1 ሄሳፈ ጉየ፥ ዳዊቲ፥ “ይሁዳ ካታማታፐ እሱዋ ቦ?” ያግድ ጎዳ ኦይችስ።

ጎዳይ፥ “ኤ፥ ባ” ያግስ።

ዳዊቲ፥ “አዉ ቦ” ያግድ ኦይችስ።

ጎዳይ፥ “ከብሮና ባ” ያግድ ዛርስ።

2 ዳዊቲ ባ ናምኡ ማቸታ፥ እዝራኤለ አክናሆማነ ካሰ ናባላ ማችዉ ቃርመሎሳ አብግያ ኤክድ ከብሮና ካታማ ብስ። 3 ዳዊቲ ባራ ደእያ አሳታነ ኤንታ ሶ አሳ ኡባ ኤህን፥ ከብሮናንነ እያ ሄራን ደእያ ካታማታን ደእዶሶና። 4 ይሁዳ አሳት ከብሮና ካታማ ይድ፥ ዳዊታ ትይድ ይሁዳ ቦላ ካዎꬅዶሶና።

ዳዊቲ ያበሳ ጋላዳ አሳይ ