1 ካሰይሳዳካ፥ ጳዉሎስነ ባርናባስ እቆንዮነን አይሁደታ ዎሳ ኬꬅ ገልድ ዳሮ አይሁደትነ አይሁደ ግዶናይሳት አማናና ጋካናዉ ቃላ ኦድዶሶና። 2 ሽን አማንቦና አይሁደት፥ አይሁደ ግዶናይሳታ ዎዛና ላምድ እሻታ ቦላ ደንꬅዶሶና። 3 ሀዋረት ያን ዳሮ ዎደ ጋምእዶሶና። ኤንቲ ያዮና ጎዳባ ኦድዶሶና። ጎዳይ ማላታታነ ኦራꬃባ ኤንቲ ኦꬃና መላ ኤንታዉ ማታ እምድ፥ እ ባ አꬎ ኬሀተꬃ ቃላይ ቱማ ግደይሳ ቆንጭስስ። 4 ሽን ሄ ካታማ አሳይ ሻከትድ፥ ባጋይ አይሁደታራ ባጋይ ቃስ ሀዋረታራ ግድስ።

5 አይሁደ ግዶናይሳትነ አይሁደት ባንታ ሀላቃታራ እስፈ ግድድ ሀዋረታ ቆሀናዉነ ሹቻን ጫዳናዉ ኮይዶሶና። 6 ሀዋረት ሄሳ ኤርድ፥ ልስፅራነ ዳርበ ጌተትያ ልቃኦና ካታማታነ ኤንታ ሄራን ደእያ ቢታ ባቃትዶሶና። 7 ያን ዎንገላ ኦድዶሶና።

8 የለቶሳፐ ዶምድ ናምኡ ቶሆይ ዎቢን ሄመት ኤሮና እስ አደይ ልስፅራን ደኤስ። 9 ሄ አደይ ጳዉሎስ ኦድሽን ኡትድ ስኤስ። ጳዉሎስ እያ ትሽ ኦꬅ ፄልያ ዎደ ፓፃናዉ እያዉ አማኖይ ደኤይሳ በእድ፥ 10 ባ ቃላ ꬎቁ ኦꬅድ፥ “ስት ጋዳ ነ ቶሁዋን ኤቃ” ያግስ። ያትን፥ ጉፕ ደንድ ኤቅድ ሄመꬅ ዶምስ።

11 ጳዉሎስ ኦꬅዳይሳ አሳይ በእድ ባንታ ቃላ ꬎቁ ኦꬅድ ልቃኦና ዶናን፥ “ፆሳት አሰ ዳንድ ኑኮ ዎꬍዶሶና” ያግዶሶና። 12 ባርናባሳ፥ “ድያ” ግድ፥ ጳዉሎስ ኦዳን ዋናትያ ግሾ፥ እያ፥ “ሄርመና” ግድ ሱንꬅዶሶና። 13 ካታማፐ ጋፃን ደእያ ኤቃ ድያ ኬꬃ ካህነይነ አሳይ ኮርማታነ አሌቆ ጪሻታ ሀዋረታስ ያርሻናዉ ኮይድ ካታማ ፐንገ ኤህዶሶና።

14 ሽን ባርናባስነ ጳዉሎስ ሄሳ ስእዳ ዎደ ኤንቲ ኦꬃናዉ ቆፕዳይሳ እፅድ፥ ባንታ ማኡዋ ፔꬍዶሶና። አሳ ግዶ ዎፅ ገልድ፥ 15 ባንታ ቃላ ꬎቁ ኦꬅድ፥ “አሳዉ፥ ሀይሳ አይስ ኦቲ? ኑካ ህንተ መላ አሰ። ሀ ፓꬆናባፐ ሳሎነ ሳአ፥ አባነ ኤንታ ግዶን ደእያ ኡባባ መꬍዳ ደኦ ፆሳኮ ህንተ ስማና መላ ህንተዉ ኑኒ ዎንገላ ኦዶስ። [a] 16 እ፥ በን አሳይ ባንታ ኦገ ባና መላ የድ አግስ። 17 ሽን እራ ሳሉዋፐ ቡክስስ፥ ካꬃካ ዎድያን ዎድያን እሚስ፥ ካꬅ እምድ ህንተና ዳሮ ኡፋይስስ፥ ያትድ ህንተዉ ሎኦባ ኦꬅድ ባዉ ማርካ ꬋይስቤና” ያግዶሶና። 18 ሀዋረት ሄሳ ግድ፥ ባንታዉ አሳይ ያርሾና መላ ዋይድ ድግዶሶና።

19 አንፆከፐነ እቆንዮነፐ ይዳ አይሁደት፥ አሳ ባንታ ባጋ ዛሪድ ሹቻን ጳዉሎሳ ጫድዶሶና። እ ሀይቅዳባ ዳንን ካታማፐ ጋፃ ጎች ኤፍድ የግዶሶና። 20 ሽን አማነይሳት ይድ፥ እያ ዩሾን ኤቅዳሽን እ ደንድድ ካታማ ገልስ። ዎንተꬃ ጋላስ ባርናባሳራ እስፈ ዳርበ ብስ።

21 ኤንቲ ዳርበ ካታማን ዎንገላ ኦድድ ዳሮታ አማንꬅዳፐ ጉየ ልስፅራ፥ እቆንዮነነ ጵስደን ደእያ አንፆከ ስምዶሶና። 22 ያን አማነይሳታ ምንꬅሸነ ኤንቲ አማኖን ምንድ ደአና መላ ዞርሸ፥ “ፆሳ ካዎተꬃ ገላናዉ ኑኒ ዳሮ ዋየ ኤካናዉ በሴስ” ያግድ ታማርስዶሶና። 23 ቃስ ዎሳ ኬꬃታስ ሁጰን ሁጰን ጭማታ ዶርዶሶና። ፆምዳፐነ ዎስዳፐ ጉየ ኤንቲ አማንዳ ጎዳስ ኤንታ ሀዳራ እምዶሶና።

24 ጵስደ ቢታ ካንꬅ አꬍድ ጵንፍለ ብዶሶና። 25 ጰርገን ቃላ ኦድዳፐ ጉየ አፃለ ብዶሶና። 26 ባንታ ኦሱዋ ፖልዳፐ ጉየ፥ አፃለፕ ፆሳ አꬎ ኬሀተꬃስ ኤንታ ሀዳራ እምዳ አንፆከ ማርካበራ ጉየ ስምዶሶና።

27 አንፆከ ጋክዳ ዎደ ዎሳ ኬꬃ አሳ ሺሽድ ፆሳይ ኤንታራ ኦꬅዳ ኦሱዋ ኡባነ አይሁደ ግዶና አሳይ አማናና መላ ኤንታዉ ዋት ፐንገ ዶይዳኮ ኦድዶሶና። 28 ሄሳን አማነይሳታራ ዳሮ ዎደ ጋምእዶሶና።

<- ሀዋረታ ኦሶ 13ሀዋረታ ኦሶ 15 ->