1 ሄሳፈ ጉየ፥ የሱሲ ፅብራዶሳ አባ ማታን ባ ታማረታስ ዛር ቆንጭስ። እ ኤንታዉ ሀይሳፈ ካልድ ደእያ ሀኖታን ቆንጭስ። 2 ስሞን ጰፅሮስ፥ መንተ ጌተትያ ቶማስ፥ ቃና ጋልላፐ ይዳ ናትናኤል፥ ዛብድዮሳ ናይትነ የሱሳ ታማረታፐ ሀራ ናምአት እስፈ ደኦሶና።

3 ስሞን ጰፅሮስ ኤንታኮ፥ “ታኒ ሞሎ ኦይካናዉ ባይስ” ያግስ። [a]

ኤንቲ፥ “ኑካ ኔራ ባና” ያግድ፥ ዎጎሉዋ ግዶ ገልዶሶና። ሽን ኤንቲ ሄ ቃማን አይብ ሞሎካ ኦይክቦኮና።

4 ዎንታ ጉራ ፃልቀይ ዶላናፐ ስን፥ የሱሲ አባ ጋፃን ኤቅስ፥ ሽን እያ ታማረት የሱሳ ግድዳይሳ ኤርቦኮና። 5 የሱሲ ኤንታኮ፥ “ታ ላገቶ፥ ሞሎ ኦይክቤከቲ?” ያግስ።

ኤንቲ ዛሪድ፥ “አይኮካ ኦይክቦኮ” ያግዶሶና።

6 እ ዛሪድ፥ “ህንተ ግትያ ዎጎሉዋፐ ኡሻቻ ባጋራ የግተ፤ ጉꬃ ሞሎ ህንተ ኦይካና” ያግስ። ሄሳ ግሾ፥ ግትያ ኡሻቻ ባጋራ የግዶሶና። ሞሎይ ዳርዳ ግሾ ጎች ከሳናዉ ፆነትዶሶና። [b]

7 የሱሲ ዶስያ ታማረይ ጰፅሮሳኮ፥ “ሀይስ ጎዳ!” ያግስ። ስሞን ጰፅሮስ እ ጎዳ ግዳይሳ ስእዳ ዎደ፥ ካሎ ደእያ ግሾ፥ ባ ማኡዋ ማእድ አባ ግዶ ጉፕ ገልስ። 8 ሽን ዎጎሉዋን አትዳ ሀንኮ ታማረት ሞሎይ ኩምዳ ግትያ ጎችድ፥ አባፈ ጋፃ ከይዶሶና። ኤንቲ አባፈ ናምኡ ፄቱ ዋꬋ መላ ሃኮሶና። 9 ኤንቲ አባፈ ጋፃ ከይዳ ዎደ፥ ፂፋ ቦንቆን ሞሎይ ደኤይሳነ ኡይꬅ በእዶሶና።

10 የሱሲ ኤንታኮ፥ “ሀእ ህንተ ኦይክዳ ሞሉዋፐ ጉꬃራ ሀምተ” ያግስ።

11 ስሞን ጰፅሮስ ዎጎሉዋን ገልድ፥ ፄታነ እሻታማነ ሄꬑ ዎጋ ሞሎት ኩምዳ ግትያ ጎችድ አባፈ ጋፃ ከስስ። ሞሎይ ሄሳ መላ ዳሮ ግድን ግተይ ዳከትቤና።

12 የሱሲ ኤንታኮ፥ “ሃ ይድ ሚተ” ያግስ። እ ጎዳ ግደይሳ ኤንቲ ኤርዳ ግሾ፥ እያ ታማረታፐ እሶይካ፥ “ኔኒ ኦኔ?” ግድ እያ ኦይቻናዉ ምንዳይ ባዋ። 13 የሱሲ ይድ፥ ኡይꬃ ኤክድ ኤንታዉ እሚስ፤ ሞሉዋካ ሄሳዳ እሚስ።

