የለትያ ጋላሳፐ ሀይቆ ጋላስ ሎኦ።

ግብራ ኬꬅ በይሳፈ ዬሆ ኬꬅ በይስ ሎኦ፤

ደኦን ደእያ አስ ሄሳ ባ ዎዛናን ዎꬃናዉ ኮሼስ።

ዎዛና ፖእስያ ግሾ ሚቻፈ አዛኖይ ሎኦ።

ሽን ኤያ አሳ ዎዛን ኡፋይሳ ሶን ደኤስ።

ጭንጫታ ሴራ ስስ ሎኦ።

ꬉቀይሳ መላ፤ ሄስካ ሀዳ።

ዎꬋፈ ኤኮይ ዎዛና ኢሴስ።

ኦቶሮፐ ዳንዳእ ሎኦ።

ኔኒ ነ ሸምፑዋን ሀንቆስ ኤለሶፓ።

ሄሳ መላ ኦይሾይ ጭንጫ አስ ኦይችያ ኦይሾ ግደና።

ጭንጫተꬅ ደሞይ ላታፐ ሎኦ።

ሽን ጭንጫተꬅ ሚሸፐ አይ አሳ ደኦ ናጋናዉ ዳንዳእያ ግሾሳ።

ፆሲ ጌላይዳባ ኦን ሱርሳናዉ ዳንዳኢ? 14 ሳእ ጊግዳ ዎደ ኡፋይታ፤ መቶይ ጋክያ ዎደ አኬካ።

ኡፋይስ ግድን መቶ ግድን ፆሲ የድያ ዎደን ዬስ።

ሽን አዉስ ኮይሮትድ ያነኮ ኔኒ ኤራካ።

15 ሀ ሀዳ ግድዳ ታ ላይꬃን ዳሮባ በአስ። ሄስካ፥ ጌላይ ባ ጌላተꬃን አዱሳ ላይꬅ ደእያ ዎደ ፅሎይ ቃንꬃ ላይꬃን ሀይቄስ። 16 ሄሳ ግሾ፥ ኔኒ ኤለ ꬋዮናዳ ዳሮ ፅሎ ዎይኮ ዳሮ ጭንጫ ግዶፓ። 17 ኔኒ ዎደይ ጋኮና ሀይቆናዳ አꬍዳ ኢታ ግዶፓ፤ አꬋዳ ኤያ ግዶፓ። 18 ሀ ኡባን ፆሰ ያያ፤ አስ መቶ ኡባ ፆኖን ከያናዉ ዳንዳእያ ግሾ ኔኒ ዳሮ ኢታ ዎይኮ ዳሮ ፅሎ ግዶናሽን ግዶ አስ ግዳ።

19 ጭንጫተꬅ ጭንጫስ እምያ ዎልቃይ እስ ካታማ ሃርያ ታሙ አሳታ ዎልቃፈ አꬌስ።

20 ፅሎባ ፃላላ ኦꬅድ ናጋራ ኦꬆና ደእያ አስ ሀ ሳኣ ቦላ ባዋ።

21 አስ ሃሳያ ቃላ ኡባ ስአዳ ፖላና ጎፓ፤ ኔኒ ኡባ ስአና ጊኮ ነ አይለይ ነና ባድሽን ስአና። 22 ቃስ ኔኒ ነ ሁጰን ሀራታ ባድያባ ነ ዎዛናይ ኤሬስ።

23 ሄሳ ኡባ ታኒ ጭንጫተꬃን ፕልጋዳ በአስ። ያታዳ፥ “ታኒ ጭንጫ ግዳና” ያጋስ። ሽን ታኒ ግዳይሳዳ ሀንቤና። 24 ጭንጫተꬅ ኡባ ዎደ ሃሆን ደእያባነ ጪሞባ፤ ያትን፥ እያ ኮይድ ደማናዉ ዳንዳኤይ ኦኔ? 25 ታኒ ፕልጋዳ ፄላናዉ ጭንጫተꬅነ ኦዳ ኡባ ዉርሰꬃ ኤራናዉ ቆፓስ። ናጋር ኤያተꬅ፥ ኤያተꬅ ጎሻተꬅ ግደይሳ ኤራናዉ ጋካስ።

26 ታኒ ሀይቆፐ አꬍድ ጫምያ ሀራባ ደማስ። ሄስካ፥ እ ዎዛናይ ግተ፥ እ ኩሸይ ሳንꬃላታ ግድድ ፅሄዳ ኦይክያ እስ ማጫስ በአስ። ፆሰ ያይያ አስ ኢፐ ከስ ኤካና፤ ሽን ናጋራንቹዋ እያ ባ ፅህያን ፃፃዳ ኦይካና።

27 አስታማረይ ሀይሳዳ ያግስ፤ “ታኒ ፕልጋዳ ደምዳባይ ሀይሳ። 28 ሄስካ፥ ታኒ ሀች ጋካናዉ ኮያዳ ደማቦናባ። ሙኩሉ አደ አሳ ግዶፈ ቦንቾይ በሲያ እስ አደ ፃላላ ደማስ፤ ሽን ማጫ አሳ ግዶፈ እስኖካ ደማናዉ ዳንዳአብከ። 29 ታኒ ፕልጋዳ ደምዳ ሀራባይ፥ ፆሲ አሰ ሱረ ቆፋራ መꬍስ፤ ሽን አስ ዳሮ ገነ ኦገ ኮይድ ብስ” ያግስ።

<- ኤራታ ማፃፋ 6ኤራታ ማፃፋ 8 ->