1 ታ እሻቶ፥ ህንተ ኑ ቦንቾ ጎዳ የሱስ ክርስቶሳ አማንያባ ግድኮ፥ አሳ ሶምኦ ፄልድ አሰ ቦንቾፍተ። 2 ሌምሶስ፥ ዎርቃ ምግዶ አꬅድ፥ ሎኦ ማኦ ማእዳ ዱረ አስ ህንተ ሺቁዋ ይስ። ቃስ ጩርቃ ማኦ ማእዳ ማንቆ አስካ ይስ። 3 ሎኦ ማኦ ማእዳ አድያ ህንተ አꬅድ ቦንችድ፥ “ነ ሀይሳን ሎእያ ኦይድያን ኡታ” ግድ፥ ቃስ ማንቆ አድያ፥ “ነ ያን ኤቃ ዎይኮ ሀይሳን ታ ቶሁዋ ማታን ሳአን ኡታ” ጌታ። 4 ያትን፥ ህንተ፥ ህንተ ግዶን ሻከተꬅ መይሳታነ ኢታ ቆፋራ ደእያ ዳይናታ መላ ግደከትዬ?

5 ታ ሲቆ እሻቶ፥ ስእተ። አማኖን ዱረ ግዳና መላነ ባና ሲቀይሳታስ እማና ግዳ ሳሎ ካዎተꬃ ላታና መላ ሀ ሳአን ደእያ ማንቆታ ፆሳይ ዶርበነዬ? 6 ሽን ህንተ ማንቆታ ቶቸታ። ህንተና ኡንኤይሳት ዱረታ ግዶኮናዬ? ህንተና ዳይና ስን ጎቸይሳት ኤንታ ግዶኮናዬ? 7 ህንተ ፄገትዳ ሎኦ ጎዳ ሱንꬃ ጫየይሳት ኤንታ ግዶኮናዬ?

8 ሽን ጌሻ ማፃፋን፥ “አሰ ኡባ ነና ነ ዶሰይሳዳ ዶሳ” ጌተትድ ፃፈትዳ ፆሳ ካዎተꬃ ህግያ ህንተ ፖልኮ ሎኦ ኦꬄታ።[a] 9 ሽን ህንተ አሳ ሶምኦ ፄልድ ቦንችኮ፥ ናጋራ ኦꬄታ ቃስ ህገይ ህንተና ህገ መንꬅዳ አሳዳ ፕርዳና። 10 ኦንካ ህገ ኡባፈ እሱዋ መንꬅድ፥ አትዳ ኡባ ናግኮ ኡባ መንꬅዳዳ ታይበቴስ። 11 “ላሞፋ” ግዳ ጎዳይ፥ ቃስ “ዎꬎፓ” ግስ። ሽን ኔኒ ላሞና አጋዳ ዎꬍዳባ ግድኮ፥ ህግያ መንꬃዳሳ።[b] 12 አይለተꬃፈ ከስያ ህግያ ስንꬃን ፕርዳ ኤካናዉ ደእያ አሳዳ ኦደትተነ ኦꬅተ። 13 አሰ ማሮና ኦናካ ፆሳይ ማሮና ፕርዳና። ሽን ማሮተꬃይ ፕርዳ ፆኔስ።

14 ታ እሻቶ፥ ህንተፈ እስ አስ ታዉ አማኖይ ደኤስ ግድ፥ ባ አማኑዋ ኦሶን በሶና እፅኮ እያ አይ ማዳኔ? እያ አማኖይ እያ አሻናዉ ዳንዳኢ? 15 ሌምሶስ እስ እሻይ ዎይኮ እስ ምችያ ካሎትኮነ ኤንታዉ ምያባይ ꬋይኮ፥ 16 ህንተፈ እስ አስ ኤንታኮ፥ “ሳሮ ቢተ! ታማ ካይተ! ካልድ ሚተ!” ግድ፥ ኮሽያባ ኤንታዉ እሞና እፅኮ ኤንታ አይ ማዲ? 17 ሄሳ ግሾ፥ ኦሶይ ባይና አማኖይ ባርካ ሀይቅዳይሳ።

18 ሽን እስ አስ፥ “ነዉ አማኖይ ደኤስ፤ ቃስ ታዉ ኦሶይ ደኤስ። ኔኒ ነ አማኑዋ ነ ኦሱዋፐ ሻካዳ ታና በሳ፤ ታካ ታ አማኑዋ ታ ኦሱዋን ነና በሳና” ጋና። 19 ኔኒ፥ እስ ፆሳይ ደኤይሳ አማናሳ፤ ሄስ ሎኦ። ቱና አያናትካ አማኖሶና፤ ያሻን ኮኮሮሶና። 20 ነኖ ኤያዉ! አማኖይ ኦሶፐ ሻከትድ ማዶናይሳ ኤራናዉ ኮያይ? 21 ኑ አዋ አብራሃመይ፥ ባ ናኣ ይሳቃ ያርሾ በሳ ቦላ ዎꬅዳ ዎደ ባ ኦሱዋን ፅልቤኔ?[c] 22 እያ አማኖይነ እያ ኦሶይ እስፈ ኦꬅዳይሳ በእኪ? እያ አማኖይ እያ ኦሱዋን ፖለትስ። 23 ጌሻ ማፃፋይ፥ “አብራሃመይ ፆሳ አማንስ። ፆሳይ ሄሳ እያዉ ፅሎተꬅ ኦꬅድ ታይብስ” ግዳይስ ፖለትስ። ቃስ እ ፆሳ ዳቦ ጌተትድ ፄገትስ። [d] 24 አስ አማኖ ፃላላን ግዶናሽን፥ ኦሶን ፅለይሳ በኣሳ።

25 ሄሳዳካ፥ ላይምያ ራኣባ እስራኤለፐ ኪተትዳይሳታ ሞካዳ ሀራ ኦገራ ኤንታ ሞይዝዳ ዎደ ባ ኦሱዋን ፅላቤኬ?[e]

26 ሸምፖይ ሻከትዳ አሳተꬃይ ሀይቆ ግደይሳዳ፥ ኦሶይ ሻከትዳ አማኖይካ ሀይቅዳይሳ።

<- ያይቆባ ኪታ 1ያይቆባ ኪታ 3 ->