1 እስ ጋላስ ጰፅሮስነ ዮሃንስ ዎሳናዉ ኡዱፉን ሳተን ፆሳ ኬꬅ ብዶሶና። 2 የለቶሶፐ ዶምድ ዎበ ግድዳ እስ አደይ ፆሳ ኬꬅ ገልያ አሳፐ ሚሸ ዎሳና መላ ኡባ ጋላስ ሎኦ ጌተትያ ፆሳ ኬꬃ ፐንገን ኤህድ ዎꬆሶና። 3 ሄ ዎበ አደይ ጰፅሮስነ ዮሃንስ ፆሳ ኬꬅ ገላና ሀንሽን በእድ ኤንታ ሚሸ ዎስስ።

4 ኤንትካ እያ ጫድ ፄልድ፥ “ኑኮ ሃ ፄላ” ያግዶሶና። 5 ዎበ አደይ ኤንታፈ አይኮ ኤካና ዳንን ኤንታኮ ፄልስ። 6 ሽን ጰፅሮስ እያኮ፥ “ታዉ ሚሸይ ባዋ፥ ሽን ታዉ ደእያባ ታኒ ነዉ እማና። ናዝረተ የሱስ ክርስቶሳ ሱንꬃን ደንዳዳ ሄመታ” ያግስ።

7 ሄሳፈ ጉየ፥ ዎበ አድያስ ኡሻቻ ኩሽያ ኦይክድ ደንꬅስ። ኤለስድ እያ ቶሆይነ ቅንጫፍለይ ምን አግስ። 8 አደይ ጉፕድ ደንድ ኤቅስ። ገደነ ሃ ሄመꬅ ዶምስ። ሄመትሸ፥ ጉፕሸነ ፆሳ ጋላትሸ ኤንታራ እስፈ ፆሳ ኬꬅ ገልስ።

9 እ ሄመትሽንነ ፆሳ ጋላትሽን አሳ ኡባይ እያ በእዶሶና። 10 በእዳ ኡባይ ሚሸ ዎሳናዉ ሎኦ ጌተትያ ፆሳ ኬꬃ ፐንገን ኡትዳይስ፥ እያ ግድዳይሳ ኤርዶሶና፤ እ ሀንዳባ በእድ ማላለትዶሶና።

11 አደይ ጰፅሮሳፐነ ዮሃንሳፐ ዱፅከ ግድ ኦይክድ ደእሽን፥ አሳ ኡባይ ማላለትድ፥ ሶሎሞነ ባራንዳ ጌተትያ በሳን እስፈ ኤንታኮ ዎፅዶሶና። 12 ጰፅሮስ አሳ በእዳ ዎደ አሳኮ፥ “እስራኤለ አሳዉ፥ አይስ ሀይሳን ማላለተቲ? ዎይኮ አይስ ኑና ጫድ ፄለቲ? ኑኒ ኑ ዎልቃን ዎይኮ ኑ ፅሎተꬃን ሀ አድያ ሄመꬅዳባ ህንተዉ ዳኒ? 13 አብራሃመ፥ ይሳቃ፥ ያይቆባ ፆሳይ፥ ኑ አዋታ ፆሳይ፥ ባ ናኣ የሱሳ ቦንችስ። ሽን ህንተ ሀይቆስ አꬅድ እምዳይሳ ጵላፆስ ብላናዉ ኮይንካ ህንተ እያ ስንꬃን፥ ‘ኑኒ እያ ኤሮኮ’ ያግደታ። [a] 14 ህንተ ጌሻነ ፅሉዋ፥ ‘ኑኒ እያ ኤሮኮ’ ግድ፥ ሸምፖ ዎꬍዳይሳ ህንተዉ ብላና መላ ጵላፆሳ ዎስደታ። [b] 15 ደኦ እመይሳ ህንተ ዎꬍደታ፥ ሽን ፆሳይ ሀይቆፐ እያ ደንꬅስ። ሄሳስ ኑኒ ማርካ። 16 ሀ ህንተ በኤይስነ ኤርያ አደይ፥ ፓፅድ ምንዳይ የሱሳ ሱንꬃን አማንዳይሳና። ሀ ህንተ ኡባ ስንꬃን እያ ሀይሳዳ ፓꬅዳይ፥ እ የሱሳ አማንዳ ግሾሳ።

17 “ሀእካ ታ እሻቶ፥ ህንተካ ህንተና ካለይሳታዳ፥ ኤሮና ኦꬅዳይሳ ታኒ ኤራይስ። 18 ሽን ፆሳይ በን ናበታ ኡባ ዶናን፥ ‘ክርስቶስ ዋየ ኤካናዉ በሴስ’ ያግዳይስ ሀይሳዳ ፖለታና መላ ኦꬅስ። 19 ህዛ፥ ፆሳይ ህንተ ናጋራ አቶ ጋና መላ ጎዳኮ ስምተ። 20 ጎዳ ማታፐ ምንꬆ ዎደይ ህንተዉ ያና። ፆሳይ ክርስቶሳ ግዳና መላ ስንꬃትድ ዶርዳ የሱሳ ህንተዉ የዳና። 21 ፆሳይ ባ ጌሻ ናበታ ዶናን በን ኦድዳይሳ መላ ኡባባይ ኦራፅያ ዎደይ ጋካናዉ የሱሲ ሳሎን ጋምአናዉ በሴስ። 22 ሙሰይ፥ ‘ጎዳ ፆሳይ ታና ደንꬅዳይሳ መላ ህንተ ግዶፈ ህንተዉ ናበ ደንꬃና። ህንተ እ ገይሳ ኡባ ስእተ። [c] 23 ሄ ናበይ ኦደይሳ ስኦና አስ ኦንካ አሳ ግዶፈ ሻከትድ ꬋዮ’ ያግስ። [d]

24 “ቃስ ሳሜላፐ ዶምድ ደእያ ናበት ኡባይ ሀ ዎድያባ ኦድዶሶና። 25 ህንተ ናበታ ናይታ፤ ቃስ ፆሳይ አብራሃመስ፥ ‘ሳአን ደእያ አሳ ኡባ ታኒ ነ ሼሻ ባጋራ አንጃና’ ያግድ ኑ አዋታስ ገልዳ ቃላ ላትያ ናይታ። [e] 26 ፆሳይ ህንተና ኡባ ህንተ ኢታ ኦገፐ ዛሪድ አንጃና መላ ባ ናአ ደንꬅድ ህንተዉ ኮይሮ የድስ” ያግስ።

<- ሀዋረታ ኦሶ 2ሀዋረታ ኦሶ 4 ->