1 ጎዳይ ሙሰኮ ሀይሳዳ ያግስ፤ 2 ጎጋ ሀርገይ ኦይክዳ ኡራይ ጌይያ ጋላስ ኦꬃናዉ ኮሽያ ዎጋይ ሀይሳ። ሄ ኡራ ካህንያኮ ኤሀናዉ ኮሼስ። 3 ካህነይ ጉታፐ ጋፃ ከይድ እያ ሀርግያ በኦ። እ በእያ ዎደ ጎጋ ሀርገይ ኡራ አሳተꬃፈ ꬋይዳባ ግድኮ፥ 4 ካህነይ ናምኡ ቱና ግዶና ካፎታ፥ ዝጋ ምꬃ ቃንፆ፥ ዞኦ ቃጭናነ ህሶጰ ቦንጮ ሄ ሀርግያፈ ጌይያ ኡራ ግሾ ኤሀና መላ ኪቶ። 5 ሄሳፈ ጉየ፥ ካህነይ ናምኡ ካፎታፐ እሱዋ ፑልቶፈ ዱቅድ ከረን ቆልዳ ሃꬃ ቦላ ሹካና መላ ኪቶ። 6 ሀንኮ ካፉዋ ዞኦ ቃጭናራነ ህሶጰ ቦንጮራ ኤክድ፥ ከረን ደእያ ፑልቶ ሃꬃ ቦላ ሹክዳ ካፉዋ ሱꬃን ናቆ። 7 ሄ ሱꬃ፥ ሄ ጎጋ ሀርግያፈ ጌይያ ኡራ ቦላ ላፑን ቶሆ ዉርፆ፤ ሄ ኡራይ ቱና ግዶናይሳ ኤርሶ፤ ፓፃ ደእያ ካፉዋ ደምባ የዶ።

8 ሄ ሀርግያፈ ጌይያ ኡራይ ባ ማኡዋ ሜጮ፤ ባ አሳተꬃ ቦላ ደእያ እክሰ ኡባ ሜደቶ፤ ባ አሳተꬃ ሜጨቶ። ሄሳፈ ጉየ፥ እ ጌይድ ጉታ ገሎ፥ ሽን ባ ዱንካንያ ግዶ ገሎና ላፑን ጋላስ ካረን ጋምኦ። 9 ላፑንꬃ ጋላስ ባ ሁጵያ፥ ቡቻ፥ ዴሙዋነ ባ አሳተꬃ ቦላ ደእያ ሀራ እክሰ ኡባ ሜደቶ፤ ቃስ ባ ማኡዋ ሜጮ፤ ባ አሳተꬃካ ሜጨቶ፤ ሄሳፈ ጉየ፥ እ ጌሽ ግዳና።

10 ሆስፑንꬃ ጋላሳን ቦረይ ባይና ናምኡ ኡርገ ዶርሳታነ እስ ላይꬅ ግድዳ እስ ማጫ ዶርሰ ኤሆ። ቃስ ካꬃ ያርሾስ ዛይተራ ሙኑቀትዳ ሄꬑ ክሎ ግራመ ሎኦ ꬊለነ እስ ልትሮ ዛይተፐ ስኮ ኤሆ። 11 እያ ጌሽያ ካህነይ ኡራነ እ ኤህዳ ያርሾታራ እስፈ ጌሻ ዱንካንያ ፐንገን ጎዳ ስንꬃን ሺሾ።

