1 የሱሲ ብሸ የለቶሳፐ ቆቀ ግድድ ደእያ እስ አድያ በእስ። 2 እያ ታማረት፥ “አስታማርያዉ፥ ሀ አደይ ቆቀ ግድድ የለታና መላ ናጋራ ኦꬅዳይ ኦኔ? እ ኦꬅደየ ዎይኮ እያ የልዳይሳት ኦꬅዶና?” ያግድ ኦይችዶሶና።

3 የሱሲ፥ “ፆሳ ኦሶይ እያ ቦላ ቆንጫና መላፐ አትሽን፥ እ ዎይኮ እያ የልዳይሳት ናጋራ ኦꬅዳ ግሾ ግደና። 4 ሳእ ጋላስ ደእሽን ታና ኪትዳይሳ ኦሱዋ ኑ ኦꬃናዉ በሴስ። ኦንካ ኦꬃናዉ ዳንዳኦና ቃማይ ዬስ። 5 ታኒ አላምያን ደአሸ አላምያስ ፖኦ” ያግስ። [a]

6 የሱሲ ሄሳ ግድ ሳአን ጩትስ። ባ ጩቻን ጉꬃ ቢታ ላኮꬅድ ሄ ኡርቃን ቆቀ አድያ አይፍያ ትይስ። 7 ያትድ፥ “ባዳ ሳልሆመ (ሳልሆመ ጉሳይ ኪተትዳይሳ ጉሱ) ጌተትያ ተቀትዳ ሃꬃን ነ አይፍያ ሜጨታ” ያግስ። ሄሳ ግሾ፥ አደይ ብድ ባ አይፍያ ሜጨትድ ፄልሸ ስምስ።

8 አድያ ሾሮትነ አደይ ካሰ ዎስሽን በእዳ አሳይ፥ “ሀይስ ኡትድ ዎስያ አድያ ግደነዬ?” ያግዶሶና።

9 እስ እስ አሳይ፥ “ሀይስ እያ” ያግዶሶና።

ሀራት ቃስ፥ “አካይ፥ ሀይስ እያ ዳኔስፐ አትሽን፥ እያ ግደና” ያግዶሶና።

ሽን አደይ፥ “ኤ፥ ታና” ያግስ።

10 ኤንቲ እያኮ፥ “ያትን ነ አይፈይ ዋንድ ፄልዴ?” ያግድ ኦይችዶሶና።

11 እ ዛሪድ፥ “የሱሳ ጌተትያ አደይ ጉꬃ ኡርቃ ላኮꬅድ ታ አይፍያ ትይድ፥ ‘ሳልሆመ ባዳ ነ አይፍያ ሜጨታ’ ያግን፥ ታኒ ባዳ ሜጨታዳ ፄላ አጋስ” ያግስ።

12 ኤንቲ እያኮ፥ “እ አዉን ደኢ?” ያግድ ኦይችዶሶና።

አደይ፥ “ታኒ ኤርከ” ያግስ። 13 ኤንቲ ካሰ ቆቀ፥ ሽን ሀእ ፄልዳ አድያ ፋርሳወታኮ ኤፍዶሶና። 14 የሱሲ ኡርቃ ላኮꬅድ አድያ አይፍያ ፓꬅዳ ጋላሳይ ሳምባታ ጋላስ። 15 ሄሳ ግሾ፥ አደይ ዋንድ ፄልዳኮ ፋርሳወት እያ ዛር ኦይችዶሶና። አደይ ኤንታኮ፥ “እ ታ አይፍያን ጉꬃ ኡርቃ ትይስ። ታ አይፍያ ሜጨታዳ ሀእ ፄላይስ” ያግስ።

16 ፋርሳወተፐ እሶት እሶት፥ “ሀይሳ ኦꬅዳ አደይ ሳምባታ ህግያ ናጎና ግሾ ፆሳ ማታፐ ይቤና” ያግዶሶና።

ሽን ሀራት፥ “ናጋራንቾ አስ ሀይሳ መላ ማላታ ዋት ኦꬃናዉ ዳንዳኢ?” ያግድ ባንታ ግዶን ሻከትዶሶና።

17 ሄሳ ግሾ፥ ፋርሳወት አድያኮ፥ “እ ነ አይፍያ ፄልስዳ ግሾ ነ እያባ ዎይጋይ?” ያግዶሶና።

አደይ፥ “እ ናበ” ያግስ።

18 አይሁደ ሀላቃት፥ እያ አይዉነ አዋ ፄግድ ኦይቻና ጋካናዉ፥ አደይ ካሰ ቆቀ ግድዳይሳነ ሀእ እ ፄለይሳ አማንቦኮና። 19 ኤንቲ እያ አይዉነ እያ አዋኮ፥ “ህንተ ‘ቆቀ ግድድ የለትስ’ ግያ ህንተ ናአይ ሀይሴ? ያትን፥ ሀእ ዋንድ ፄልዴ?” ያግድ ኦይችዶሶና።

