ኤርምያሳ ዘለልሳ ጋꬃ ቆፋ ኤርምያሳ ምላልሳይ ክ.የ.ስ. 600 ላይꬃ ሄራን የሩሳላመ ላለተꬃነ አሳ ድኤተꬃ ጋሶን ግንፆን ጊግዳ አዛኖ ሚላልሳታ ኦይክስ። ሀ ማፃፋ ዳሮ ባጋይ ዬሆባነ ዘለልሳባ ኦድኮካ ፆሳን አማነተꬃባነ ኡፋይሳን ዱሳባ ኦድያ ክፍለት ደኦሶና። ሀ ግንፆታ አይሁደ አሳይ ባንታ ቢታ ቦላ ጋክዳ ꬋዩዋ ሀሳያናዉ ላይꬃን ላይꬃን ፆማን አዛኖ ጎይኖ ዎጋታ ፖልያ ጋላሳታን ጎኤቶሶና። ማፃፋ አይፈ ቆፋታ የሩሳላመ ዋይያ (1:1-22) ፆሳ ሀንቆነ የሩሳላመ ፕርደተꬅ (2:1-22) ፆሳ ደርያስ ኡፋይስ ደኤስ (3:1-66) የሩሳላመይ ዝነ፥ ሀችነ ዎንቶ (4:1-22) ማሮታ ዎሳ (5:1-22)
1የሩሳላመ ዋየ 1 ካሰ አስ ኩምዳ ካታምያ ሀእ ዋናዳ አስ ባይና በሲ ግዳዴ? ካሰ ካዎተꬃታ ግዶን ግታ ግድዳራ ሀእ ዋናዳ አምኦ ግዳዴ? ካታማታ ግዶን ካዎ ግድዳራ ሀእ ዋናዳ አይለ ግዳዴ? 2 ቃማ ይባታ ዬሆ ዬካሸ አቃዉሱ፤ አፉꬅ እ አይፈ ካረራ ዱገ ዎꬌስ። ካሰ እዮ ዶሰይሳታፐ ሀእ እዮ ምንꬅያ እሶይካ ባዋ። እ ላገት እዮ አꬅድ እምዶሶና፤ እዉ ሞርከ ግድዶሶና። 3 ይሁድ ናቀታዳ፤ አይለታዳ ድኤታሱ፤ ሀእ ካዎተꬃታ ግዶን ደአዉሱ፤ ሽን ሸምፖ በሲ ደማቡኩ። እያ መቶታዳ ደእሽን፥ የደይሳት እዮ ደምዶሶና። 4 ላይꬃ ባኣለ ቦንቻናዉ ያ አስ ባይና ግሾ፥ ፅዮነ ኦገት ዬኮሶና። እ ድርሳ ፐንገት ባይሳትዶሶና፤ እ ካህነት ኦሎሶና። ያን ደእያ ጌላኦ ናይት ኡንኤትዶሶና፤ እያካ ኡንኤታዳ ዬካዉሱ። 5 እ ሞርከት እዉ ጎዳ ግድዶሶና፤ ኤንታዉ እንጀትን ደእዶሶና። እ፥ ናጋራ ጋሶን ጎዳይ እዮ ኡንኤꬅስ፤ እ ናይት ሞርከታን ድኤትድ ብዶሶና። 6 ፅዮን ቦንቾይ ኢፐ ቃረትስ፤ እ፥ ሀላቃትካ ምያ በሲ ꬋይዳ ጋራዳ ሀንዶሶና፤ ኤንቲ ዎልቃ ꬋይድ ባንታና የደይሳታ ስንꬃፈ ባቃትዶሶና። 7 የሩሳላመይ ባ መቱዋነ ባ ኡንአ ጋላሳን፥ በን ባ ቦንቾ ሻሉዋ ሀሳያዉሱ። እ፥ አሳይ ሞርከታ ኩሸን አꬍድ እመትዳ ዎደ፥ እዮ ማድያ እሶይካ በንትቤና። እ ሞርከት እዮ ፄልድ፥ እ ꬋዩዋን ሚጭዶሶና። 8 የሩሳላመይ ግታ ናጋራ ኦꬅዳ ግሾ ቱናሱ፤ እዮ ቦንችዳ ኡባይ እ ካሉዋ በእዳ ግሾ ካꬌስ፤ እያ ኦላሸ ጉየ ስማሱ። 9 ቱናተꬅ እ አፍላ ቦላ በንትስ፤ ስንꬃፈ ባ ቦላ ያናባ ቆፓቡኩ። እ ኩንደꬃይ ዳጋንꬅያባ ግድስ፤ እዮ ምንꬅያ ኦንካ ባዋ። እያ፥ “አቤት ጎዳዉ፥ ታ ኡንኤተꬃ በአ! ታ ሞርከት ታና ፆንዶሶና” ያጋሱ። 10 ሞርከት እ ቦንቾ ሻሉዋ ቦንቅዶሶና፤ ካሰ ነ ማባራ ግዶ ገሎና መላ፥ ኔኒ ድግዳ አሳት፥ እ ኬꬃ ገልሽን በአሱ። 11 እ አሳት ኮሻትድ ካꬅ ደማናዉ ኦሎሶና፤ ኤንቲ ደኦን ዳናዉ ባንታ ሻሉዋ ካꬃን ላሞሶና። የሩሳላመይ ሀይሳዳ ያጋሱ፤ አቤት ጎዳዉ፥ ታና ፄላ፤ ታ ካዉሻተꬃ በአ! 12 ህንተኖ፥ ሀይሳራ አይሳቶ፥ ሀይስ ህንተዉ አይኮካ ዳነኔ? አነ በእተ፤ አኬክተ፤ ባ ኤፅያ ሀንቆ ጋላሳን፥ ፆሳይ ታ ቦላ ኤህዳ መቱዋ መላ መቶይ ደኢ? 13 ቦላፈ ታማ ዱገ የድስ፤ ሄ ታማይ ታ መቀꬃ ግዶ ገልስ። ታ ቶሆይ ፅሄን ኦይከትስ፤ ታና ጉየ ዛርስ፤ ታና ጋላስ ኡባ ላባንꬅድ የግ አግስ። 14 ታ ኦꬅዳ ናጋራ ኡባ ሺሽ ቃችድ፥ ቃምባራዳ ታ ጋናን ዎꬅስ፤ ያትድ ታ ዎልቃ ዉርስስ። ታ ኤቀታናዉ ዳንዳኦና አሳስ፥ ታና አꬅድ እሚስ። 15 ጎዳይ ታ ግዶን ደእያ ዎልቃማ ኦላንቾታ ኡባ ድግስ። ታ ያላጋታ ꬋይሳናዉ ዎደ ቃችስ፤ ዎይነ የይሳዳ፥ ጎዳይ ይሁዳ ጌላኦታ የꬍስ። 16 ታኒ ዬካሸ ታ አፉꬃ ጉሰይ ሄሳሳ፤ ታና ምንይነ ካትስያ ኦንካ ባዋ፤ ሞርከይ ጎብን፥ ታ ናይት ኡንኤትዶሶና።17 ፅዮነይ ባ ኩሽያ ምጫሱ፤
ሽን እዮ ምንꬅያ ኦንካ ባዋ። እ ዩሹዋን ደኤይሳት እዮ ሞርካናዳ ጎዳይ ኦꬅስ። የሩሳላመይ ኤንታ ግዶን ቱና ግዳሱ። 18 እያ ሀይሳዳ ያጋሱ፤ “ጎዳይ ፅሎ፤ እያ ኪተቶና እፅዳይ ታና። ህንተኖ፥ አሳቶ ኡባይ ስእተ፤ ታ መቱዋካ በእተ፤ ታ ፓንꬃትነ ታ ጌላኦት ድኤትዶሶና። 19 ታ ላገታ ፄጋስ፤ ሽን ኤንቲ ታና ጭምዶሶና፤ ካህነትነ ጭማት ባንታ ሸምፑዋ አሻናዉ፥ ካꬅ ኮይሸ ካታማ ግዶን ሀይቅዶሶና። 20 አቤት ጎዳዉ፥ ታ ዋይያ በአ! ታ ጋርሳይ ዳጋምስ። ታኒ ዳሮ ማካልዳ ግሾ፥ ታ ዎዛናይ መቅስ፤ ካረን ማሽ ዉርሴስ፤ ሶን ሀይቆይ ደኤስ። 21 አሳይ ታ ዘለልሳ ስእዶሶና፤ ሽን ታና ምንꬅያ እስ አስካ ባዋ። ታ ሞርከት ታ መቱዋ ስእዶሶና፤ ነ ታ ቦላ ኦꬅዳባን ኡፋይትዶሶና። ኤንቲ ታዳ ሀናና መላ፥ ኤንታ ቦላ ነ አዋጅዳ ጋላሳ ኤሀ! 22 ኤንታ ኢታተꬃ ኡባይ ነ ስን ጋኮ፤ ታ ናጋራ ግሾ ታና ሴርዳይሳዳ ኤንታካ ሴራ፤
17 ፅዮነይ ባ ኩሽያ ምጫሱ፤