4 “እስራኤለ አሳ ሴረተꬃስ ማላ ግዳና መላ ኔኒ ነ ሀድርሳ ምየን ዝንአ። ኔኒ ነ ሀድርሳ ምየን ዝንእያ ጋላሳታ ታይቡዋን እስራኤለ አሳይ ዋንድ ሴረታናዉ ደእያኮ በሳና። 5 እስራኤለ አሳይ ዋንድ ሴረታናዉ ደእያኮ በሳናዉ ኔኒ ዝንአና መላ ሄꬑ ፄታነ ኡዱፉን ታሙ ጋላስ ነዉ እማስ፤ እስ ጋላስ እስ ላይꬃራ ግና ግዳና።
6 “ኔኒ ሄ ጋላሳታ ፖልዳፐ ጉየ፥ ዛራዳ፥ ይሁዳ አሳይ ዋንድ ሴረታናዉ ደእያኮ በሳናዉ ነ ኡሻቻ ምየን ዝንአና መላ ኦይታሙ ጋላስ ነዉ እማስ። እስ ጋላስ እስ ላይꬃራ ግና ግዳና። 7 ነ ሶምኡዋ ተቀትዳ የሩሳላመኮ ዛራዳ፥ ነ ኩሽያ ደንꬃዳ ማንዳሸ፥ የሩሳላመ ቦላ ትንብተ ኦዳ። 8 ሄ ተቀꬃይ ዉራና ጋካናዉ እስ ምየፐ ሀራ ምየ ሽረቶና መላ ታ ነና ዎዶሮን ቃቻና።
9 “ኔኒ ግስተነ ባንጋ፥ ቆምኦሎነ ምስረ፥ ማልዶነ ሙርቃ ኤካዳ፥ ካꬅ ዎꬅያ ሚሸን ቆላዳ፥ ኔኒ ዝንእያ ሄꬑ ፄታነ ኡዱፉን ታሙ ጋላስ እያፐ ካꬃዳ ማና። 10 ጋላስ ጋላስ ነ ምያ ካꬃ ማዛና፤ እካ ናምኡ ፄታነ ሀስታሙ ግራመ ግዶ፤ ሄሳ እያ ዎደን ዎደን ማ። 11 ጋላስ ጋላስ ነ ኡያ ሃꬃይካ ልከራ ግዶ፤ እካ ናምኡ ኩባያ ግዶ፤ ሄሳ እያ ዎደን ዎደን ኡያ። 12 ዎራ ሼሻ ከምኤለ ኤꬃዳ፥ አሳይ ፄልሽን፥ ሄ ዋላክዳ ካꬃ ባንጋ ኡይꬃዳ ኡካዳ ማ። 13 ሄስ እስራኤለ አሳይ ታ ኤንታ ላልያ ካዎተꬃታ ግዶን ደእሸ፥ ቱንዳ ካꬅ ማናዉ ደኤይሳስ ማላ” ያግስ።
14 ታኒ፥ “ሀይእ! ኡባ ሃርያ ጎዳዉ፥ ሄስ ሀነና፤ ታኒ ቱናዳ ኤርከ። ታ ናአተꬃፈ ዶማዳ ሀች ጋካናዉ፥ ባዉታ ዎይኮ ዶእ ዎꬍዳባ ማ ኤርከ፤ ቱንዳ አሾይ ታ ዶናኮ ሺቅ ኤረና” ያጋስ።
15 እ ዛሪድ፥ “ሎኦ፥ ያትኮ፥ ዎራ ሼሻ ከምኤለን ኡከይሳ አጋዳ፥ ኦሻ ከምኤለን ነ ኡይꬃ ኡካ” ያግስ።
16 እ ጉጅድ፥ “ነኖ፥ አሳ ናአዉ፥ አኬካ! የሩሳላመ ካታማ ካꬅ ገሎና መላ ታኒ ተቃና ሀናይስ። አሳይ ካꬅ ህርግሸ ማክድ ማና፤ ሃ ያይሸ ልክድ ኡያና። 17 ህዛ፥ ኤንታዉ ደእያ ካꬃይነ ሃꬃይ ዉራና፤ ኤንቲ ዳጋማን እሶይ እሱዋ ፄላና፤ ባንታ ናጋራ ጋሶን ሴረትድ ግልቃና።
<- ህዝቄላ ማፃፋ 3ህዝቄላ ማፃፋ 5 ->