1 ሄሳፈ ጉየ፥ ጎዳይ ሙሰኮ፥ “ኔንነ ነ ግብፀፈ ከስዳ አሳይ ሀ በሳፈ ደንድድ፥ ታኒ አብራሃመስ፥ ይሳቃስ፥ ያይቆባስነ ኤንታ ሼሻታስ እማና ያጋዳ ጫቅዳ ቢታ ቢተ። 2 ታኒ ህንተ ስንꬃን ኪታንቹዋ ኪታና። ካናነታ፥ አሞረታ፥ ህተታ፥ ፓርዘታ፥ ህወታነ ያቡሰታ ታኒ ጎዳዳ ከሳና። 3 ማꬅነ ኤስ ጎግያ ሄ ቢታ ቢተ። ሽን ህንተ፥ ዎዛን ሙምዳ አስ ግድያ ግሾ ታ ህንተና ኦገን ꬋይሶና መላ ህንተራ ቢከ” ያግስ።

4 አሳይ ሄ ያሽያ ኦዳ ስእድ ዬክዶሶና። ሄ ዎደፐ ዶምድ ኡባይ ባንታ አሌቁዋ አꬅቦኮና። 5 ጎዳይ ሙሰኮ፥ እስራኤለ አሳስ ሀይሳዳ ያጋዳ ኦዳ ያግስ፤ “ህንተ ዎዛና ሙመ አስ። ታኒ ህንተራ ሀር አቶሽን ጉꬃ ዎደስካ ቢኮ፥ ህንተ ታፐ ꬋያና። ሀእ ህንተ፥ ህንተ አሌቆታ ከስተ፤ ታኒ ህንተ ቦላ ኦꬃናባ በሳና ያጋ” ያግስ። 6 ሄ ዎደ እስራኤለት ኮሬባ ዙማ አግድ ብዳፐ ጉየ፥ ባንታ አሌቆታ አꬅቦኮና።

7 እስራኤለ አሳይ ብሸ ሲራትያ ጉታ ኡባን ሙሰይ ዱንካንያ ጉታፐ ሃስድ ቶኬስ። ሄ ዱንካነይ፥ “ጎዳራ ጋሄትያ ዱንካነ” ጌተትድ ፄገትስ። ጎዳ ኦይቻናዉ ኮይያ ኡባይ ይያ ቤስ። 8 ሙሰይ ዱንካንያኮ ብያ ዎደ አሳ ኡባይ ባ ዱንካንያ ፐንገን ፐንገን ኤቅድ፥ ሙሰይ ይያ ገላና ጋካናዉ እያ በኦሶና። 9 ሙሰይ ይያ ገልዳፐ ጉየ፥ ሻራ ቱሳይ ዎꬍድ ዱንካንያ ፐንገን ኤቄስ። ጎዳይ ሻራ ግዶን ግድድ ሙሰራ ኦደቴስ። 10 አሳይ ሻራ ቱሳ ዱንካንያ ፐንግያን በእዳ ዎደ ኡባን፥ ባ ፐንገን ፐንገን ጉልባትድ ጎዳስ ጎይኖሶና። 11 አስ ባ ላገራ ኦደተይሳዳ ጎዳይ ሙሰራ ሶምኦን ኦደቴስ። ሄሳፈ ጉየ፥ ሙሰይ ጉታ ስሜስ። ሽን እያ ማድያ ናአተꬃይ፥ ናወ ናኣ እያሱይ፥ ጎዳራ ጋሄትያ ዱንካንያፐ ሻከተና።

12 ሙሰይ ጎዳኮ፥ “ኔኒ ታና፥ ሀ አሳ ታ ግዳ ቢታ ካለꬃ ያጋዳሳ። ሽን ታራ ባና መላ ኔኒ ኪተይ ኦነኮ፥ ታና ኤርሳባካ። ኔኒ፥ ታና ኤረይሳነ ታናን ኡፋይተይሳ ታዉ ቆንጭሳዳሳ። 13 ሄስ ቱማ ግድኮ፥ ታ ነና ሀጋዛና መላነ ጉጃ ኡፋይሳና መላ ነ ኦግያ ታና ታማርሳ። ሀ አሳይ ነ ደረ ግደይሳ በአ” ያግስ።

14 ጎዳይ ዛሪድ፥ “ታኒ፥ ኔራ ባና መላነ ነዉ ሳሮ እማና መላ ኮያይ?” ያግስ።

15 ሙሰይ ዛሪድ፥ “ኔኒ ኑራ ቦናባ ግድኮ፥ ሀይሳፈ ኑና ከሶፋ። 16 ኔኒ ኑራ ቦናባ ግድኮ፥ ታናንነ ነ አሳን ነ ኡፋይትዳይሳ አሳ ኡባይ ዋትድ ኤራኔ? ቢታ ኡባን ደእያ ሀራ አሳ ኡባፈ ታንነ ነ አሳይ ዱማተይ ነ ኑራ ደኤይሳን ግደነዬ?” ያግስ።

17 ጎዳይ ሙሰኮ፥ “ታኒ ነና ኤርያ ግሾነ ነናን ኡፋይትዳ ግሾ፥ ነ ታና ኦይችዳይሳ ኡባ ኦꬃና” ያግስ።

18 ሙሰይ ጎዳኮ፥ “ሀያና ነ ኩመꬃ ቦንቹዋ ታና በሳ?” ያግስ።

19 ጎዳይ ዛሪድ፥ “ታኒ ታ ማሮታነ ታ ሎኦተꬃ ኡባ ነ ስንꬃራ አꬃና። ታ ጌሻ ሱንꬃ ነ ማታን አዋጃና። ታኒ ጎዳ፤ ታ ዶርዳይሳታ ማራናነ ኤንታዉ ቃታና። 20 ሽን ኦንካ ታ ሶምኡዋ በእድ ፓፃ ዶና ግሾ፥ ኔኒ ታ ሶምኡዋ በአካ” ያግስ።

21 ሽን፥ “ኔኒ ዛላ ቦላ ኤቃናዉ ሀይሳን ታ ማታን በሲ ደኤስ። 22 ታ ቦንቾይ አꬍያ ዎደ ታኒ ዛእዳ ዛላ ግዶን ነና ዎꬃና። ታ አꬋና ጋካናዉ ታ ኩሽያን ነና ካማና። 23 ሄሳፈ ጉየ፥ ታኒ ታ ኩሽያ ደንꬃና፤ ኔኒ ታ ዞኩዋ በአና፥ ሽን ታ ሶምኡዋ በአካ” ያግስ።

<- ከሳ ማፃፋ 32ከሳ ማፃፋ 34 ->