14 የሱሲ ሀይቆፐ ደንድድ ባ ታማረታስ ቆንጭሽን ሀይስ ሄꬓንꬆ።

15 ኤንቲ ምዳፐ ጉየ፥ የሱሲ ስሞን ጰፅሮሳኮ፥ “ዮና[c] ናአዉ ስሞና፥ ታና ሀይሳታፐ አꬃዳ ዶሳይ?” ያግስ።

ስሞን ጰፅሮስ፥ “ኤ ጎዳዉ፥ ታኒ ነና ዶሰይሳ ነ ኤራሳ” ያግስ።

የሱሲ እያኮ፥ “ታ ዶርሳ ማራታ ሄማ” ያግስ።

16 የሱሲ ቃስካ፥ “ዮና ናአዉ ስሞና፥ ታና ዶሳይ?” ያግስ።

ስሞን ጰፅሮስ፥ “ኤ ጎዳዉ፥ ታኒ ነና ዶሰይሳ ነ ኤራሳ” ያግስ።

የሱሲ፥ “ታ ዶርሳታ ሄማ” ያግስ።

17 የሱሲ ሄꬓንꬆ፥ “ዮና ናአዉ ስሞና፥ ታና ዶሳይ?” ያግስ።

የሱሲ ሄꬓንꬆ ስሞን ጰፅሮሳኮ፥ “ታና ዶሳይ?” ያግድ ኦይችዳ ግሾ፥ ጰፅሮስ አዛንድ፥ “ጎዳዉ፥ ኔኒ ኡባባ ኤራሳ፤ ታኒ ነና ዶሰይሳ ነ ኤራሳ” ያግስ።

የሱሲ፥ “ታ ዶርሳታ ሄማ። 18 ታኒ ነዉ ቱማ ኦዳይስ፤ ኔኒ ናአተꬃን ደእያ ዎደ፥ ነርካ ዳንጨታዳ፥ ነ ኮይዳ ሶ ባሳ። ሽን ነ ጭምዳ ዎደ ነ ኩሽያ ምጫ በሳና። ሀር ዳንጭሳና፤ ነ ዶሶና ሶ ኤፋና” ያግስ። 19 የሱሲ ሄሳ ጰፅሮስ አይ መላ ሀይቆ ሀይቅድ፥ ፆሳ ቦንችሳኔኮ ኤርሳናዉ ግስ። ሄሳ ግዳፐ ጉየ፥ የሱሲ ጰፅሮሳኮ፥ “ታና ካላ” ያግስ።

20 ጰፅሮስ ጉየ ስሚድ፥ የሱሲ ዶስያ ታማረይ ባፐ ጉየራ የይሳ በእስ። ሄ ታማረይ፥ ካሆ ምያ በሳን የሱሳኮ ሺቅድ፥ “ጎዳዉ፥ ነና አꬅድ እማናይ ኦኔ?” ግዳይሳ። [d] 21 ጰፅሮስ ሄ ታማርያ በእድ፥ “ጎዳዉ፥ ሀ አደይ ቃስ ዋናኔ?” ያግድ የሱሳ ኦይችስ።

22 የሱሲ እያኮ፥ “ታኒ ያና ጋካናዉ እ ዳና መላ ታኒ ኮይኮ፥ ሄስ ነና አይ መትዴ? ኔኒ ታና ካላ” ያግስ።

23 ሄሳ ግሾ፥ ሄ ታማረይ ሀይቀና ግያ ኦዳይ እሻታ ኡባ ጋክስ። ሽን የሱሲ፥ “ታኒ ያና ጋካናዉ፥ እ ዳና መላ ታኒ ኮይኮ ነና አይ መትዴ?” ያግስፐ አትሽን፥ “ሀይቀና” ግቤና።

24 ሀ ኦዳባ ማርካትዳይነ ሀይሳ ፃፍዳይ ሄ ታማርያ። እያ ማርካተꬃይ ቱማ ግደይሳ ኑኒ ኤሮስ።

25 የሱሲ ኦꬅዳ ሀራ ዳሮባይ ደኤስ። ታ ቆፕን፥ ኡባባይ ሁጰን ሁጰን ፃፈትዳኮ፥ ፃፈትያ ማፃፋታስ ኩመꬃ አላመይ ዎꬃናዉ ግዳናባ ዳነና።

<- ዮሃንሳ ዎንገላ 20