20 እያ የልዳይሳት፥ “ሀይስ ኑ ናኣ ግድዳይሳነ ቆቀ ግድድ እ የለትዳይሳ ኑ ኤሮስ። 21 ሽን ሀእ እ ዋንድ ፄልዳኮ ቃስ እያ አይፍያ ኦን ፓꬅዳኮ ኑኒ ኤሮኮ። እያ ኦይችተ። እ ባና ኤርዳ አስ ግድያ ግሾ ባባ ኦዳናዉ ዳንዳኤስ” ያግዶሶና። 22 እያ የልዳይሳት ሄሳ ግዳይ አይሁደታስ ያይዳ ግሾሳ። አይስ ጊኮ፥ አይሁደት፥ የሱሲ እ ክርስቶሳ ያግድ ማርካትያ አስ ደእኮ ሄ ኡራ አይሁደ ዎሳ ኬꬃፈ ህላናዉ ኮይሮትድ ዞረ ቃችዶሶና። 23 እያ የልዳይሳት፥ “እ ባና ኤርዳ አስ፤ እያ ኦይችተ” ያግዳይ ሄሳሳ።

24 ሄሳ ግሾ፥ ቆቀ ግድድ የለትዳ አድያ ኤንቲ ዛር ፄግድ፥ “ቱማ ኦዳናዉ ፆሳን ጫቃ፤ ሀ አደይ ናጋራንቾ ግደይሳ ኑ ኤሮስ” ያግዶሶና።

25 አደይ ዛሪድ፥ “እ ናጋራንቾ ግደይሳ፥ ታ ኤርከ። ታኒ ቆቀ ግደይሳነ ሀእ ፄለይሳ ሄ እስባ ኤራይስ” ያግስ።

26 ኤንቲ ዛሪድ፥ “እ ነዉ አይ ኦꬅዴ? እ ነ አይፍያ ዋት ፓꬅዴ?” ያግዶሶና።

27 እ ኤንታኮ፥ “ታኒ ህንተዉ ኦዳስ፥ ሽን ስእቤከታ። አይስ ዛር ስአናዉ ኮዬቲ? ህንተካ እያ ታማረ ግዳናዉ ኮዬትዬ?” ያግስ።

28 ኤንቲ እያ ጫይድ፥ “ነ ሄ ኡራ ታማረ ግዳ፤ ኑኒ ሙሰ ታማረ። 29 ፆሳይ ሙሰስ ኦድዳይሳ ኑኒ ኤሮስ፥ ሽን ሀር አቶሽን ሀ ኡራይ እ አዉፐ ይዳኮካ ኑ ኤሮኮ” ያግዶሶና።

30 አደይ ኤንታኮ፥ “እ አዉፐ ይዳኮ ህንተ ኤሮናይስ ማላልስያባ፥ ሽን እ ታ አይፍያ ፓꬅስ። 31 ፆሳ ቦንቸይሳነ እ ኮያባ ኦꬅያ ኡራ ፆሳይ ስኤስፐ አትሽን፥ ናጋራንቾታ ስኤና። 32 ሳሎይ ሳእ መቶሳፐ ቆቀ ግድድ የለትዳ አሳ አይፈ ፓꬅዳይ ኦንካ ባዋ። 33 ሀ አደይ ፆሳፈ ኪተትቦናባ ግድያኮ እስባካ ኦꬃናዉ ዳንዳኤና” ያግስ።

34 ኤንቲ ዛሪድ፥ “ኔኒ ናጋራን የለታዳ ድጭዳይስ ኑና ታማርሳናዉ ኮያይ?” ያግዶሶና። እያ አይሁደ ዎሳ ኬꬃፈ ህልዶሶና።

35 የሱሲ ኤንቲ አድያ ከስዳይሳ ስእዳ ዎደ እያ ደምድ፥ “አሳ ናኣ አማናይ?” ያግድ ኦይችስ።

36 አደይ የሱሳኮ፥ “ጎዳዉ፥ ታኒ እያ አማናና መላ እ ኦኔ? ታዉ ኦዳርኪ?” ያግስ።

37 የሱሲ አድያኮ፥ “ኔኒ እያ በአዳሳ፤ ሀ ኔራ ኦደተይስ እያ” ያግስ።

38 አደይ ዛሪድ፥ “ጎዳዉ፥ አማናይስ” ያግድ የሱሳስ ጎይንስ።

39 የሱሲ፥ “ቆቀት ፄላና መላነ ፄለይሳት ቆቃና መላ ታኒ ፕርዳናዉ ሀ አላምያ ያስ” ያግስ።

40 እያራ ደእያ ጉꬃ ፋርሳወት ሄሳ ስእድ፥ “ኑ ቆቀዬ?” ያግድ ኦይችዶሶና።

41 የሱሲ፥ “ህንተ ቆቀ ግድያኮ ህንተዉ ናጋራ ግደና። ሽን ሀእ ህንተ ፄሎስ ግያ ግሾ ህንተ፥ ህንተ ናጋራን ደኤታ” ያግስ።

<- ዮሃንሳ ዎንገላ 8ዮሃንሳ ዎንገላ 10 ->