1 ሄ ዎደ ይሁድ ባ እሻታፐ ሻከትድ፥ አዱላማ ካታማን ደእያ ህራ ጌተትያ ኡራራ ዳናዉ ብስ። 2 ያን ይሁድ ሹአ ጌተትያ ካናነ ኡራ ናእዉ ማችስ። 3 እያ ይሁዳስ ቃንꬃታዳ አደ ናአ የላሱ። እ ሄ ናአ ኤራ ግድ ሱንꬅስ። 4 ቃስካ ቃንꬃታዳ አደ ናአ የላሱ። እያ ሄ ናአ ኦናና ጋዳ ሱንꬃሱ። 5 ዛራዳካ ሀራ አደ ናአ የላሱ። እያ ሄ ናኣ ሴላ ጋዳ ሱንꬃሱ። ሄ ናአይ የለትያ ዎደ ይሁድ አክዚባ ቢታና።

6 ይሁድ ባ ባይራ ናአ ኤራስ ትማሮ ጌተትያ ማቾ እሚስ። 7 ይሁዳ ባይራ ናአይ፥ ኤር፥ ጎዳ ስንꬃን ኢታ አስ ግድያ ግሾ፥ ጎዳይ እያ ዎꬍስ።

8 ይሁድ ኦናናኮ፥ “ዎጋይ ነና ኪተይሳ መላ ነ እሻ ማቸራ አቃ። ነ እሻስ ናአ የላዳ እያ ሱንꬃ ፄግሳ” ያግስ። 9 ሽን ኦናን የለታና ናይት እያባ ግዶናይሳ ኤርዳ ግሾ፥ ባ እሻ ማቸራ አቅያ ዎደ ባ እሻስ ናእ የለቶና መላ ባ አቱንꬃ ሳአን ጉሴስ። 10 እ ኦꬅዳባይ ጎዳ ስንꬃን ኢታባ ግድዳ ግሾ፥ ጎዳይ እያካ ዎꬍስ።

11 ሄሳፈ ጉየ፥ ይሁድ ባ ናኣ ማችዉ ትማሮ፥ “ታ ናአይ ሴል ድጫና ጋካናስ ነ አዋ ሶ ባዳ፥ አምኤተꬃን ደኣሻ” ያግስ። ሄሳ እ ግዳይ፥ እካ ባ እሻታዳ ሀይቃነኮነ ግድ ህርግዳ ግሾሳ። ሄሳ ግሾ፥ ትማራ ባዳ ባ አዋ ሶን ደአሱ።

12 ዳሮ ዎደፐ ጉየ፥ ይሁዳ ማችያ፥ ሹአ ናእያ ሀይቃሱ። ይሁድ ባ ካዮ ዎድያ ኦንግድ፥ ባ ዶርሳታ እክስያ ሜድያ አሳታኮ ትምና ጌተትያ በሲ ባ ላግያ አዱላማ አድያ ህረራ ብስ።

13 አሳይ ትማሮ፥ “ሄኮ፥ ነ አዝና አዋይ ይሁድ፥ ባ ዶርሳታ እክስያ ሜዳናዉ ትምና ቤስ” ያግድ ኦድዶሶና። 14 እያ ባ አምኤተꬃ ማኡዋ ላማዳ፥ ባና ባለꬃናዉ ሻሸ ኤካዳ ጉሉንታሱ። ያታዳ፥ ትምና ኤፍያ ኦግያ ዶናን ደእያ ኤናይመ ካታማ ጋፃን ኡታሱ። ሄሳ እያ ኦꬅዳይስ፥ ሴል ድጭድ ጋክንካ እያዉ ማቾ ግዳዳ እመቶናይሳ እያ ኤርዳ ግሾሳ።

15 እያ ባ ሶምኡዋ ጉሉንትዳ ግሾ፥ ይሁድ እዮ በእዳ ዎደ፥ ላይማ ማጫስ ግድ ቆፕስ። 16 ባ ናኣ ማችዉ ግደይሳ ኤሮና ደእሸ፥ ኦግያ ጋፃ ኢኮ ሺቅድ “ታራ አቃኔ?” ያግድ ኦይችስ።

