1 ሄኮ፥ ጎዳይ ቢታ ላላናነ ባይሳ ከሳና፤ እ፥ ቢታ ꬋይስድ እያን ደእያ አሳ ላላና። 2 አስ ኡባይ እስኖ ግዳና፤ ካህነይ አሳራ እስኖ ግዳና፤ አይለይ ጎዳራ እስኖ ግዳና፤ ጋꬍንድያ ጎዳተራ እስኖ ግዳና፤ ሻመይስ ባይዘይሳራ እስኖ ግዳና፤ ታልኤ እመይስ ታልኤ ኤከይሳራ እስኖ ግዳና፤ አጮ አቸይስ አጮ ጭገይሳራ እስኖ ግዳና። 3 ቢታ ኡባይ ቦንቀትድ ባይሳ ግዳና፤ ጎዳይ ሀ ቃላ ኦድስ።

4 ቢታይ መላና፥ እያ አጫይ ሹላና፤ አላመይ አርጋጫና፥ ዳቡራና፤ ቢታን ደእያ ዎልቃማ አሳይ ዳቡራና። 5 ቢታይ ባናን ደእያ አሳ ጋሶን ቱንስ። ኤንቲ ህግያስ ኪተትቦኮና፤ ዎጋ ናግቦኮና፤ መርና ጫቁዋ መንꬅዶሶና። 6 ሄሳ ግሾ፥ ባደꬃይ ቢታ ሜስ፤ አሳይ ባንታ ናጋራ ጋሶን ፕርደታናዉ በሴስ። ሳአን ደእያ አሳይ ፁገትዶሶና፤ ጉꬃ አስ አትስ። 7 ዎይነይ ፃጶራ መልስ፥ ማልአንቶ ዎይነይ ዉርስ፤ ካሰ ኡፋይትያ ኡባይ አዛንስ። 8 ካራቦ ባቆይ አትስ፤ የꬃ ዋሶይ ስእ ግስ፤ ኡፋይስያ ዲꬃ ዱርሳይ ኤቅስ። 9 ህዛፐ የፅሸ ዎይነ ኡሻ ኡዮኮና፤ ኡሻይካ ኤንታዉ ጫሞ ግዳና። 10 ላለትዳ ካታማይ ባይሳ ግዳና፤ ኦንካ ገሎናዳ ኬꬃ ኡባይ ጎርደትስ። 11 ዎይነ ኡሽ ꬋይዳ ግሾ አሳይ ዳባባን ዋሴስ፤ ኡፋይስ አዛኖን ላመትስ፤ ኡፋይስያባይ ሳአፐ ꬋይስ። 12 ካታማይ ላለትስ፤ ካታማ ፐንገት መቀረትዶሶና። 13 ሻማሆ ቴራ ቆቆፈይሳዳ፥ ዎይነ ማፅ ስምን፥ ፖሽለይ አተይሳዳ፥ ቢታ ቦላ ደእያ ካዎተꬃታ ቦላ ሄሳዳ ሀናና።

14 ኤንቲ ባንታ ቃላ ꬎቁ ኦꬅድ፥ ኡፋይሳን የፆሶና፤ ዉሎሀ ባጋራ ደእያ ኡባይ ጎዳ ግታተꬃ ኦዳና። 15 ሄሳ ግሾ፥ ዶሎሀ ባጋራ ደኤይሳት፥ ጎዳስ ቦንቾ እማና፤ ዩሾይ አባን ተቀትዳ ቢታት ጎዳስ፥ እስራኤለ ፆሳስ ቦንቾ እማና። 16 ኑኒ፥ “ፅሉዋስ ቦንቾይ ግዶ” ግያ ማዝሙረ ቢታ ጋፃፐ ስእዳ።

ሽን፥ “ታኒ ግልቃስ! ታኒ ላፋስ! ታና አየ! አꬅ እመይስ አꬅድ እሜስ፤ ካደይሳት ጉጅድ አꬅድ እሞሶና” ያጋስ። 17 ህንተኖ፥ ሳአን ደእያ አሳዉ፥ ዳጋም አፎይነ ፅሄይ ህንተና ናጌስ። 18 ዳጋንꬅያ ግርሳፈ ባቃተይስ ኦላን ኩንዳና፤ ኦላፈ ከየይሳ ፅሄይ ኦይካና፤ ሳሎ ማስኮተት ዶየትዶሶና፤ ቢታ ባሶት ቃፅዶሶና። 19 ቢት ዛእስ፤ ቢት ሻከትስ፤ ቢት ቃፅስ። 20 ቢት ማꬆ አሳዳ ጋንድጋሬስ፤ ጫርኮይ ሱግያ ጋባዳ ዩዬስ። ጌላታ ባላይ ዳሮ ዴፅዳ ግሾ ዛር ደንዶና መላ ኩንድስስ።

21 ሄ ጋላስ ጎዳይ ሳሎ ዎልቃታ ሳሎን፥ ሳኣ ካዎታ ሳአን ፕርዳና። 22 ኦላን ደእያ ቃሾ አሳዳ ኤንታ እስፈ ሺሻና፤ ቃሾ ኬꬃን ኤንቲ ጎርደትድ ኡታና። ዳሮ ጋላሳፐ ጉየ ኤንቲ ሴረታና። 23 ኡባፈ ዎልቃማ ጎዳይ ፅዮነ ዙማንነ የሩሳላመን ካዎታና፤ የሩሳላመ ጭማታ ስንꬃን ባ ቦንቹዋ ቆንጭሳና። ሄ ዎደ አጌናይ ꬉማና፥ አዋይ ዬላታና።

<- እሳያሳ ማፃፋ 23እሳያሳ ማፃፋ 25 ->