1 “እስራኤለይ ናአ ደእያ ዎደ እያ ዶስዳይ ታና፤ ታ ናኣ ግብፀፈ ፄጋስ። 2 ታኒ ኤንታ ዳርሳዳ ፄግን፥ ኤንቲ ታፐ ዳሮ ሃክድ ብዶሶና። ባኣለ ኤቃታስ ያርሾ ያርሽዶሶና፤ ኤቃ ምስለታስ እፃነ ጩይስዶሶና። 3 ኤፍሬማ አሳ ኩሽያ ኦይካዳ ሄመꬅ ታማርስዳይ ታና፥ ሽን ኤንታ ፓꬅዳይ ታና ግደይሳ ኤሮኮና። 4 ታኒ ኤንታ ቃንነ ሲቆ ዎዶሮን ጎቻስ፤ ኤንታ ሞርገፈ ቃምባራ ደንꬃዳ ሆካዳ ኤንታ ሙዛስ። 5 ኤንቲ ታኮ ስሞና እፅድ ግብፀ ቢታ ስማና፤ አሶረ ቢታ ካዎይ ኤንታ ቦላ ካዎታና። 6 ኤንታ ካታማን ማሽ ደንዳና፤ ኤንታ ካታማታ ፐንገታ መንረꬃና፤ ኤንታ ዞረታይ ላለታና። 7 ታ አሳይ ታፐ ሃካናዉ ኮይስ። ኤንቲ ፆሳኮ ዋስኮካ፥ እ ኤንታና ቦንቸና። 8 ኤፍሬም፥ ታኒ ነና ዋታዳ አጎ? እስራኤለ፥ ታኒ ነና ዋታዳ አꬃ እሞ? ታኒ ነና ዋታዳ አዳማ ካታማዳ ኦꬆ? ታኒ ነና ዋታዳ ፃቦይማ ካታማዳ ኦꬆ? ታኒ ነና ዳሮ ዶስያ ግሾ ታ ዎዛናይ ሄሳ ኤሮ ጌና። 9 ታኒ ህንተ ግዶን ደእያ ጌሻ ፆሳፈ አትሽን፥ አሰ ግድከ። ሄሳ ግሾ፥ ታኒ ታ ሱልያ ሀንቁዋ ህንተ ቦላ ኤህከ፤ ናምአንꬆ ኤፍሬማ ꬋይስከ፤ ታ ሀንቁዋራ ህንተኮ ዪከ። 10 ኤንቲ ጎዳ ካላና፤ እካ ጋሞዳ ጉዳና። እ ጉድያ ዎደ እያ ናይት ዉሎሀ ባጋፈ ኮኮርሸ ያና። 11 ግብፀፈ ካፎዳ፥ አሶረፐ ሆለዳ ፓልሸ ያና። ታኒ ኤንታ፥ ኤንታ ኬꬃን ኬꬃን ዎꬃና። ታኒ ጎዳይ ሄሳ ኦዳስ” ያግስ።

12 ኤፍሬማ አሳይ ዎርዶን፥ እስራኤለ አሳይ ጭሞን ታና ተቅዶሶና። ይሁዳ አሳይ አማንꬅያ ጌሻ ፆሳ ቦላ ፃልታምስ።

<- ሆሰ ማፃፋ 10ሆሰ ማፃፋ 12 ->