3 “ታፐ አትሽን፥ ሀራ ፆሰ ጎይኖፋ።
4 “ቦላ ሳሉዋን ደእያባ፥ ዎይኮ ጋርሳ ሳአን ደእያባ፥ ዎይኮ ሳአፐ ጋርሳን ሃꬃ ግዶን ደእያባ አይባካ ነዉ ጎይንያ ኤቃ ዳንሳዳ ኦꬆፋ። 5 ኤንታዉ ሆኮፋ ዎይኮ ኤንታ ጎይኖፋ። አይስ ጊኮ፥ ታኒ፥ ጎዳይ ነ ፆሳይ፥ ታ ቦንቹዋ ሀራ ፆሳታራ ኮፆና ፆሰ። ታና እፅያ አዋታ ናጋራ ግሾ ናይታ ሄꬓንꬆ ዎይኮ ኦይዳንꬆ የለተꬅ ጋካናዉ ሀንቃና። 6 ሽን ታና ሲቀይሳታነ ታ ኪታ ናገይሳታ ሼሻ ሙኩሉ የለተꬅ ጋካናዉ ኬሀና።
7 “ፆሳ ነ ጎዳ ሱንꬃ ሀዳን ደንꬆፋ። ጎዳይ ባ ሱንꬃ ሀዳን ደንይሳታ ሴሮና አገና።
8 “ሳምባታ ጌሻ ጋላስ ኦꬃዳ ናጋ። 9 ኔኒ ኦሶ ኦꬃናዉ በሲያ ኡሱፑን ጋላሳት ደኦሶና። 10 ሽን ላፑንꬃ ጋላሳይ ኔኒ ጎዳ ቦንችያ ሸምፖ ጋላስ። ሄ ጋላሳን አይባ ኦሶካ ኦꬆፋ። ኔኒ፥ ዎይኮ ነ ናይት፥ ዎይኮ ነ አይለት፥ ዎይኮ ነ መሄይ፥ ዎይኮ ነ ቢታን ደእያ አሳ ጋደ አሳት ሄ ጋላሳን ኦሶ ኦꬆፍተ። 11 ኡሱፑን ጋላሳ ግዶን ጎዳይ ሳሎታ፥ ሳኣ፥ አባነ ኤንታ ግዶን ደእያ ኡባ መꬍስ፥ ሽን ላፑንꬃ ጋላሳን ሸምፕስ። ሄሳ ግሾ ጎዳይ ሳምባታ ጋላሳ አንጅስነ ዱማይስ።
12 “ጎዳይ ነ ፆሳይ ነዉ እምያ ቢታን ነ ላይꬃይ አዱቃና መላ ነ አዋነ ነ አይዉ ቦንቻ።
13 “አሳ ዎꬎፓ።
14 “ላሞፋ።
15 “ካይሶቶፓ።
16 “ነ ላግያ ቦላ ዎርዶ ማርካቶፋ።
17 “ነ ላግያ ኬꬃ አሞቶፋ። ነ ላግያ ማችዉ፥ ዎይኮ እያ አይለታ፥ ዎይኮ እያ መህያ፥ ዎይኮ እያ ሀርያ፥ ዎይኮ እያዉ ደእያባ አይባካ አሞቶፋ” ያግስ።
18 አሳ ኡባይ ደሾይ ደቸይሳነ ሞይዘይ ፑነተይሳ ስእድ፥ ዎልአንꬃይ ዎልአመይሳነ ደረይ ጩየይሳ በእድ ያሻን ኮኮርሸ ሃሆን ኤቅዶሶና። 19 ኤንቲ ሙሰኮ፥ “ኔኒ ኑስ ኦዳ፤ ኑኒ ስአና። ሽን ኑኒ ሀይቆና መላ ፆሳይ ኑስ ኦዶፖ” ያግዶሶና። 20 ሙሰይ አሳኮ፥ “ያዮፍተ፤ ፆሳይ ህንተና ፓጫናዉነ ህንተ እያዉ ኪተትድ ናጋራ ኦꬆና መላ እ ይስ” ያግስ። 21 አሳይ ባንታ ደእያሱዋን ሃክድ ኤቅዳሽን፥ ፆሳይ ደእያሱዋ ሙምዳ ሻራኮ ሙሰይ ሺቅስ።