12 ካህነይ ናምኡ ዶርሳ ኡርገታፐ እሱዋ ኤክድ፥ እስ ልትሮስ ስኮ ዛይተራ እስፈ ናቆ ያርሾ ኦꬅድ ሺሾ፤ ሄ ሺቅዳ ያርሹዋ ዩሾ ያርሾ ኦꬅድ ጎዳ ስንꬃን ሺሾ። 13 ያትድ፥ እ ሄ ዶርሳ ኡርግያ ናጋራ ያርሾነ ፁሳ ያርሾ ሹክያ ጌሻ በሳን ሹኮ። ናጋራ ያርሹዋ መላ ናቆ ያርሾይካ ካህንያስ እመቴስ፤ እካ ኡባፈ አꬍዳ ጌሽ። 14 ካህነይ ናቆ ያርሹዋ ሱꬃፈ ጉꬅ ኤክድ፥ ሄ ጌይያ ኡራስ ኡሻቻ ባጋ ሀይꬃ፥ ኡሻቻ ኩሽያ ዎጋ ብራꬍያነ ኡሻቻ ቶሁዋ ዎጋ ብራꬍያ ትዮ። 15 ሄሳፈ ጉየ፥ ካህነይ ዛይትያፐ ጉꬃራ ኤክድ፥ ባ ሀድርሳ ኩሽያ ቃቃን ትጎ።

16 ሄ ሀድርሳ ኩሽያ ቃቃን ደእያ ዛይትያ ባ ኡሻቻ ኩሸ ብራꬍያ የድ የድ ኤክድ፥ ጎዳ ስንꬃን ላፑን ቶሆ ዉርፆ። 17 ያትድ፥ ባ ኩሽያ ቃቃን ደእያ ዛይትያፐ ኤክድ፥ ጌይያ ኡራስ ኡሻቻ ሀይꬃ፥ ኡሻቻ ኩሽያ ዎጋ ብራꬍያነ ኡሻቻ ቶሁዋ ዎጋ ብራꬍያ ካሰ ናቆ ያርሹዋ ሱꬃ ትይዳ በሳን ትዮ። 18 ቃስ ባ ኩሽያ ቃቃን አትዳ ዛይትያ ካህነይ ጌይያ ኡራ ሁጰን ጉሶ፤ ያትድ ጎዳ ስንꬃን ሄ ኡራ ናጋራ አቶ ያግሶ።

19 ሄሳፈ ጉየ ካህነይ ጌይያ ኡራ ናጋራ አቶተꬃስ ሺቅዳ ያርሹዋ ያርሼስ፤ ካልድ ቃስ ፁሳ ያርሾስ ሺቅዳ መህያ ሹኬስ። 20 ካህነይ ፁሳ ያርሹዋ ካꬃ ያርሹዋራ እስፈ ያርሾ በሳን ዎꬅድ ፁጌስ፤ ያትድ ኡራ ናጋራ አቶ ያግሴስ፤ ሄ ኡራይ ጌዬስ።

21 ሽን ኡራይ ሄሳ ኡባ ኤሀናዉ ዳንዳኦና ማንቆ ግድኮ፥ ጎዳ ስንꬃን እያ ናጋራ አቶተꬃስ ዩሻናዉ ናቆ ያርሾስ እስ ዶርሳ ኡርገ ኤሆ። ካꬃ ያርሾስ ዛይተራ ሙኑቀትዳ እስ ክሎ ግራመ ሎኦ ꬊለነ እስ ልትሮ ዛይተፐ ስኩዋ ኤሆ። 22 ባዉ ዳንዳኤትዳ መላ ናምኡ ሆለ ዎይኮ ናምኡ ኩራቾ እሱዋ ናጋራ ያርሾስ፥ እሱዋ ፁሳ ያርሾስ ኤሆ።

