1 ጎዳይ ሙሰኮ፥ “ኔኒ፥ አሮን፥ ናዳብ አብዮዳነ እስራኤለ ጭማታፐ ላፑን ታሙ አሳት ታኮ ዙማ ቦላ ከይድ፥ ሃሆን ኤቅድ፥ ጉፋንድ፥ ታዉ ጎይንተ። 2 ሽን ኔኒ ነርካ ታኮ ሺቃ፤ ሀራት ታ ማት ሺቆፖ። ቃስ አሳይካ ኔራ ዙማ ቦላ ከዮፖ” ያግስ።

3 ሙሰይ ብድ፥ ጎዳ ቃላነ ዎጋ ኡባ አሳስ ኦድን፥ አሳ ኡባይ እስ ቃላን፥ “ጎዳይ ግዳባ ኡባ ኑኒ ኦꬃና” ያግዶሶና። 4 ሙሰይ ጎዳይ ኦድዳባ ኡባ ፃፍስ።

ዎንተꬃ ጋላስ ጉራ ደንድድ፥ ዙማ ጋርሳን ያርሾ በሰ ጊግስስ። ታማነ ናምኡ እስራኤለ ሼሻታ ሱንꬃን፥ ታማነ ናምኡ ሹቻ ቱስ ኤስስ። 5 እስራኤለ ፓንꬃታ እ ኪትን፥ ኤንቲ ብድ ፁሳ ያርሹዋነ እስፈተꬃ ያርሹዋስ ኮርማታ ሹክድ፥ ጎዳስ ያርሽዶሶና። 6 ሙሰይ መህያ ሱꬃፈ ባጋ ኤክድ ከርያን ትግስ፤ አትዳ ባጋ ሱꬃ ያርሾ በሳን ꬋርጭስ። 7 ሄሳፈ ጉየ ጫቆ ማፃፋ ኤክድ፥ አሳስ ናባብን፥ ኤንቲ፥ “ጎዳይ ግዳባ ኡባ ኑኒ ኦꬃና፤ ኑኒ እያ ኪታ ፖላና” ያግዶሶና።

8 ሄሳፈ ጉየ፥ ሙሰይ ሄ ሱꬃ ኤክድ፥ አሳ ቦላ ꬋርጭድ፥ ኤንታ፥ “ጎዳይ ህንተዉ ሀ ኪታታ እምያ ዎደ ህንተራ ገልዳ ጫቁዋ ምንꬅያ ሱꬃይ ሀይሳ” ያግስ።

9 ሙሰይ፥ አሮን፥ ናዳብ፥ አብዮዳነ እስራኤለ ጭማታፐ ላፑን ታማይ ዙማ ቦላ ከይድ፥ 10 እስራኤለ ፆሳ በእዶሶና። እያ ቶሁዋፐ ጋርሳን ሳሎዳ ጌይዳ፥ ሳንፓረ ጌተትያ ሹቻፈ ኦሰትዳባ ዳንያ ደምባ በሲ ደኤስ። 11 ሽን ፆሳይ እስራኤለ አሳ ሀላቃታ ዎꬍቤና። ኤንቲ ፆሳ በእዶሶና፤ እያ ስንꬃን ምዶሶናነ ኡይዶሶና።

12 ጎዳይ ሙሰኮ፥ “ኔኒ ታኮ ዙማ ቦላ ሃ ከያዳ፥ ሀይሳን ጋምአ። ታ አሳይ ታዉ ኪተታና መላ ናምኡ ሎቸ ሹቻታ ቦላ ታ ኩሸን ታ ፃፍዳ ህገታ ነዉ እማና” ያግስ።

13 ሙሰይነ እያዉ ኪተትያ እያሱይ ባናዉ ደንድዶሶና፤ ሙሰይ ፆሳራ ጋሄታናዉ ዙማ ቦላ ከይስ። 14 ሙሰይ እስራኤለ ጭማታኮ፥ “ኑኒ ህንተኮ ስማና ጋካናዉ ሀይሳን ጋምእተ። አሮንነ ሁር ሀይሳን ህንተራ ደኦሶና፤ ኦድ ደእያ ኦንካ ኤንታኮ ቦ” ያግስ።

15 ሙሰይ ዙማ ቦላ ከይዳ ዎደ ሻራይ ዙማ ማእስ። 16 ጎዳ ቦንቾይ ሲና ዙማ ቦላ ኡትስ። ሄ ሻራይ ኡሱፑን ጋላስ ዙማ ቦላ ማእስ፤ ላፑንꬃ ጋላስ ጎዳይ ሻራ ግዶን ግድድ ሙሰ ፄግስ። 17 ዙማ ቦላ ቆንጭዳ ጎዳ ቦንቾይ እስራኤለታስ ታማ ላጮ ዳንድ በንትስ። 18 ሄሳፈ ጉየ፥ ሙሰይ ዙማ ሁጵያ ከይድ ሻራ ግዶ ገልስ፤ ያን ኦይታሙ ጋላስነ ኦይታሙ ቃማ ጋምእስ።

<- ከሳ ማፃፋ 23ከሳ ማፃፋ 25 ->