1 ሄ ላይꬅ፥ ይሁዳ ካዎይ ሰደቅያስ ካዎቶ ዶምዳ ኦይዳንꬆ ላይꬃን፥ እቻሻንꬆ አጌናን ጋባኦና አደይ፥ አዙራ ናአይ ናበይ ሀናን፥ ፆሳ ኬꬃን ካህነታነ አሳ ኡባ ስንꬃን ታኮ ሀይሳዳ ያግስ፦ 2 “ኡባፈ ዎልቃማ ጎዳይ፥ እስራኤለ ፆሳይ፥ ‘ባብሎነ ካዋ ቃምባራ መንꬃና። 3 ባብሎነ ካዎይ፥ ናቡካዳናፆር፥ ባብሎነ ኤፍዳ ፆሳ ኬꬃ ሚሸ ኡባ ታ ናምኡ ላይꬃ ግዶን ዛራዳ ሀ በሳ ኤሀና። 4 እዮአቄማ ናኣ፥ ይሁዳ ካዋ ዮአክና፥ ይሁዳፐ ድኤትድ ባብሎነ ብዳ አሳ ኡባ ዛራዳ ሀ በሳ ኤሀና። ታኒ ባብሎነ ካዋ ቃምባራ መንꬃና’ ” ያጌስ ጎዳይ።

5 ፆሳ ኬꬃ ግዶን ኤቅዳ ካህነታነ አሳ ኡባ ስንꬃን ናበይ ኤርምያስ፥ ናብያ ሀናናኮ ሀይሳዳ ያግስ። 6 “አምንእ! ጎዳይ ነ ግዳይሳዳ ኦꬆ። ፆሳ ኬꬃ ሚሸታነ ድኤትድ ብዳ አሳ ኡባ ባብሎነፐ ዛሪድ፥ ነ ኦድያ ቃላ ጎዳይ ፖሎ! 7 ግዶሽን፥ ታ ነዉነ ነ አሳስ ኦደይሳ ስአ። 8 ኔፐነ ታፐ ካሰ ደእዳ ናበት፥ ኦላባ፥ ꬋዮባነ ጋዶባ ግታ ካዎተꬃታ ቦላ ትንብተ ኦድዶሶና። 9 ሽን፥ ሳሮባ ኦድያ ናበይ፥ ቱማ ፆሲ ኪትዳ ናበ ግደይስ ኤረተይ፥ እ ኦድያ ትንብተይ ፖለትያ ዎደና” ያግስ።

10 ሄሳፈ ጉየ፥ ናበይ ሀናን፥ ናብያ ኤርምያሳ ጋናፈ ቃምባራ ኤክድ መንꬅስ። 11 ሀናን አሳ ኡባ ስንꬃን፥ “ታኒ ናምኡ ላይꬃ ግዶን ባብሎነ ካዋ ናቡካዳናፆራ ቃምባራ ካዎተꬃታ ኡባ ጋናፈ ደንꬃዳ ሀይሳዳ መንꬃና” ያጌስ ጎዳይ። ሄሳፈ ጉየ፥ ኤርምያስ ደንድድ፥ ባ ኦግያ ብስ።

12 ናበይ ሀናን፥ ናብያ ኤርምያሳ ጋናፈ መንꬅዳ ጉꬃ ዎደፐ ጉየ፥ ጎዳ ቃላይ ናብያ ኤርምያሳኮ ሀይሳዳ ያግሸ ይስ። 13 ባዳ ሀናናስ ኦዳ፤ “ኔኒ ምꬃ ቃምባራ መንꬃዳሳ፤ ሽን ኔኒ እያ ግሾ ብራታ ቃምባራ መꬋና። 14 ባብሎነ ካዋ ናቡካዳናፆራስ ሃረታና መላ ታኒ ሀ ካዎተꬃታ ኡባ ጋናን ብራታ ቃምባራ ዎꬃና፤ ኤንትካ እያዉ ሃረታና። ታኒ ሀር አቶሽን፥ ባዞ ዶአትካ እያዉ ሃረታና መላ ኦꬃና” ያጌስ ኡባፈ ዎልቃማ ጎዳይ፥ እስራኤለ ፆሳይ።

15 ሄሳፈ ጉየ፥ ናበይ ኤርምያስ፥ ናብያ ሀናናኮ ሀይሳዳ ያግስ፦ “ሀናንያ፥ ስአ! ጎዳይ ነና ኪትቤና፤ ሽን ኔኒ ሀ አሳይ ዎርዶባን አማነታና መላ ኦꬃዳሳ። 16 ሄሳ ግሾ፥ ጎዳይ፥ ‘ታ ነና ሳአ ቦላፈ ድጋና። ኔኒ ሀ አሳይ ታ ቦላ ማካላና መላ ኦꬅዳ ግሾ ነ ሀ ላይꬅ ሀይቃና’ ” ያግስ።

17 ሄ ላይꬅ ላፑንꬃ አጌናን ናበይ ሀናን ሀይቅስ።

<- ኤርምያሳ ማፃፋ 27ኤርምያሳ ማፃፋ 29 ->