23 ሆስፑንꬃ ጋላስ ባ ቱናተꬃፈ ጌይያ ኡራይ ጌሻ ዱንካንያ ፐንገን ጎዳ ስን ኤህድ ካህንያስ እሞ። 24 ካህነይ ናቆ ያርሾስ ይዳ ዶርሳ ኡርግያነ ዛይትያ ኤክድ፥ ዩሾ ያርሾ ኦꬅድ ጎዳ ስንꬃን ዩሾ። 25 ናቆ ያርሾስ ይዳ ዶርሳ ኡርግያ ሹኮ፤ ሄ ኡርግያ ሱꬃፈ ጉꬃራ ኤክድ፥ ሀ ጌይያ ኡራ ኡሻቻ ሀይꬃ፥ ኡሻቻ ኩሽያ ዎጋ ብራꬍያነ ኡሻቻ ቶሁዋ ዎጋ ብራꬍያ ትዮ። 26 ካህነይ ዛይትያፐ ጉꬃራ ባ ሀድርሳ ኩሽያ ቃቃን ትጎ። 27 ሀድርሳ ኩሽያ ቃቃን ደእያ ዛይትያፐ ኡሻቻ ኩሽያ ብራꬍያ የድ ኤክድ፥ ጎዳ ስንꬃን ላፑን ቶሆ ዉርፆ። 28 ካህነይ ባ ኩሽያ ቃቃን ደእያ ዛይትያፐ ጉꬃራ ኤክድ፥ ጌይያ ኡራስ ኡሻቻ ሀይꬃ፥ ኡሻቻ ኩሽያ ዎጋ ብራꬍያነ ኡሻቻ ቶሁዋ ዎጋ ብራꬍያ ካሰ ናቆ ያርሾ ሱꬃ ትይዳ በሳን ትዮ። 29 ጎዳ ስንꬃን ኡራ ናጋራ አቶተꬃስ ካህነይ ባ ኩሸን አትዳ ዛይትያ ጌይያ ኡራ ሁጰን ትጎ። 30 ሄሳፈ ጉየ፥ ጌይያ ኡራይ ባዉ ዳንዳኤትዳይሳ መላ ሆለ ዎይኮ ኩራቾ ኤሆ። 31 እሱዋ ናጋራ ያርሾስ ናምአንꬁዋ ፁሳ ያርሾስ ካꬃ ያርሹዋራ እስፈ ሺሾ። ካህነይ ጌይያ ኡራ ናጋራ ጎዳ ስንꬃን እያ ናጋራ አቶ ያግሶ። 32 ባ አሳተꬃ ቦላ ደእያ ጎጋ ሀርግያፈ ጌያናዉ ማንቆተꬅ ድግዳ ኡራስ ደእያ ዎጋይ ሀይሳ።

33 ጎዳይ ሙሰኮነ አሮናኮ ሀይሳዳ ያግስ፤ 34 “ታኒ ህንተዉ እምያ ካናነ ቢታ ህንተ ገልያ ዎደ ሄ ቢታን ደእያ ህንተ ኬꬃፈ እሱዋን ታኒ ቡቃ የድያ ዎደ፥ 35 ሄ ኡራይ ካህንያኮ ብድ፥ ‘ታ ኬꬃ ቦላ ቡቃ ዳንያባይ ደኤስ’ ያግድ ኦዶ። 36 ካህነይ ሶ ገልድ ቡቃ ቆሙዋ በአናፐ ካሰትድ፥ ሶን ደእያባይ ኡባይ ቱና ጌተቶና መላ ሶን ደእያባ ኡባ ካረ ከሳና መላ ኪቶ፤ ሄሳፈ ጉየ፥ ካህነይ በአናዉ ሶ ገሎ። 37 እ ገልድ በእያ ዎደ ቡቃይ ጎዳ ቦላ ጭሊሎ ዎይኮ ዞኦ ማላ በስኮነ ቃስ ጎዳ ምድ ኦላይድ ግዶ ገልኮ፥ 38 ካህነይ ካረ ከይድ፥ ኬꬃ ላፑን ጋላስ ጋካናዉ ጎርዶ። 39 ላፑንꬃ ጋላሳን ካህነይ ሄ ኬꬃ ዛሪድ ፄልያ ዎደ ሄ ቡቃይ ኬꬃ ጎዳ ቦላ ዳልግኮ፥ 40 ቡቃይ ደእያ ሹቻ ኡባ ጎዳፐ ሾድድ፥ ካታማፐ ጋፃ ከስድ ቱና በሳን የጋና መላ ኪቶ። 41 ካልድ ጎዳ ሜሽዳ ኡርቃ ሶ ባጋራ ቦክድ፥ ዩሽ አꬅድ ቆቆፋና መላ ኦꬆ፤ ያትድ ሄ ኡርቃ ካታማፐ ጋፃን ደእያ ቱና በሳን የጎ። 42 ሄሳፈ ጉየ፥ ሄ ሾደትዳ ሹቻታ በሳን ሀራ ሹቻታ ዎꬆ፤ ሀራ ኡርቃን ኬꬃ ሜሾ።

