1 ጎዳይ ያይቆባስ ቃታና፤ እስራኤለ ዛሪድ ዶራና፤ ኤንታ፥ ኤንታ ቡዞ ቢታን ዎꬃና። በታንቾት ኤንታራ እስፋና፥ ያይቆባ ሶ አሳራ ኦይከታና። 2 ካዎተꬃት ኤንታ፥ ኤንታ ቢታ ኤሀና። እስራኤለ አሳይ ኤንታና ማጫነ አደ አይለ ኦꬅድ ጎዳ ቢታን ሃራና። ኤንቲ ባንታና ድእዳይሳታ ድአና፤ ባንታና ሃርዳይሳታ ሃራና።

3 ጎዳይ ህንተና፥ ህንተ ኡንኣፈ፥ መቱዋፐነ ህንተ ሃረትዳ ኢታ አይለተꬃፈ ሸምፕስያ ዎደ፥ 4 ህንተ ባብሎነ ካዋ ቦላ ሀይሳዳ ያግድ ቀልቅሳና። ኡንኤይስ ዋንድ አግዴ? እያ ሀንቁዋ ሱላይ ዋንድ አትዴ? 5 ጎዳይ ካዎተꬃታ ፃምኣነ ሃረይሳታ ጉምባ መንꬅስ። 6 ኤንቲ አሳ ዛው ባይና ሀንቁዋን ሾጭዶሶና፤ ባንታና ፆንዳይሳታ ቃንፆና ኡንኤꬅሸ ደእዶሶና። 7 ሽን ቢታ ኡባይ ሸምፕድ ደእስ፤ ኡፋይሳን የፅስ። 8 ሀር አቶሽን፥ ልባኖሰ ዝጋትነ ፂዳት ካዋ ኩንደꬃን ኡፋይትድ፥ “ኔኒ ካዉያዳ ኩንድዳፐ ጉየ፥ ኑና ቃንፃናዉ የይ ባዋ” ያጎሶና። 9 ኔኒ ያ ዎደ፥ ስኦለይ ነና ሞካናዉ ጊግስ፤ እ ካሰ ቢታ ካለꬅዳ አሳ ሞይትለታ፥ ነና ሳሮꬃና መላ ደንꬄስ፤ ቃስ ካሰ ካዎ ግድዳ ኡባ ኤንታ አራታፐ ደንꬅድ ኤሴስ። 10 ኤንቲ ኡባይ ሀይሳዳ ያጋና። “ሄኮ ነካ ኑዳ ዎልቃ ꬋያዳሳ፤ ኑ መላ ግዳዳሳ።” 11 ካሰ ዲꬅ ዲፅን ሳበትያ ነ ቦንቾይ ሀእ ስኦለ ገልስ። ኦላꬅ ኔኒ ዝንእያ ሂፃ፤ ጉፁነይ ኔኒ ማእያ አፍላ ግዳና ያጋና።

12 ነኖ ዎንታ ናአዉ፥ ጉራ ባካላዉ፥ ሳሎፐ ዋና ኩንዳዲ? ነኖ ካዎተꬃታ ካዉሽዳይሶ ዋና ቃንፀታዳ ሳአን ዎꬋዲ?[a] 13 ኔኒ ነ ዎዛናን፥ “ታኒ ሳሎ ከያና፤ ታ ካዎተꬃ አራታ ፆሳ ፆልንቶታፐ ቦላራ ዎꬃና፤ ታኒ ፑደሀ ባጋ ጋፃን ሺቆ ደርያ ሁጰን ኡታና [b]። 14 ታኒ ሻራት ደእያ ꬎቃ በሳፈ ቦላ አꬋና፤ ታኒ፥ ታና ኡባፈ ꬎቃ ፆሳ ዳንሳና” ያጋዳሳ። 15 ሽን ኔኒ ስኦለን፥ ህርክ ጪሞ ኦላን ዱገ የገታዳሳ።

16 ነና በእዳይሳት፥ “ቢታ ቃꬅዳይስ፥ ካዎተꬃታ ኮኮርስዳይስ፥ 17 ሳኣ ቢታ ባዞ ከስዳይስ፥ ሳአን ደእያ ካታማታ ሽር የግዳይስ፥ ባ ቃሾ አሳታ የዶና እፅዳይስ ሀይሴ?” ያግድ ትሽ ኦꬅድ ፄላና።

