1 አብራሃመይ ኬፁራ ጌተትያ ሀራ ማቾ ኤክስ። 2 እያ ዝምራና፥ ዮቅሳና፥ ማዳነ፥ ምድያመ፥ ያስቦቃነ ስዋ እያዉ የላሱ።

3 ዮቅሳን ሳባነ ደዳና የልስ። ደዳን አሾረታ፥ ለፁሰታነ ለኡማታ የልስ።

4 ምድያመ ናይት ገፈራ፥ ኤፈራ፥ ሄኖሀ፥ አብዳነ ኤልዳ። ሀይሳቲ ኡባይ ኬፁራ ሼሻታ።

5 አብራሃመይ ባባ ኡባ ይሳቃ ላትስስ። 6 ሽን እ ፓፃ ደእሸ፥ ሀራ ማቸታፐ የልዳ ናይታ ባዉ ደእያባፐ ዎይትስ። ባ ናአ ይሳቃፐ ኤንታ ሻክድ፥ ዶሎሀ ባጋ ቢታ የድስ።

7 አብራሃመይ ኩመꬅ እስ ፄታነ ላፑን ታማነ እቻሹ ላይꬅ ደእስ። 8 አብራሃመይ ዳሮ ዎደ ደእድ፥ ሎኦ ጭምድ፥ ሀይቅድ ባ ማይዛታን ጋሄትስ። 9 እያ ናይት ይሳቅነ እስማኤል እያ ማክፌላ ጌተትያ ጎንጎሎ ዱፉዋን ሞግዶሶና፤ ሄ ጎንጎሎይ ማምረ ማታን፥ ህተ አድያ ፆሃራ ናአ ኤፍሮና ጋድያን ደኤስ። 10 ሄስ አብራሃመይ ህተታፐ ሻምዳ ጋድያ። አብራሃመይ ባ ማችያ ሳራ ሞገትዳ ዱፉዋን ሞገትስ። 11 አብራሃመይ ሀይቅዳፐ ጉየ፥ ፆሳይ እያ ናአ ይሳቃ አንጅስ። ሄ ዎደ ይሳቅ፥ ቤር-ላይ-ሮእ (ታና በእያ ደኦ ፆሳ ፑልቶ) ጌተትያ ፑልቱዋ ማታን ደኤስ።

12 ሳራ አይልያ፥ ግብፀፈ ይዳ አጋራ፥ አብራሃመስ የልዳ ናአ እስማኤላ የለተꬃይ ሀይሳፈ ካልድ ፃፈትዳይሳ። 13 እስማኤላ ናይት ባንታ ሱንꬃንነ ባንታ የለታ ማራን ሀይሳታ፤ ኤንትካ፥ ናባዮታ፥ ቀዳረ፥ አድቤላ፥ ምብሳማ፥ 14 ምስማ፥ ዱማ፥ ማሳ፥ 15 ኩዳነ፥ ቴማ፥ እፁራ፥ ናፍሳነ ቀድማ። 16 እስማኤላ ናይት ሀይሳታ፤ ኤንታ ሱንꬃይ ኤንታ ሞꬃንነ ደእያ በሳን ሀይሳ። ኤንቲ ባንታ ያራንካ ታማነ ናምኡ ሀላቃታ። 17 እስማኤል ኩመꬅ ፄታነ ሀስታማነ ላፑን ላይꬅ ደእድ፥ ሀይቅድ ባ ማይዛታን ጋሄትስ። 18 እስማኤላ ኮቸት ግብፀፈ ዶሎሀ ባጋን ደእያ ሀውላፐነ ሱራፐ ግዱዋን፥ አሶረ ኤፍያ ኦግያ ማታን ደእዶሶና። ኤንቲ ባንታ እሻታ ኡባራ ሞርከተꬃን ደእዶሶና።

