1 እስራኤለ አሳ ቦር ዎይኮ ዶርስ ꬋይድ ብሽን ደምኮ አጋ አꬎፋ፤ ላጋ ኤሀዳ እያ ጎዳስ እማ። 2 ሄ መህያ ጎዳይ ነ ሄራ አስ ግዶና እፅኮ ዎይኮ እያ ጎዳይ ኦነኮ ነ ኤሮና እፅኮ፥ እያ ጎዳይ ኮይሸ ያና ጋካናዉ ነ ሶ ኤፋ፤ እ ኮይሸ ዪኮ እያዉ እማ። 3 ሄሳዳ ሀረ ዎይኮ ማኦ ዎይኮ አይባካ ꬋይዳባ ደምኮ፥ ሄሳዳ ኦꬃ።
4 እስራኤለ አሳ ሀረይ ዎይኮ ቦር ኦገን ኩንድን በእኮ፥ ማዳዳ ደንꬃፈ አትሽን፥ አጋዳ አꬎፋ።
5 ማጫስ አደ ማኦ ማኦፎ፤ አደይካ ማጫሳ ማኦ ማኦፎ። ሄሳ መላባ ኦꬅያ ኦናካ ጎዳይ፥ ህንተ ፆሳይ እፄስ።
6 ነ ኦገ ብሽን፥ ምꬃ ቦላ ግድን፥ ሳአን ባ ናኣ ዎይኮ ባ ጱጱልያ ሀጵዳ ካፎ ደምኮ፥ እዮ፥ እ ናይታራ ኦይካዳ ነ ሶ ኤፎፓ። 7 ናይታ ኤፋናዉ ዳንዳኣሳ፤ ሽን አይዉ ባና መላ የዳ አጋ። ሄሳዳ ኦꬅኮ፥ ኔኒ ዱረታዳ አዱሳ ላይꬅ ዳና።
8 ኦራꬃ ኬꬅ ኬፅያ ዎደ ካራፐ አስ ኩንድ ሀይቅን ነ ኦይሸቶና መላ ኬꬃ ቦላ ካተ ጊግሳ።
9 ነ ዎይነ ጋደን ናምኡ ቆሞ ካꬅ ዘሮፓ፤ ሄሳዳ ኦꬅኮ፥ ነ ዘርዳ ካꬃይነ ዎይነይ ናምአይካ ኢታና።
10 ቦርነ ሀረ እስፈ ዋፃዳ ጎዮፓ።
11 ሱፈፐነ ሊኖፐ ኦሰትዳ ማኦ ማኦፋ።
12 ነ ማእያ ማኦይ ኦይዱ ባጋራ ማጫር ደእያባ ግዶ።
20 እያ ሞቶይ ቱማ ግድድ፥ ናእያ ኩመꬅ ግዶና እፅኮ፥ 21 እያ ባ አዋ ሶን ደአሸ ላይማትዳ ግሾ፥ ናእዉ እ አዋ ካረ ኤህድ፥ ሄ ካታማ አደት እዮ ሹቻን ጫድድ ዎꬎ። እስራኤለ ግዶን እያ ቦርሶባ ኦꬃሱ፤ ሄሳዳ ኦꬃዳ ነ ግዶፈ ኢታ ድጋ።
22 እስ አስ ሀራ አሳ ማችራ ላይማትሸ ኦይከትኮ፥ እነ እያራ ላይማትዳ ማጫስያ ሀይቆ። ሄሳዳ ኦꬃዳ ነ ግዶፈ ኢታ ድጋ።
23 እስ አስ ሀራ አሳስ ኦይሸታ ጊግዳ ጌላእዉ ካታማ ግዶን ደምድ ኢራ ላይማትኮ፥ 24 ኤንታ ናምኣ ካታማፐ ጋፃ ከስድ፥ ሹቻን ጫድድ ዎꬍተ። ናእያ ሀይቀይ፥ ካታማ ግዶን ደአሸ፥ አስ አሻና መላ ዋሳቦና ግሾሳ። ናአይ ሀይቀይ፥ ሀራ አሳስ ጊግዳ ጌላእዉ ኢስዳ ግሾሳ። ሄሳዳ ኦꬃዳ ነ ግዶፈ ኢታ ድጋ።
25 እስ አስ አሳስ ጊግዳ ጌላእዉ አስ ባይና በሳን ዎልቃን ኦይክድ፥ እዮ ኢስኮ፥ እያ ፃላል ሀይቆ። 26 እያ ሀይቆስ ጋꬅያ ናጋራ ኦꬃቦና ግሾ፥ ናኤ ቦላ አይባካ ኦꬆፕተ። ሄስ እስ አስ ጮ ደንድድ ሀራ አስ ዎይሳ መላ። 27 እ እዮ አስ ባይና በሳን ደምድ ኦይክን፥ ሄ ጌላእያ ዋሳሱ፥ ሽን እዮ አሽያ አስ በንትቤና።
28 እስ አስ ኦይሸታቦና ጌላእዉ ኦይክድ፥ እ ጌላኦተꬃ ኤክድ ኦይከተኮ፥ 29 ናኤ አዋ እሻታሙ ብራ ሳንትመ [b] አጮ። ያትድ ናእዉ ባዉ ማቾ ኦꬆ። ባ ደኦ ላይꬃ ኡባን እዮ የዶፎ።
30 እስ አስ ባ አዋ ማችዉ ኤክድ፥ ባ አዋ ካዉሾፎ።
<- ዛረꬆ ማፃፋ 21ዛረꬆ ማፃፋ 23 ->