18 ካዎተꬃታ ካዎት ኡባይ ባ ዱፎን ዱፎን ቦንቾን ዝንአና። 19 ሽን ኔኒ እፀትዳ ታሸዳ ነ ዱፉዋፐ ጋፃ ሆለታዳሳ። ነ አሀይ ማሻን ሀይቅዳ አሀንነ ኦላን ደእያ ሹቻታኮ ዱገ ዎꬍዳይሳታ አሀን ካመትስ። ኔኒ ቶሆን የትዳ አሀ መላ ግዳዳሳ። 20 ኔኒ ነ ቢታ ꬋይስዳ ግሾነ ነ አሳ ዎꬍዳ ግሾ ኤንታራ ሞገታካ። ኢታ ሱንꬃይ ኮቻይ መርናዉ ፄገቶፎ። 21 ኤንቲ ደንድድ ቢታ ላቶና፤ ሳአ ኡባ ካታማ ፃላላ ኦꬆና መላ ኤንታ አዋታ ናጋራ ግሾ፥ እያ ናይታ ዎꬋናዉ ጊግስተ። 22 ታኒ “ኤንታ ቦላ ደንዳና፤ ኤንታ ሱንꬃ፥ ኤንታ ኮቻነ ኤንታ የለታ ባብሎነፐ ꬋይሳና። 23 ታኒ ባብሎነ ቁፃረይ ደእያ በስነ ሃꬅ ኤልያ በሲ ኦꬃና፤ ታኒ ጋዶ ፕቶን እያ ፕታና” ያጌስ ኡባፈ ዎልቃማ ጎዳይ።

24 ኡባፈ ዎልቃማ ጎዳይ ሀይሳዳ ያግድ ጫቅስ፦ “ታኒ ሀልችዳይሳዳ ሀናና፤ ታኒ ቆፕዳይሳዳ ፖለታና። 25 ታኒ አሶረ አሳ ታ ቢታን መንረꬃና፤ ታ ደርያ ቦላ እያ የꬋና። እያ ቃምባራይ ኤንታ ቦላፈ፥ እያ ቶሆይ ኤንታ ሀሽያፐ ክቻና” ያግስ። 26 ሳአ ኡባስ ቆፈትዳ ቆፋይ ሀይሳ፤ ካዎተꬃታ ኡባ ቦላ ምጨትዳ ኩሸይካ ሀይሳ። 27 ኡባፈ ዎልቃማ ጎዳይ ሀይሳ ቆፕዳ ግሾ እያ ድጋናዉ ዳንዳኤይ ኦኔ? እያ ኩሸይ ምጨትስ፤ ሄሳ ጉየ ዛራናዉ ዳንዳኤይ ኦኔ?[c]

28 ካዎይ አካዝ ሀይቅዳ ላይꬅ ኦደትዳ ቃላይ ሀይሳ:[d] 29 ህንተኖ ፍልስፄመ አሳዉ፥ ህንተና ሾጭዳ ፃምአይ መእዳ ግሾ ኡፋይቶፍተ። ሄ ሾሻ ኮቻፈ ሀሶይ ከያና፤ እያ ኮቻይ ቃስ ፆንገትያ ሾሽ ግዳና። [e] 30 ማንቆፈ ማንቆት ታ ቆሩዋን ሄመታና፤ መቶታንቾት ዎፑ ግድ ዝንአና። ሽን ታኒ ነ ኮቻ ኮሻን ዉርሳና፤ ኔፐ አትዳ ጉꬃታ ዎꬋና።

31 ነኖ ፐንግያዉ፥ ዬካ! ነኖ ካታማዉ፥ ዋሳ! ህንተኖ ፍልስፄመ አሳዉ፥ ህንተ ኡባይ ህርጋን ትልእተ! ፑደሀ ባጋፈ ጩይ ከይድ ዬስ፤ ሄ ጩጋፐ ዱፅድ ጉየ አተይ ባዋ። 32 ሄ ካዎተꬃይ ኪትዳ አሳታስ ዎይግድ ዛራኔ? ጎዳይ ፅዮነ ኬፅን፥ ቆሄትዳ አሳይ እ ግዶን ቆሰትድ አትያ በሲ ደምስ።

<- እሳያሳ ማፃፋ 13እሳያሳ ማፃፋ 15 ->