1 “ቢታ ላታናዉ ህንተ ሳማን ሻክያ ዎደ ሄ ቢታፈ እስ ሳማ ጎዳስ ዱማይተ። ሄስካ ታማነ ናምኡ ክሎ ምትረነ ባጋ አዱቅያነ ታሙ ክሎ ምትረ ዳልግያ በሰ ግዶ። ሄ በሳይ ኡባይ ጌሻ በሰ ግዶ። 2 ሄ በሳፈ ኦይዱ ማዛነ ደእያ አዱሳተꬃይነ ዳልጋተꬃይ እስ ግና ግድያ እቻሹ ፄቱ ዋꬋ፥ በሲ ፆሳ ኬꬃስ ተቀቶ፤ እያ ዩሾን እሻታሙ ዋꬋ ግድዳ ካይሳ በሲ ደኦ። 3 ሄ ጎዳስ ዱማይዳ በሳፈ አዱሳተꬃይ ታማነ ናምኡ ክሎ ምትረነ ባጋ፥ ጎምፓይ እቻሹ ክሎ ምትረ ግድዳ በሰ ዋꬋዳ ሻካ። ሄ በሳይ ኡባፈ ጌሻ በሳይ ደእያ ፆሳ ኬꬃስ፥ ግድድ ደኦ። 4 ሄስ ፆሳ ኬꬃ ግዶን ጎዳስ ሀጋዛናዉ፥ እያኮ ሺቅያ ካህነታስ ዱማትዳ ጌሻ በሲ ግዶ። ሄስ ካህነታ ኬꬃይነ ፆሳ ኬꬃይ ኬፀትያ በሰ ግዶ። 5 ቃስ አትዳ ታማነ ናምኡ ክሎ ምትረ ባጋ አዱቅያነ እቻሹ ክሎ ምትረ ባጋ ዳልግያ በሳይ ፆሳ ኬꬃን ኦꬅያ ሌወታስ ላታ ግዶ፤ ኤንቲ ባንታዉ ዱሳ ካታማታ ያን ኬፆ።

6 “ጎዳስ ዱማይዳ በሳ ማታን ታማነ ናምኡ ክሎ ምትረነ ባጋ አዱቅያነ ናምኡ ክሎ ምትረነ ባጋ ዳልግያ በሳይ ካታማ ኬፃናዉ ደኦ፤ ሄ በሳይ እስራኤለ አሳ ኡባስ ግዶ። 7 እስራኤለ ሀላቃስ እመትዳ ግሾይ ናምኡ ባጋራ ጎዳስ ዱማይዳ በሳንነ ካታማ በሳን ዛዋቴስ። እ ዉሎሀ ባጋራ መደትራነ አባ ጋኬስ፤ ዶሎሀ ባጋራ እስራኤለ ቢታ ዛዋ ጋኬስ። እያ አዱሳተꬃይ እስራኤለ ኮቻፈ እሱዋ ግሹዋዳ ዉሎሀ ባጋ ዛዋፐ ብድ፥ ዶሎሀ ባጋ ዛዋ ጋኬስ። 8 ሄ ግሾይ እስራኤለ ሀላቃስ ላታ ጋደ ግዶ። ህዛፐ ጉየ ታ ሀላቃት ታ አሳ ኡንኤꬆፎ፤ ኤንቲ እስራኤለ አሳ ኡባይ ባ ኮቻን ኮቻን ቢታ ኤካናዳ ኦꬆና” ያጌስ።

9 ኡባ ሃርያ ጎዳይ ሀይሳዳ ያጌስ፤ “ህንተኖ፥ እስራኤለ ሀላቃቶ፥ ህንተዉ ሀእ ግዳና! ቡቀꬅነ አሳ ኡንኤꬆ አግተ፤ ሱረ ፕርድተ፤ ፅሎተꬅ ኦꬅተ። ታ አሳ ኤንታ ላታ ቢታፈ ሾድድ ጎደይሳ አግተ። ሀይሳ ኦደይ ታና ኡባ ሃርያ ጎዳ። 10 ህንተዉ እሱዋስ እሱዋስ ልከ ምዛነይነ ማካ ሚሸይ ደኦ። 11 ማካ ሚሸ ኡባስ ግዶ ግድያ ጎማረ ጌተትያ ማካ ሚሸ ግዶ። መላባ ማክያ እፋ ጌተትያ ሚሸይነ ጉክያባ ማክያ ባተ ጌተትያ ሚሸይ እስ ልከ ግዶ። ሄሳ ጉሳይ፥ እስ ጎመረይ ታሙ እፋራነ ታሙ ባተራ እስ ግና ግዴስ። 12 ጉꬃባ ማክያ ዎደ ህንተ ማካ ሚሸይ ሳቅለ ግዶ። ላታሙ ጌር እስ ሳቅለ ግዶ፤ ኡሱፑን ታሙ ሳቅለይ እስ ምናነ ግዶ።

