1 ሄሳፈ ጉየ ጎዳይ ሙሰኮ፥ “ግብፀ ካዋኮ ባዳ፥ ‘ጎዳይ፥ ታዉ ጎይናና መላ ታ አሳ የዳ። 2 ኔኒ ኤንታ የዶና እፅኮ፥ ነ ቢታ ኡባን ሾ ጋዶ የዳና። 3 ናይለ ሻፋን ሾይ ኩማና። ኤንቲ ያፐ ከይድ ነ ካዎተꬃ፥ ነ ዝንእያ ክፍልያ፥ ነ ሂፃ፥ ነ ሞርናታ ኬꬃነ ነ ደርያ ኬꬃ ኡባን ገላና። ሄሳዳካ ነ ጮጨንነ ሙኑቃ ሚሸ ኡባን ገላና። 4 ሾት ነ ቦላ፥ ነ አሳ ቦላነ ነ ሹማታ ኡባ ቦላ ጉፓና ያጌስ’ ያጋዳ ኦዳ” ያግስ።

5 ጎዳይ ሙሰኮ፥ “አሮን ግብፀን ደእያ ሃꬃታ ቦላ፥ ዛራ ሃꬃታ ቦላነ ተቀ ሃꬃ ኡባ ቦላ ባ ፃምኣ ደንꬃና መላ ኦዳ” ያግስ።

6 አሮን ግብፀ ሃꬃታ ቦላ ባ ፃምኣ ደንꬅዳ ዎደ ሾት ከይድ፥ ግብፀ ቢታ ማእዶሶና። 7 ሽን ማሮትካ ባንታ ብታን ሄሳዳ ኦꬅድ ግብፀ ቢታን ሾ ከስዶሶና።

8 ካዎይ ሙሰነ አሮና ፄግስድ፥ “ሀ ሾታ ታፐነ ታ አሳፐ ድጋና መላ ጎዳ ህንተ ዎስኮ ታ ህንተ አሳ ጎዳስ ያርሾ ያርሻና መላ የዳና” ያግስ።

9 ሙሰይ ካዋኮ፥ “ሾት ኔፐ፥ ነ ሞርናታፐነ ነ አሳፐ ክቻና መላ ታ ዎሳናዉ ቃፃሮ እማ። ሄሳፈ ጉየ ሻፋ ሾት ኔፐነ ነ ኬꬃፈ ክችድ ናይለ ፃላላን ደአና” ያግስ።

10 ካዎይ ዛሪድ፥ “ዎንቶ ግዶ” ያግስ።

ሙሰይ፥ “ኑ ጎዳ ፆሳ መል ሀር ኦንካ ባይናይሳ ኔኒ ኤራና መላ ነ ግዳይሳዳ ኦꬃና። 11 ሾት ኔፐ፥ ነ ኬꬃፈነ፥ ነ ሞርናታፐ ክችድ ናይለ ሻፋ ፃላላን አታና” ያግስ።

12 ሙሰይነ አሮን ካዉዋ ማታፐ ከይድ፥ ካዉዋ ቦላ ጎዳይ ኤህዳ ሾታ ድጋና መላ ሙሰይ ጎዳ ዎስስ። 13 ጎዳይ ሙሰይ ኦይችዳይሳዳ ኦꬅን ሶን፥ ካረንነ ጌሻን ደእያ ሾት ሀይቅዶሶና። 14 ግብፀ አሳይ ሀይቅዳ ሾታ ሺሽድ ዶርዶሶና፤ ቢታ ኡባይ ፅንቅስ። 15 ሽን ሾት ሀይቅዳይሳ ካዎይ በእዳ ዎደ እያ ዎዛናይ ዛር ሙምስ። ጎዳይ ግዳይሳ መላ እ ሙሰነ አሮና ስኦና እፅስ።

16 ሄሳፈ ጉየ፥ ጎዳይ ሙሰኮ “አሮን ባ ፃምአ ደንꬅድ ቢታ ባና ሾጫና መላ ኦዳ። ግብፀ ቢታ ኡባን ደእያ ባናይ ቦፀ ግዳና” ያግስ። 17 ኤንቲ ኪተትዳይሳዳ ኦꬅዶሶና። አሮን ፃምአራ ቢታ ባና ሾጭስ። ግብፀን ደእያ ባና ኡባይ ቦፀ ላመትድ መህያነ አሳ ማእስ። 18 ማሮትካ ባንታ ብታን ሄሳዳ ኦꬃናዉ ፓጭዶሶና፥ ሽን ፆነትዶሶና። ቦፀይ አሳ ቦላነ መህያ ቦላ ላለትስ። 19 ማሮት ካዋኮ፥ “ሀይስ ፆሳ ኦሶ” ያግዶሶና። ሽን ካዋ ዎዛናይ ሙምስ። ጎዳይ ግዳይሳ መላ እ ኤንታና ስኦና እፅስ።

