1 ባብሎነ ካዎይ ናቡካዳናፆር፥ እያ ኦላንቾት ኡባይነ እ ሃርያ ካዎተꬃታን ደእያ አሳ ኡባይ፥ የሩሳላመነ የሩሳላመ ዩሹዋን ደእያ ካታማታ ኡባ ኦልያ ዎደ፥ ሀ ቃላይ ጎዳፐ ኤርምያሳኮ ይስ፦ 2 ጎዳይ እስራኤለ ፆሳይ ሀይሳዳ ያግስ፤ “ባዳ ይሁዳ ካዋ ሰደቅያሳኮ ሀይሳዳ ያጋ፦ ‘ታኒ ሀ ካታማ ባብሎነ ካዋ ኩሸን አꬃዳ እማና፤ እ ካታማ ታማን ፁጋና። 3 ኔኒ እያ ኩሸፐ ከሳ ኤካካ፤ ኔኒ ኦይከታና፤ እያዉ አꬋዳ እመታና። ኔኒ ነ አይፈን ባብሎነ ካዋ በአና፤ እካ ኔራ ኦደታና። ኔኒ ባብሎነ ቢታ ባና’ ያጌስ ጎዳይ።

4 “ግዶሽን፥ ይሁዳ ካዋዉ ሰደቅያሳ፥ ጎዳይ ግያባ ስአ። ኔኒ ኦላን ሀይቃካ። 5 ነ ሳሮ ሀይቃና። ኔፐ ካሰ ደእዳ ካዎታ ቦንቹዋስ፥ ነ ማይዛታስ እፃነ ጩይስዳይሳዳ፥ አሳይ ነ ቦንቹዋስ እፃነ ጩይሳና። ዎ ኑ ካዋዉ፥ ያግድ ነዉ ዬካና። ታኒ ጎዳይ ሀይሳ ኦዳይስ” ያጌስ።

6 ሄሳፈ ጉየ፥ ናበይ ኤርምያስ ሀ ትንብትያ ይሁዳ ካዋ ሰደቅያሳስ የሩሳላመን ኦድስ። 7 ሄ ዎደ ባብሎነ ኦላንቾት የሩሳላመ ካታማነ ይሁዳን አትዳ ላክሶነ አዜቃ ካታማታ ኦልዶሶና። ይሁዳን አትዳ ግምበትዳ ካታማት ኤንታ ፃላላ።

8 ካዎይ ሰደቅያስ አይለታ ላአ ከስያ አዋጁዋ አዋጃናዉ የሩሳላመን ደእያ አሳ ኡባራ ጫቅዳፐ ጉየ፥ ጎዳ ቃላይ ኤርምያሳኮ ሀይሳዳ ያግድ ይስ፦ 9 ሄ አዋጆይ፥ እስ እስ እብራወ አስ አደነ ማጫ አይለ አይለተꬃፈ ላአ ከሶ። ኦንካ አይሁደ አስ ግድዳ ባ እሻ አይለ ኦꬆፎ። 10 ሄሳ ግሾ፥ አሳይነ ሀላቃት ኡባይ ጫቅዳ ጫቁዋን ባንታ አደነ ማጫ አይለታ አይለተꬃፈ ላአ ከሳናዉነ ዛሪድ አይለተꬃን ሃሮና አጋናዉ ጊግድ ኤንታ አይለተꬃፈ ላአ ከስዶሶና። 11 ሽን ኤንቲ ባንታ ቆፋ ላምድ፥ አይለተꬃፈ ላአ ከስዳ ባንታ አደነ ማጫ አይለታ ዛሪድ ሃርዶሶና።

12 ሄሳፈ ጉየ፥ ጎዳ ቃላይ ኤርምያሳኮ ያግስ። 13 ጎዳይ፥ እስራኤለ ፆሳይ ሀይሳዳ ያጌስ፦ “ታኒ ህንተ ማይዛታ ግብፀፈ፥ አይለተꬃ ቢታፈ ከስዳ ዎደ ኤንታራ ሀይሳዳ ያጋዳ ጫቃስ። 14 ሄ ጫቁዋ ማራን፥ ‘እብራወ አይለይ ደእያ አሰ ኡባይ፥ አይለታ ኡሱፑን ላይꬅ ኦስስድ፥ ላፑንꬃ ላይꬃን አይለተꬃፈ ከስድ የድተ’ ያጋዳ ኪታስ። ሽን ህንተ ማይዛት ታ ኦድያባ ስኦና እፅዶሶና፤ ታዉ ኪተትቦኮና። 15 ህንተካ ማታ ዎደፐ ካሰ ህንተ ናጋራፐ ስሚድ፥ አይለታ ላአ ከሳናዉ አዋጅደታ፤ ታ ስንꬃን ሱረባ ኦꬅደታ። ቃስ ሄሳ ኦꬃናዉ ታ ስንꬃን፥ ታ ሱንꬃይ ፄገትያ ታ ኬꬃን ጫቅደታ። 16 ሽን ህንተ፥ ህንተ ቆፋ ላምድ፥ ታ ሱንꬃ ቱንስደታ። ኤንቲ ኮይዳ በሳ ባና መላ ላአ ከስዳ አደነ ማጫ አይለታ ዛሪድ ሃርደታ።”

17 ሄሳ ግሾ፥ ጎዳይ፥ “ህንተ ታዉ ኪተቶና እፅድ፥ ህንተ እሻ ዎይኮ ህንተ ሾሩዋ አይለተꬃፈ ላአ ከስያ አዋጁዋ አዋጅበከታ። ህንተ ቦላ ኦል፥ ቦሽነ ኮሽ ከያና መላ ታ አዋጃይስ። ታ ህንተና ሳአ ቦላ ደእያ ካዎተꬃታስ ዳጋማ ኦꬃና። 18 ታ ጫቁዋ መንꬅዳ አሳ፥ ታ ስንꬃን ጫቁዋ ናጎና እፅዳ አሳ፥ ሹክድ፥ ናምኡ በሳን ሻክድ፥ እያ ግዶራ አꬍዳ ማራ መላ ታ ኤንታ ኦꬃና። 19 ሄ አሳይ ይሁዳ ሀላቃታ፥ የሩሳላመ ሀላቃታ፥ ቢታ አይሰይሳታ፥ ካህነታነ ናምኡ በሳን ሻክዳ ማራ አሹዋ ግዶራ አꬍዳ አሳ ኡባ። 20 ታ ኤንታ፥ ኤንታ ሞርከታ ኩሸንነ ኤንታ ዎꬋናዉ ኮይያ አሳ ኩሸን አꬃዳ እማና፤ ኤንታ አሀይ ሳሎ ካፎታስነ ሳአ ዶአታስ ካꬅ ግዳና።

21 “ታኒ ይሁዳ ካዋ ሰደቅያሳነ እያ ሀላቃታ፥ ኤንታ ሞርከታ ኩሸን፥ ኤንታ ዎꬋናዉ ኮየይሳታ ኩሸንነ ህንተና ኦለይሳ አግዳ ባብሎነ ኦላንቾታ ኩሸን አꬃዳ እማና። 22 ታኒ ባብሎነ ኦላንቾታ ኪትን፤ ኤንቲ ሀ ካታማ ስማና። ኤንቲ ሀ ካታማ ኦላና፥ ድአናነ ታማን ፁጋና። ይሁዳን ደእያ ካታማታ አስ ዶና ባይሳ በሲ ኦꬃና” ያጌስ ጎዳይ።

<- ኤርምያሳ ማፃፋ 33ኤርምያሳ ማፃፋ 35 ->