13 “ህንተ እሙዋ እምሸ ሀይሳዳ እምተ። ህንተ ሺሽያ ግስተፈ ኡሱፑን ታማፈ እስ ኩሸ፥ ባንጋፈ ኡሱፑን ታማፈ እስ ኩሸ ግዶ። 14 ሻማሆ ዛይትያፐ ፄታፐ እስ ኩሸ እምተ። ሄሳ ማክያ ዎደ ነ ማክያ ሚሸይ ባተ ግዶ። ታሙ ባተይ እስ ጎማረ ዎይኮ እስ ቆረ ግዴስ። 15 እስራኤለ አሳይ ሄምያ ናምኡ ፄቱ መሄፐ ደእያ እስ ዉድያፐ እስ እስ መሄ እምተ። ሄስ አሳ ናጋራ አቶተꬃስ ያርሸትያ፥ ካꬃ ያርሾራ፥ ፁሳ ያርሾራነ እስፈተꬃ ያርሾራ ሺቃና” ያጌስ ኡባ ሃርያ ጎዳይ። 16 ቢታን ደእያ አሳ ኡባይ ሄሳ ኡባ እስራኤለ ሀላቃስ እሞ። 17 ሀላቃይ ኦꬅያ ኦሶይ፥ እስራኤለ አሳይ ቦንችያ ባለታን፥ አጌና ፄሮን ሳምባታታ ጋላሳን፥ ፁሳ ያርሾ፥ ካꬃ ያርሾነ ኡሻ ያርሾ ሺሾ። እስራኤለ አሳ ናጋራ አቶተꬃስ ናጋራ ያርሾ፥ ካꬃ ያርሾ፥ ፁሳ ያርሾነ እስፈተꬃ ያርሾ ኮሽያባ እሞ።

18 ኡባ ሃርያ ጎዳይ ሀይሳዳ ያጌስ፦ “ኮይሮ አጌናን፥ ኮይሮ ጋላሳን ቦረይ ባይና እስ ዎፋኖ ፆሳ ኬꬃ ጌሻናዉ ሺሻ። 19 ካህነይ ናጋራ ያርሾ ሱꬃፈ ኤክድ፥ ፆሳ ኬꬃ ፐንገ ፃንገታ፥ ያርሾ በሳ ዩሾን ደእያ ደꬃን ደእያ ኦይዱ ማዛነታነ ግዶ ዳባባ ኤፍያ ድርሳ ፐንገ ፃንገታ ትዮ። 20 ኦንካ ቆፖና ዎይኮ ኤሮና ኦꬅዳ ናጋራ አቶተꬃስ፥ ሄ አጌናን ላፑንꬆ ጋላስ ሄሳዳ ኦꬃ። ያታዳ ፆሳ ኬꬃ ጌሻ።

21 “ኮይሮ አጌናን፥ ታማነ ኦይዳንꬆ ጋላስ ፓስካ ባኣለ ቦንችተ፤ ላፑን ጋላስ ጋካናዉ፥ እርሾይ ባይና ኡይꬅ ሚተ። 22 ኮይሮ ጋላስ ሀላቃይ ባ ግሾነ ባ አሳ ግሾ ናጋራ ያርሾ ኦꬅድ እስ ኮርማ ሺሾ። 23 ሄ ባለይ ቦንቸትያ ላፑን ጋላሳታን ጋላስ ጋላስ ቦረይ ባይና ላፑን ኮርማታነ ላፑን ማራዘ ዶርስ ፁሳ ያርሾ ኦꬅድ፥ ጎዳስ ሺሾ። ሄሳራ ጋꬅድ ናጋራ ያርሾስ ጋላስ ጋላስ እስ ዴሻ ኮለ ሺሾ። 24 እስ እስ ኮርማነ ማራዘ ያርሽያ ዎደ፥ ካꬃ ያርሾስ ታማነ ላፑን ክሎ ግራመ ግስተነ ሄꬑ ልትሮ ዛይተ ሺሾ።

25 “ላፑንꬆ አጌናን፥ ታማነ እቻሻንꬆ ጋላሳን ዶምያ ላፑን ጋላሳ ባኣለ ዎደ ናጋራ ያርሾ፥ ፁሳ ያርሾ፥ ካꬃ ያርሾነ ዛይተ ካሰይሳፈ ዱማዮና ሀላቃይ ሺሾ” ያጌስ።

<- ህዝቄላ ማፃፋ 44ህዝቄላ ማፃፋ 46 ->