህንያኮ ኤሆ። ካህነይ ሄሳ ኤክድ፥ ጎዳስ እስፈተꬃ ያርሾ ኦꬅድ ሹኮ። 6 ካህነይ ጌሻ ዱንካንያ ፐንገን ደእያ ያርሾ በሳ ቦላ ሄ ሱꬃ ዉርፆ። ሞꬉዋ ጎዳስ ሳዎ ቶንኩ ግያ ያርሾ ኦꬅድ ፁጎ። 7 እስራኤለ አሳይ ጎዳ አግድ ካልዳ ቱና አያናታስ ዛሪድ ባንታ ያርሹዋ ያርሾፎ። ሄስ ኤንታዉነ ያና የለተꬃ ኡባስ መርና ዎጋ ግዶ።

8 “ኤንታኮ ሀይሳዳ ያጋ፤ እስራኤለ አሳፐ ግድን ዎይኮ ኤንታ ግዶን ደእያ አላጋ ቢታ አሳፐ ግድን፥ ኦንካ ፁሳ ያርሾ ዎይኮ ሀራ ያርሾ ሺሽያ ዎደ፥ 9 ጎዳስ ያርሻናዉ ጌሻ ዱንካንያ ፐንገ ኤሆና እፅኮ፥ ሄ ኡራይ ባ አሳ ግዶፈ ኩረቶ።

10 “እስራኤለ አሳፐ ዎይኮ ኤንታ ግዶን ደእያ አላጋ ቢታ አሳፐ ኦንካ ሱꬁ ሚኮ፥ ሄ ሱꬃ ምያ ኡራ ቦላ ታ ዞኮ ዛራና፤ ታኒ ሄ ኡራ አሳ ግዶፈ ኩራና። 11 አይስ ጊኮ አሾ ማእዳ ኡባ ደኦይ እያ ሱꬃ ግዶን ደኤስ፤ ሱꬅ ደኦይ እያ ግዶን ደእያ ግሾ ናጋራ አቶ ጊሴስ። ህንተ ናጋራ አቶተꬃስ ሱꬁ ያርሻና መላ ህንተዉ እማስ። 12 ታኒ እስራኤለ አሳኮ፥ ህንተፈ ዎይኮ ህንተ ግዶን ደእያ አላጋ ቢታ አሳፐ ኦንካ ሱꬁ ሞፖ ያግዳይ ሄሳ ግሾሳ።

13 “እስራኤለ አሳፐ ዎይኮ ኤንታ ግዶን ደእያ አላጋ ቢታ አሳፐ ኦንካ ሜተትያ ዶአ ዎይኮ ካፎ ሻንካትድ ዎꬍኮ፥ እያ ሱꬃ ሳአን ጉስድ ቢታ ካሞ። 14 አይስ ጊኮ አሾ ማእዳ ኡባ ደኦይ እያ ሱꬃ ግዶና። አሾ ማእዳ መተꬃታ ኡባ ደኦይ እያ ሱꬃ ግዶን ደእያ ግሾ፥ ሱꬁ ሞፕተ፤ ቃስ ምያ ኦንካ ባ አሳ ግዶፈ ኩረቶ ያጋዳ እስራኤለ አሳስ ኦዳስ።

15 “እስራኤለ አሳ ግድን ዎይኮ ኤንታ ግዶን ደእያ አላጋ ቢታ አሳ ግድን፥ ኦንካ ባዉታ ዎይኮ ዶእ ዎꬍዳባ ሚኮ፥ ባ ማኡዋ ሜጮ፤ ባ አሳተꬃ ሜጨቶ፤ ያትድ ኦማርስ ጋካናዉ ቱና ግዴስ። ሄሳፈ ጉየ፥ እ ጌሽ ግዳና። 16 ባ ማኡዋ ሜጮና እፅኮ፥ ባ አሳተꬃ ሜጨቶና አግኮ፥ እ ባ ናጋራ ባዉ ቶኬስ።”

<- ሌወታ ማፃፋ 16ሌወታ ማፃፋ 18 ->