19 አብራሃመ ናአ ይሳቃ የለተꬃይ ሀይሳፈ ካልድ ፃፈትዳይሳ፤ አብራሃመይ ይሳቃ የልስ። 20 ይሳቃስ ላይꬅ ኦይታማ ግድን፥ እርብቃ ኤክስ፤ እያ ማሰጰፆመን ደእያ አራመ አድያ ባቱኤላ ናእዉነ ላባ ምችዉ። 21 ይሳቅ ባ ማችያ ማይንꬅ ግድዳ ግሾ፥ እዉ ጎዳ ዎስስ፤ ጎዳይ እያ ዎሳ ስእስ። ያትን እያ ማችያ እርብቃ ቃንꬃታሱ። 22 ሽን እ ኡሎን ደእያ ናይት መንተ ግድ ኡትድ፥ እሶይ እሱዋራ ሱገትዶሶና፤ እያ፥ “ሀይስ ታዉ አይስ ሀኒ?” ያጋሱ። ሄሳ ግሾ፥ ጎዳ ኦይቻናዉ ባሱ።

23 ጎዳይ እዮ፥ “ነ ኡሎን ናምኡ ካዎተꬅ ደኤስ፤ ቃስ ነ ግዶን ደእያ ናምኡ ደረ አሳት እሶይ እሱዋፈ ሻከታና፤ እስ ደረ አሳት ሀንኮታፐ ምናና፤ ቃስ ባይራይ ካሉዋስ ኪተታና” ያግስ።

24 እው የሎ ዎደይ ጋክን፥ እ ኡሎን መንተ አደ ናይት ደኦሶና። 25 ኮይሮ የለትዳይስ አርሰ፤ እያ ቦላ ኡባ እክሰይ ማእስ፤ ሄሳ ግሾ፥ ኤንቲ እያ ኤሳዌ (እክሳማ) ግድ ሱንꬅዶሶና። 26 ሄሳፈ ጉየ፥ እያ እሻይ የለትስ። እ ባ ኩሽያን ኤሳዌ ግንድያ ኦይክድ ከይስ፥ ሄሳ ግሾ፥ እያ ያይቆባ (ግንደ ኦይከይሳ) ግድ ሱንꬅዶሶና። እርብቃ ኤንታ የልዳ ዎደ ይሳቃስ ኡሱፑን ታሙ ላይꬅ ግድስ።

27 ናይት ድጭዶሶና፤ ኤሳዌይ ሻንካ ሂላ ኤርያ ባዞ አሰ ግድስ። ሽን ያይቆብ ዱንካነን ደእያ ዎፓ አሰ ግድስ። 28 ይሳቅ ኤሳዌ ዶስስ፤ አይስ ጊኮ፥ እ ሻንካተይሳፈ ማናዉ ዶሴስ፤ ሽን እርብቃ ያይቆባ ዶሳዉሱ።

29 እስ ዎደ ያይቆብ ዎፀ ካꬅሽን፥ ኤሳዌይ ኮሽ ዎꬍን ባዞፈ ይስ። 30 ኤሳዌይ ያይቆባ፥ “ታና ሀ ዞኦ ዎፅያፐ ሙዛ፥ ታና ኮሽ ዎꬌስ” ያግስ። (ሄሳ ግሾ፥ ቃስ እያ ሱንꬃይ ኤዶመ (ዞኦ) ጌተትስ)።

31 ያይቆብ እያ፥ “ኮይሮ ታዉ ነ ባይራተꬃ ባይዛ” ያግስ።

32 ያትን ኤሳዌይ፥ “ሄኮ፥ ታኒ ሀይቃና ሀናይስ፥ ሀ ባይራተꬃይ ታና አይ ማዲ?” ያግስ።

33 ያይቆብ ዛሪድ፥ “አነ ታዉ ኮይሮ ጫቃ” ያግስ። እ ጫቅስ፥ ባ ባይራተꬃ ያይቆባስ ባይዝስ። 34 ያይቆብ ኤሳዌስ ኡይꬅነ ምስረ ዎፀ እምን ምስ ኡይስ። ሄሳፈ ጉየ ደንድድ ብስ። ኤሳዌይ ባ ባይራተꬃ ሀይሳዳ ካꬍስ።

<- መተꬃ ማፃፋ 24መተꬃ ማፃፋ 26 ->