ዮናሳ ማፃፋ

ጋꬃ ቆፋ

ዮናሳ ማፃፋይ፥ ሀራ ናበ ማፃፋታፐ ዱማ ማፃፋ። ሀ ማፃፋይ፥ ዮናስ ፆሳ ኪታ እፃስ ግዳይሳነ ጉየፐ ኪተትዳ ታርከ ኦዴስፐ አትሽን፥ ስንꬃራ ያናባ ኦደና።

ዮናስ እስራኤለስ ማታ ሞርከ ግድዳ አሶረ ዋና ካታማ ናናወ ኪታ ኤክድ ባና መላ ፆሲ ኪትስ። ሽን ዮናስ ሄ ደርያስ ማርካትድ ስምን፥ ፆሳይ ሄ ካታማ ማራናይሳ ኤርያ ግሾ፥ ባናዉ ኮይቤና። ሀኖሽን፥ ዱማ ዱማ ሀኖታታፐ ጉየ፥ ዎልቃን ያ ብስ። ዮናስ ኪተትድ ስምን ናናወ አሳይ ባንታ ናጋራ ፓፅድ ጎዳኮ ስምዶሶና። ጎዳይ ኤንታ ማርስ።

ሀ ማፃፋን፥ ዉርሰꬃ ሸምፑዋን ፆሳይ ዮናሳ ታማርሳናዉ ናገቶናባ ኦꬅድ ታማርስዳይሳ በሴስ። ዉርሰꬃን፥ ጎዳስ ባ መተꬃ ቦላ ግታ ማት ደኤይሳ፥ እ ማርያ ፆሲ ግደይሳነ ሀር አቶሽን፥ ባ አሳ ሞርከታካ ማርያ ፆሲ ግደይሳ ቆንጭሴስ።

ማፃፋ አይፈ ቆፋታ

ዮናስ ፆሳፈ ባቃታናዉ ደንድስ (1:1-7)

ዮናሳ ዎሳ (2:1-10)

ናናወ አሳይ ፆሳኮ ስሙዋ (3:1-10)

ፆሳ ማሮታነ ዮናሳ ይሉዋ (4:1-11)

1 ጎዳ ቃላይ አማተ ናኣ፥ ዮናሳስ ሀይሳዳ ያግድ ቆንጭስ። 2 “ሄ ካታማ አሳ ኢታተꬃይ ታ ስን ጋክዳ ግሾ፥ ደንዳዳ ህን ዎልቃማ ካታማ ናናወ ባዳ ሳባካ” ያግስ። 3 ሽን ዮናስ ጎዳ ስንꬃፈ በትድ ታርሰሳ ቢታ ባናዉ ከይስ። እ፥ ዮጰ ካታማ ዎꬍድ ታርሰሳ ብያ ማርካበ ደምስ። ጎዳ ስንꬃፈ በታናዉ ኮይድ ታርሰሳ ባናዉ ኮሽያ ሚሸ ጭግድ ማርካብያን ገልስ። 4 ሽን ጎዳይ አባ ቦላ ዎልቃማ ጫርኩዋ ደንꬅስ። አባን ዎልቃማ ሆበይ ዎልቃምዳ ግሾ ማርካብያ መቃናዉ ጋካሱ። 5 ያትን ማርካብያ ኦሳንቾት ያይዶሶና። እሶይ እሶይ ባ ፆሳኮ ባ ፆሳኮ ዋስስ። ቃስ ማርካበይ ካዉያና መላ ግዶን ደእያ ጫና ደንꬅድ አባን የግዶሶና። ሽን ዮናስ ማርካብያስ ግዶ ገልድ ዎልቃማ ꬍስኮ ꬍስክስ። 6 ማርካብያ ላገይስ እያኮ ሺቅድ፥ “ሀይሳ መላ ሳተን ዋና ꬍስካይ? ደንዳ ነ ፆሳ ዎሳ! ኦን ኤር እ ኑስ ቃትድ ኑና አሻነኮነ” ያግስ።

7 ማርካብያ ኦሳንቾት እሶይ እሱዋኮ፥ “ሃ ዪተ፥ ሀ ኢታባይ ኑና ኦደ ጋሶን ጋክዳኮ ኤራናዉ ሳማ የጋና” ያግዶሶና። ሳማ የግን፥ ሳማይ ዮናሳ ቦላ ዎꬍስ። 8 ኤንቲ ዮናሳኮ፥ “ሀ ኢታባይ ኦደ ጋሶን ኑ ቦላ ጋክዳኮ አነ ኑስ ኦዳ። ነ ኦሶይ አይቤ? አዉፐ ያዲ? ነ ቢታይ አዌ? ኔኒ ኦደ ባጌ?” ያግድ ኦይችዶሶና። 9 ዮናስ ዛሪድ፥ “ታኒ እብራወ አስ፤ አባነ ቢታ መꬍዳ ጎዳ፥ ሳሎ ፆሳ ጎይንያ አስ” ያግስ። 10 እ ኤንታዉ ኮይሮትድ ኦድዳይሳዳ እ ጎዳ ስንꬃፈ በተይሳ ኤርዶሶና። ሄሳ ግሾ፥ ኤንቲ ያይድ፥ “ላ አይባ ፓላባ ኦꬃድ” ያግዶሶና። 11 አባ ሆበይ ካሰይሳፈ ሃ ዳርዳ ግሾ አሳት ዮናሳ፥ “ኑስ አባይ ስእ ጋና መላ ነና ኑኒ ዋትኖ?” ያግድ ኦይችዶሶና። 12 እካ፥ “ሀ ዎልቃማ ሆበይ ህንተ ቦላ ደንድዳይ ታ ጋሶን ግደይሳ ታኒ ኤራይስ። ሄሳ ግሾ፥ ታና ኤክድ አባን የግተ። ያትኮ አባይ ህንተዉ ስእ ጋና” ያግስ። 13 ሽን ማርካብያ ኦሳንቾት ማርካብያ ጋፃ ከሳናዉ ግታ ፕꬍዶሶና። ሽን አባ ሆበይ ሃ ዳርዳ ግሾ ጋፃ ከሳናዉ ዳንዳእቦኮና። 14 ሄሳ ግሾ፥ ኤንቲ ጎዳኮ፥ “አቤት ጎዳዉ፥ ሃ ኡራ ሸምፑዋ ግሾ፥ ኔኒ ኑና ꬋይሶናዳነ ሀ ጌሻ ሱꬃ አጩዋ ኔኒ ኑፐ አቾናዳ ኑኒ ነና ምንꬅድ ዎሶስ” ያግድ ጎዳ ዎስዶሶና። 15 ሄሳፈ ጉየ፥ ዮናሳ ደንꬅድ፥ አባን የግዶሶና። አባ ሆባይካ ስእ ግስ። 16 ያትን አሳት ጎዳስ ዳሮ ያይድ ያርሾ ያርሽዶሶና፤ እያዉ ቃንግዶሶና። 17 ዮናሳ ምታና መላ እስ ግታ ሞሎ ጎዳይ ጊግስስ። ዮናስ ሄ ሞሉዋ ኡሎን ሄꬑ ጋላስነ ሄꬑ ቃማ ጋምእስ።

ዮናሳ ማፃፋ 2 ->