10 ሄሳ ግሾ፥ ኡባ ሃርያ ጎዳይ ሀይሳዳ ያጌስ፦ “ሄ ምꬃይ አዱቅድ ድጭዳ ግሾ፥ እያ ፄራይ ሻራ ጋክዳ ግሾነ እ ባ ጌሳን ኦቶርትዳ ግሾ፥ 11 ታ እያ የጋ አጋስ፤ ዎልቃማ፥ አላጋ ካዋስ አꬃዳ እማስ። ሄ ካዎይ እያ ኢታተꬃ መላ እያ ቦላ ኦꬃና። 12 ዎዛና ምኖ አላጋት ሄ ምꬃ ቃንፅድ የጋና፤ ቃንፅዳ ታሸት ደረታን፥ ኦላታንነ ዛንጋራታን የገትድ አታና። እያ ኩያን ሸምፕያ ካዎተꬃት ኡባይ ሄ በሳ አግድ ባና። 13 ሳሎ ካፎት ይድ ኩንድዳ ምꬃ ቦላ ኡታና፤ ባዞ ዶአት እያ ታሸታ የꬋና። 14 ሃꬃ ማታን ድጭያ ምꬃታ ግዶን እያ መላ አዱቅድ፥ ፄራይ ሻራ ጋክያ ምꬅ ዴና። ሀይቅያ አሳ ቦላ ጋክያ ሀይቆ ፕርዳይ ሄ ምꬃ ቦላ ጋካና፤ እ ዱፎን ደኤይሳታራ ግዳና” ያጌስ።

15 ኡባ ሃርያ ጎዳይ ሀይሳዳ ያጌስ፦ “ሄ ምꬃይ ዱፎ ገልያ ጋላስ ጪሞ ፑልቶ ሃꬃት እያዉ ካዮታና መላ ኦꬃና። ሄ ፑልቶ ሃꬃይ ጎጎና መላ ኦꬃና፤ ልባኖሰይ እያ ግሾ አዛናና መላ ኦꬃና፤ ዎራ ምꬃ ኡባይ ሹላና። 16 ታ ሄ ምꬃ ዱፎን ሆልያ ዎደ፥ እያ ኩንደꬃ ግርሳን ካዎተꬃ ኡባይ ቃፃና። ኩንድድ ዱፎን ገልዳ ኤደነ ምꬃትነ ሃ ኡይድ ኦርድዳ ሎኦ ልባኖሰ ምꬃት ኡባይ እያ ኩንደꬃን ምንተና። 17 ካዎተꬃታ ግዶን እያራ እስፍዳይሳትነ እያ ኩያን ደእያ ኡባይ ካሰ ማሻን ሀይቅዳይሳታራ ጋሄታናዉ እያራ እስፈ ዱፎ ገላና። 18 ኤደነ ጋናትያን ደእያ ምꬃታ ግዶን ሄሳ መላ ግትነ ሎኦይ ባዋ። ሽን ሀእ ኤደነ ምꬃታዳ እካ ሀይቅድ ዱፎን ገሌስ፤ ያን እ ማሻን ሀይቅዳ አማኖናይሳታራ ጋሄታና።