1 ሄሳፈ ጉየ፥ ፆሳይ ያይቆባ፥ “ደንዳዳ ፑደ ቤተለ ከያዳ ያን ደአ። ኔኒ ነ እሻ ኤሳዌፐ ባቃትዳ ዎደ ነዉ ቆንጭዳ ፆሳስ ያን ያርሾ በሲ ጊግሳ” ያግስ።

2 ሄሳ ግሾ፥ ያይቆብ ባ ሶ አሳነ እያራ ደኤይሳታ ኡባ፥ “ህንተ ግዶን ደእያ አላጋ ፆሳታ ድግተ። ህንተና ጌሽተ፥ ህንተ ማኡዋ ላምተ። 3 ሀይሳፈ ደንድድ ፑደ ቤተለ ቦስ። ታ መቱዋ ጋላስ ታዉ ስእዳ፥ ታኒ ብዳ በሳ ኡባን ታራ ግድዳ ፆሳስ ታኒ ያን ያርሾ በሲ ጊግሳና” ያግስ። 4 ኤንቲ ባንታዉ ደእያ አላጋ ፆሳታ ኡባነ ባንታ ሀይꬃን አꬅዳ ዎርቃታ ኡባ ከስድ ያይቆባስ እምዶሶና። ያይቆብ ሄሳታ ሴከማን ደእያ ዎላ ጋርሳን ሞግስ።

5 ሄሳፈ ጉየ፥ ያይቆብነ እያ አደ ናይት ደንድድ ብያደ ኤንታ ዩሹዋን ደእያ አሳ ቦላ ፆሳ ያሻይ ዎꬍዳ ግሾ ኤንታና ካልድ ኦይካናዉ ኦንካ ዳንዳእቤና።

6 ያይቆብነ እያራ ደእያ አሳ ኡባይ ካናነ ቢታን ደእያ ቤተለ ጌተትያ ሎዛ ጋክዶሶና። 7 ያን እ ያርሾ በሲ ጊግስስ። እ ሄ በሳ ኤል-ቤተለ (ቤተለ ፆሳ) ግድ ሱንꬅስ። እ ባ እሻፐ ባቃትድ ብያ ዎደ ፆሳይ እያዉ ቆንጭዳይ ሄ በሳና።

8 እርብቃ ድችያ ድቦራ ያን ሀይቃሱ። ቤተለፐ ጋርሳራ ደእያ ዎላ ጋርሳን እያ ሞገታሱ። ሄሳ ግሾ፥ ሄ ምꬃ ሱንꬃይ አሎን-ባኩተ (ዬሆ ዎላ) ጌተትስ።

9 ያይቆብ ማሰጰፆመፐ ስምዳፐ ጉየ፥ ፆሳይ እያዉ ዛር ቆንጭድ እያ አንጅስ። 10 ፆሳይ፥ “ነ ሱንꬃይ ያይቆባ። ሽን ህዛፐ ኔኒ ያይቆባ ጌተታካ፥ ነ ሱንꬃይ እስራኤለ ጌተታና” ያግድ እያ “እስራኤለ” ግድ ሱንꬅስ።

11 ቃስ ፆሳይ ያይቆባ፥ “ታኒ ኡባ ዳንዳእያ ፆሳ። ኔኒ የለታ፥ ዳራ። ደረይነ ካዎተꬃት ኔፐ ከዮ። ካዎትካ ነ ጉልባታፐ ከዮ። 12 ታኒ አብራሃመስነ ይሳቃስ እምዳ ቢታ፥ ነዉ እማና። ኔፐ ጉየ ታኒ ሀ ቢታ ነ ሼሻስ እማና” ያግስ። 13 ፆሳይ እያራ ኦደትዳ በሳፈ ፑደ ከይስ።

14 ያይቆብ ፆሳይ እያራ ኦደትዳ በሳን ቆፍስያ ሹቻ ማላ ኤስድ እያ ቦላ ዎይንያነ ዛይተ ትግስ። 15 ያይቆብ ፆሳይ እያራ ኦደትዳ በሳ “ቤተለ” ግድ ሱንꬅስ።

16 ኤንቲ ሄሳፈ ጉየ፥ ቤተለፐ ደንድድ ብዶሶና። ኤንቲ ኤፍራታ ጋካናዉ ጉꬁ አትሽን፥ ራሄሎ እቀꬅ ኦይክን ዳሮ ዋየታሱ። 17 እቀꬃይ እዮ ዋይስዳ ዎደ እዮ የልስያራ፥ “ባቦፋ፤ ሀይስካ አደ ናአ” ያጋሱ። 18 ሽን እያ ሀይቆስ ማታዳ ሸምፖይ ከያና ሀንሽን፥ ባ ናአ በኖና (መቶ ናአ) ጋዳ ሱንꬃሱ። ሽን እያ አዋይ ብንያመ (ታ ኡሻቻ) ግድ ሱንꬅስ።

19 ሄሳፈ ጉየ፥ ራሄላ ሀይቃ አጋሱ። ቤተለመ ጌተትያ ኤፍራታ ኤፍያ ኦግያ ጋፃን ሞገታሱ። 20 ያይቆብ እ ዱፉዋ ቦላ ሀዉልተ ሹቹ ኤስስ። ሄ ሀዉልተይ ሀች ጋካናዉካ ራሄል ዱፉዋ ኤርሴስ።

21 እስራኤለይ ሄሳፈ ደንድድ ኤደራ ግምብያፈ ሄፍንꬃን ባ ዱንካንያ ቶክስ። 22 እስራኤለይ ሄ ቢታን ደእሽን፥ ሮቤል ባ አዋስ የልዳ አይለ ባልራ አቅስ። እስራኤለይ ሄ ኦዳ ስእስ።

ያይቆባ አደ ናይት ታማነ ናምአ። 23 ልያ ናይት ያይቆባ ባይራ ናአ ሮቤላ፥ ስሞና፥ ሌወ፥ ይሁዳ፥ ይሳኮራነ ዛብሎና። 24 ራሄል አደ ናይት ዮሰፋነ ብንያመ። 25 ራሄል አይለ ባል አደ ናይት ዳነነ ንፍታለመ። 26 ልያ አይለ ዛላፋ አደ ናይት ጋደነ አሴራ። ሀ ናይት ያይቆባስ ማሰጰፆመን የለትዳ አደ ናይታ።

27 ያይቆብ ከብሮና ጌተትያ ቅርያት-አርባ ማታን ማምረን ደእያ ባ አዋ ይሳቃ ሶ ብስ። ሄ በሳይ ካሰ አብራሃመይነ ይሳቅ ደእዳ በሳ። 28 ይሳቅ ፄታነ ሆስፑን ታሙ ላይꬅ ደእስ። 29 እ ዳሮ ዎድያ ደእድ ሎኦ ጭምድ፥ ሀይቅድ ባ ማይዛታን ጋሄትስ። እያ ናይት ኤሳዌይነ ያይቆብ እያ ሞግዶሶና።

<- መተꬃ ማፃፋ 34መተꬃ ማፃፋ 36 ->