6 ሀር አቶሽን፥ ነ እሻይ ዎይኮ ነ አደ ናአይ ዎይኮ ነ ማጫ ናእያ ዎይኮ ነ ዶስያ ማችያ ዎይኮ ነ ማታ ላገይ፥ “ካሰ ነነ ነ ማይዛት ጎይን ኤሮና ፆሳታ ጎይናናዉ የꬋ። 7 ቢታ ሀ ጋፃፐ ያ ጋፃ ጋካናዉ ደእያ፥ ነ ዩሾ ኡባን ማታንነ ሃሆን ደእያ አሳ ኡባይ ጎይንያ ፆሳታ ጎይናናዉ የꬋ” ያግድ ባለꬅኮ፥ 8 እያዉ ኤሮ ጎፓ፤ እ ገይሳ ስኦፓ። እያዉ ቃታዳ እያ ሸምፑዋ አሾፋ፤ 9 እያ ዎꬋናዉ በሴስ። እያ ዎꬋናዉ ኮይሮ ነ ዶማ፤ ሄሳፈ ጉየ፥ አሳ ኡባይ ካልድ ዎꬎ። 10 እ ሀይቃና ጋካናዉ ሹቻን ጫዳ፤ እ ነና ግብፀ ቢታፈ፥ አይለተꬃ ኬꬃፈ ከስዳ ጎዳ፥ ነ ፆሳፈ ነና ሻካናዉ ኮዬስ። 11 እስራኤለ አሳይ ሄሳ ስእድ ያያና፤ ቃስ ሄሳ መላ ኢታባ ዛሪድ ህንተ ግዶን ኦንካ ኦና።
12 ጎዳይ፥ ነ ፆሳይ ነ ዳና መላ እምዳ ካታማፐ እሱዋን ነ ደእያ ዎደ፥ 13 ነ አሳ ግዶን ኢታት ደንድድ፥ አሳኮ፥ “ኑኒ ኤሮና ፆሳታ ጎይናናዉ ደንድተ” ያግድ ባለꬅሽን ነ ስእኮ፥ 14 ሄ ሀኖታ ኦይቻ፤ ምንꬃዳ ፕልጋ። ሄ ነ ግዶን ኦሰትዳ ቱናባይ ቱማ ግደይሳ ሻካዳ ኤርኮ፥ 15 ሄ ካታማን ደእያ አሳ ኡባ ማሻን ዉርሳ፤ ሄ ካታማነ እያን ደእያ መህያ አሾና ꬋይሳ። 16 ሄ ካታማፐ ነ ኤክዳ ድኦ ኡባ ካታማ ዳባባ ሺሻዳ፥ ሄ ካታማነ እያ ድኡዋ ኡባ ጎዳስ፥ ነ ፆሳስ፥ ፁሳ ያርሾ ኦꬃዳ ዉርሳዳ ፁጋ። እ መርናዉ ዛሪድ ኬፀቶና ላለꬃ ዶረ ግድድ አታና። 17 ሀ ድገትዳ ሚሸታፐ አይብካ ነ ኩሸን በንቶፎ። ጎዳይ ባ ዎልቃማ ሀንቁዋፈ ስሚድ፥ ነና ማራና፤ እ ነዉ ቃታና። ካሰ ነ ማይዛታስ ጫቅዳ ጫቁዋዳ ነ ታይቡዋ ዳርሳና። 18 ታኒ ሀች ነና ኪትያ ኪታ ኡባ ነ ናጋዳ፥ ጎዳ፥ ነ ፆሳስ ኪተትኮ፥ ጎዳ ነ ፆሳ ኡፋይስያባ ኦꬅኮ፥ ሀ ግዳባይ ነዉ ፖለታና።
<- ዛረꬆ ማፃፋ 12ዛረꬆ ማፃፋ 14 ->