እያ፥ “ታኒ ኔራ አቅኮ፥ ነ ታዉ አይ እማኔ?” ጋዳ ኦይቻሱ።

17 እ፥ “ታኒ ታ መህያፐ እስ ኮለ ነዉ የዳና” ያግስ።

እያ፥ “ኔኒ ሄሳ ታዉ የዳና ጋካናስ አይ ኦይꬃኔ?” ያጋሱ።

18 እ፥ “አይ ኦይꬆ?” ያግስ።

እያ፥ “ነ ማታምያ እያ ጎሹዋራነ ነ ኩሽያን ደእያ ፃምአ ኦይꬃ” ያጋሱ። እ ሄሳታ እምድ፥ ኢራ አቅስ፤ እያካ ቃንꬃታሱ። 19 እያ ሄሳፈ ደንዳዳ ብዳፐ ጉየ፥ ባ ጉሉንꬃ ቃራዳ፥ ባ አምኤተꬃ ማኡዋ ማአሱ።

20 ይሁድ ባ ኦይꬅዳባ ሄ ማጫሴፐ ዛር ኤካናዉ ዴሻ ባ ላግያ ህራ ቦላ እዉ የድስ። ሽን እ እዮ ደምቤና። 21 እ ሄ ቢታ አሳኮ፥ “ኤናይመ ካታማን፥ ኦገ ዶናን ኡትዳ ላይማ ማጫስያ አዉኔ?” ያግድ ኦይችስ።

አሳይ፥ “ላይማ ማጫስ ሀይሳን ኡባካ ባዋ” ያግዶሶና።

22 እ ይሁዳኮ ስሚድ፥ “ ‘ታኒ እዮ ደማብከ፤ ሄሳ ቦላካ ሄ ቢታ አሳይ፥ ላይማ ማጫስ ሀይሳን ኡባካ ባዋ’ ያግዶሶና” ያግስ።

23 ይሁድ፥ “ባ ኦይክዳይሳ ባዉ ኤኮ፥ አቶ ጊኮ፥ አስ ኑና ሚጫና። ህዛ ታኒ እዉ ዴሸ የዳስ ሽን ኔኒ እዮ ደማባካ” ያግስ።

24 ሄꬑ አጌና ግድሽን አሳይ፥ “ነ ናኣ ማጫስያ ትማራ ላይማታዳ ቃንꬃታሱ” ያግድ ይሁዳስ ኦድዶሶና።

ይሁድ፥ “እዮ ካረ ከስድ ታማን ፁግተ” ያግስ።

25 እዮ ካረ ከስያ ዎደ፥ “ታኒ ቃንꬃትዳይ ሀ ሚሸታ ጎዳሳ። ሀ ማታመይነ ፃምአይ ኦደባየኮ ኤራናዉ ዳንዳእኮ ኤራ” ጋዳ ባ አዝና አዋካ ኪታሱ።

26 ይሁድ ሄ ሚሸታ ኤርድ፥ “ታኒ ታ ናኣ ሴላስ እዮ እማቦና ግሾ፥ ታፐ እያ ፅሎ” ያግስ። ሄሳፈ ጉየ፥ እ ኢራ ዛሪድ አቅቤና።

27 እዉ የሎ ቃም ጋክያ ዎደ፥ እ ኡሎን መንተ ናይት ደኤይስ ኤረትስ። 28 እያ ማረትሽን፥ ኤንታፈ እሶይ ባ ኩሽያ ከስን የልስያራ፥ “ሀይስ ኮይሮ ከይስ” ጋናዉ ዞኦ ቃጭና ኤካዳ እያ ኩሸን ቃቻሱ። 29 ሽን እ ባ ኩሽያ ጉየ ኤክዳ ዎደ፥ እያ እሻይ ከይን እያ፥ “ኔኒ ዋናዳ ፖርፁ ጋዳ ከያዲ?” ያጋሱ። ሄሳ ግሾ፥ ፓረሳ (ፖርፁ ግስ) ጋዳ ሱንꬃሱ። 30 ሄሳፈ ጉየ፥ እያ ኩሸን ዞኦ ቃጭን ደእያ እያ እሻይ የለትስ። እያ ሱንꬃይ ዛራ (ዞኦ) ጌተትስ።

<- መተꬃ ማፃፋ 37መተꬃ ማፃፋ 39 ->