1 ኑኒ ድኤትዳ ታማንꬆ ላይꬃን፥ ታማንꬆ አጌናን፥ ታማነ ናምአንꬆ ጋላስ፥ ጎዳ ቃላይ ሀይሳዳ ያግሸ ታኮ ይስ። 2 “አሳ ናአዉ፥ ነ ሶምኡዋ ግብፀ ካዋኮ ዛራዳ፥ እያ ቦላነ ግብፀ ቢታ ኡባ ቦላ ትንብተ ኦዳ። 3 ኡባ ሃርያ ጎዳይ ሀይሳዳ ያጌስ ጋዳ ኦዳ። ‘ነኖ፥ ናይለ ሻፋ ግዶን ዝንእዳ፥ ግታነ ያሽያ ዶአ ዳነይሶ። ናይለ ሻፋይ ታባ፤ እያ መꬍዳይ ታና’ ግያ ግብፀ ካዋዉ፥ ታ ነዉ ሞርከ ግዳና። 4 ታ ነ ሲን ዳፎ አꬃና፤ ነ ሻፋን ደእያ ሞሎታ ቀፈይ ነ ጋልባራ ኦይከታና መላ ኦꬃና፤ ሞሎት ነ ጎጋራ ኦይከትድ ኡትዳሽን፥ ታ ነና ሃꬃፈ ጎቻዳ ጋፃ ከሳና። 5 ታ ነናነ ነ ሻፋን ደእያ ሞሎታ ኡባ መላ ቢታ ሆላና፤ ነ አሀይ ደንባን የገትድ አታና፤ ነ አሀ ሺሽድ ሞግያ አስ ꬋያና። ታ ነና ሳሎ ካፎታስነ ሳኣ ዶአታስ ካꬅ ኦꬃና። 6 ግብፀን ደእያ አሳ ኡባይ ታኒ ጎዳ ግደይሳ ሄ ዎደ ኤራና።

“ኔኒ እስራኤለ አሳስ ማቃ ፃምአ ግዳዳሳ፤ 7 ኤንቲ ነና ኦይክዳ ዎደ መቃዳ ኤንታ ሾጰን ጫዳዳሳ፤ ኤንቲ ነናን ዘምፕዳ ዎደ መቃዳ ኤንታ ዞኩዋ ዱꬃዳሳ። 8 ሄሳ ግሾ፥ ታኒ ኡባ ሃርያ ጎዳይ፥ ነ ቦላ ማሸ ደንይሳታ ኤሀና፤ ኤንቲ ነ አሳነ ነ መህያ ኡባ ዉርሳና። 9 ግብፀ ላለትድ ባይሳ ቢታ ግዳና። ታኒ ጎዳ ግደይሳ ኤንቲ ሄ ዎደ ኤራና። ኔኒ፥ ‘ናይለ ሻፋይ ታባ፤ እያ መꬍዳይ ታና’ ያግዳ ግሾ፥ 10 ታኒ ነ ቦላነ ነ ሻፋ ቦላ ደንዳስ። ፑደሀ ባጋራ ምግዶላፐ ዶማዳ፥ ዱገሀ ባጋራ አስዋና ጋካናዉ፥ ያራ ካንꬅድ ቶጰ ዛዋ ጋካናዉ ግብፀ ኡባ አስ ባይና ባይሳ በሰ ከሳና። 11 አሰ ግድን መሄ ግድን ያራ ካንና፤ ኦይታሙ ላይꬅ ዉራና ጋካናዉ፥ አይብካ ያን ዴና። 12 ታኒ ግብፀ ቢታ ኡባፈ አꬍዳ ባይሳ ቢታ ኦꬃና፤ እያ ካታማት ኦይታሙ ላይꬅ ዉራና ጋካናዉ፥ ሀራ ላለትዳ ካታማ ኡባፈ አꬍድ ላለትዳ ካታማ ግዳና። ግብፀ አሳ ታኒ ካዎተꬃታ ግዶንነ ሀራ አሳ ግዶን ላላና” ያጌስ።

13 ኡባ ሃርያ ጎዳይ ሀይሳዳ ያጌስ፦ “ኦይታሙ ላይꬃፈ ጉየ፥ ታኒ ግብፀይ ላለትዳ ካዎተꬃታ ግዶፈ ሺሻና። 14 ታኒ ነና ዛራዳ ጋሽትሳና ኤንታ የለትዳ ዱገሀ ግብፀን ደእያ ጳትሮሳ ቢታ ዛራና፤ ያን ኤንቲ ላፋ ካዎተꬅ ግድድ ዳና። 15 ግብፀይ ሀራ ካዎተꬃታ ኡባፈ ላፋ ካዎተꬅ ግዳና። ዛሪድ ሀራ ካዎተꬃታ ቦላ ባና ꬎቁ ꬎቁ ኦና፤ እ ሀራ ካዎተꬅ ሃሮናዳ ታኒ እያ ጉꬃና። 16 እስራኤለይ ዛሪድ ማዶ ደማናዉ ግብፀን አማነተና፤ ግብፀን አማነትዳ አማነተꬃይ አይ መላ ቆሆኮ እስራኤለይ አኬካና። ታኒ ኡባ ሃርያ ጎዳ ግደይሳ ኤንቲ ሄ ዎደ ኤራና” ያጌስ።

17 ኑኒ ድኤትዳ ላታማነ ላፑንꬆ ላይꬃን፥ ኮይሮ አጌናን፥ ኮይሮ ጋላሳን፥ ጎዳ ቃላይ ሀይሳዳ ያግሸ ታኮ ይስ። 18 “አሳ ናአዉ፥ ባብሎነ ካዎይ ናቡካዳናፆር ፅሮሳ ቦላ ኦላ ደንꬃናዉ ጊግስ። ኤንታ ሁጰይ ቆለታና ጋካናዉነ ኤንታ ሀሸይ ሾለታና ጋካናዉ ኦላንቾት ዴፆ ቶሆ ቶካና መላ ኦꬅዶሶና። ግዶሽን፥ ካዎይነ ኦላንቾት ሀ ዳቡራ ኡባን ፅሮሳፐ ደምዳባይ ባዋ። 19 ‘ታኒ ግብፀ ቢታ ባብሎነ ካዋ ናቡካዳናፆራስ አꬃዳ እማና፤ እካ ባ ኦላንቾታስ ዳሞዘ ግዳና መላ ድኦንነ ቦንቀን ኦይክዳባ ኡባ ኤክድ ባና። 20 እነ እያ ኦላንቾት ታዉ ኦꬅዳ ግሾ፥ ታኒ እያዉ ግብፀ ቢታ ኤንታ ዳቡራስ ዳሞዘ ኦꬃዳ እማና’ ” ያጌስ ኡባ ሃርያ ጎዳይ።

21 “ሄ ጋላስ ታኒ እስራኤለ ደርያ ምንꬃና። ህዝቄላ፥ ነካ አሳስ ኦዳና መላ ታ ነና ምንꬃና። ታኒ ጎዳ ግደይሳ ኤንቲ ሄ ዎደ ኤራና” ያግስ።

<- ህዝቄላ ማፃፋ 28ህዝቄላ ማፃፋ 30 ->