20 ጎዳይ ሙሰ፥ “ጉራ ደንዳዳ፥ ካዎይ ሻፋ ብሽን እያራ ጋሄታዳ፥ ‘ጎዳይ፥ ታና ጎይናና መላ ታ አሳ የዳ። 21 ኔኒ ታ አሳ የዶና እፅኮ፥ ታኒ፥ ነ ቦላ፥ ነ ሞርናታ ቦላነ፥ ነ አሳ ቦላ ኡዱንፀ ጋዶ የዳና። ግብፀታ ኬꬃነ ኤንቲ ደእያ ቢታ ኡባን ኡዱንፀይ ኩማና። 22 ሽን ሄ ጋላስ ታ አሳይ ደእያ ጌሳመ ቢታን ኡዱንፀይ ዶናዳ ኤንታ ተቃዳ አሻና። ታኒ ጎዳይ፥ ሄ ዎደ ሀ ቢታን ታኒ ጎዳይ ኦይሳ ኔኒ ኤራና። 23 ታኒ፥ ታ አሳነ ነ አሳ ሻካና፤ ሄ ግታ ማላታይ ዎንቶ ሀናና’ ያጌስ ጋዳ ኦዳ” ያግስ።

24 ሄሳፈ ጉየ፥ ጎዳይ ግዳይሳዳ ኦꬅስ። ካዉዋ ጋꬎነ እያ ሞርናታ ሶ ዳሮ ኡዱንፀ ጋዶ የድስ። ኩመꬃ ግብፀ ቢታይ ኡዱንፀ ጋዶን ቆሄትስ።

25 ሄ ዎደ ካዎይ ሙሰነ አሮና ፄግስድ፥ “ብድ፥ ሀ ቢታን ህንተ ፆሳስ ያርሾ ያርሽተ” ያግስ።

26 ሽን ሙሰ ዛሪድ፥ “ሄስ ሀኖናባ። ኑኒ ጎዳስ፥ ኑ ፆሳስ ያርሽያ ያርሾይ ግብፀታ ማታን እፀትያ ግሾ፥ ሄሳ ኦꬆኮ። ኑ ያርሽሽን ኤንቲ በእኮ ኑና ሹቻን ጫዳና። 27 ኑና ኪትዳይሳ መላ፥ ኑኒ ጎዳስ፥ ኑ ፆሳስ ያርሾ ያርሻናዉ ሄꬑ ጋላስ ኦገ መላ ቢታ ባናዉ በሴስ” ያግስ።

28 ካዎይ ዛሪድ፥ “ጎዳስ፥ ህንተ ፆሳስ መላ ቢታ ብድ ያርሻና መላ ታኒ ህንተና የዳና። ሽን ህንተ ሃክድ ቦፕተ፤ ታዉ ዎስተ” ያግስ።

29 ሙሰይ ዛሪድ፥ “ታኒ ነ ማታፐ ከይዳ መላ ጎዳ ዎሳና። ሀ ኡዱንፀይ ዎንቶ ካዉዋፐ፥ እያ ሞርናታፐነ እያ አሳፐ ክቻና። ሽን ካዎይ አሳይ ጎዳስ ጎይናናይሳ ድግድ ዛር ኑና ጭሞፎ” ያግስ።

30 ሄሳፈ ጉየ ሙሰይ ካዉዋ ማታፐ ከይድ፥ ጎዳ ዎስስ። 31 ጎዳይ ሙሰይ ኦይችዳይሳዳ ኦꬅስ። ኡዱንፀይ ካዉዋፐ፥ እያ ሞርናታፐነ እያ አሳፐ እሶይካ አቶና ክችስ። 32 ሽን ሀእካ ካዉዋ ዎዛናይ ሙምን አሳ የዶና እፅስ።

<- ከሳ ማፃፋ 7ከሳ ማፃፋ 9 ->