43 “ሹቻይ ሾደትን፥ ኡርቃይ ቆቆፈትን፥ ሀራ ኡርቃ ሜሽ ስምን፥ ቡቃይ ኬꬃ ግዶን ዛር በንትኮ፥ 44 ካህነይ ሄሳ በኦ። እ በእያ ዎደ ቡቃይ ሄ ኬꬃ ግዶን ዳልግኮ፥ ሄስ አሳፐ አሰ ኦይክያ ቡቃ ሀርገ ግድያ ግሾ ሄ ካꬃይ ቱና። 45 ሄሳ ግሾ ሄ ኬꬃ፥ እያ ሹቻ፥ እያ ምꬃነ እ ሜሸትዳ ኡርቃ ኡባ ላልድ ካታማፐ ጋፃ ኤፍድ፥ ቱና በሳን የጎ። 46 ሄ ኬꬃይ ጎርዳን ጋምእያ ዎደ እያ ግዶ ገልያ ኦንካ ኦማርስ ጋካናዉ ቱና። 47 ሄ ኬꬃን አቅያ ዎይኮ ካꬅ ምያ ኡራይ ባ ማኡዋ ሜጮ።

48 “ሽን ካህነይ ይድ ፄልያ ዎደ ኬꬃይ ሜሸትድ ስምን፥ ዛሪድ ዳልጎና እፅኮ፥ ቡቃይ ꬋይዳ ግሾ፥ ሄ ኬꬃይ ቱና ግዶናይሳ ካህነይ ኤርሶ። 49 ኬꬃ ጌሻናዉ ናምኡ ካፎታ፥ ዝጋ ምꬃ ቃንፆ፥ ዞኦ ቃጭናነ ህሶጰ ቦንጮ ኤሆ። 50 ካፎታፐ እሱዋ ፑልቶፈ ዱቅድ ከረን ቆልዳ ሃꬃን ሹኮ። 51 ሄሳፈ ጉየ፥ ዝጋ፥ ህሶጰ ቦንጩዋ፥ ዞኦ ቃጭናነ ፓፃ ደእያ ካፉዋ ኤክድ፥ ከረን ደእያ ሹከትዳ ካፉዋ ሱꬃንነ ፑልቶ ሃꬃን የድ ኤክድ ላፑን ቶሆ ሄ ኬꬃ ዉርፆ። 52 ያትድ፥ ካህነይ ሄ ኬꬃ ካፉዋ ሱꬃን፥ ፑልቶ ሃꬃን፥ ፓፃ ደእያ ካፉዋን፥ ዝጋ ምꬃን፥ ህሶጰ ቦንጩዋንነ ዞኦ ቃጭናን ጌሾ። 53 ፓፃ ደእያ ካፉዋ ካታማፐ ጋፃ የዶ። ሄሳዳ ኦꬅድ፥ ኬꬃ ጌሽያ ዎጋ ፖሌስ፤ ኬꬃይ ጌሽ ግዴስ።

54 “ዱማ ዱማ ጎጋ ሀርጌስነ ጎኦ ሀርጌስ እመትዳ ዎጋይ ሀይሳ። 55 ማኦ ቦላ ዎይኮ ኬꬃ ቦላ ከይያ ቡቃ ሀርገ ግድን፥ 56 ክፃ ግድን፥ መርኮ ግድን፥ እራለ ግድን፥ 57 እስባይ ቱና ግደይሳነ ቱና ግዶናይሳ ኤርስያ ዎጋይ ሀይሳ።”

<- ሌወታ ማፃፋ 13ሌወታ ማፃፋ 15 ->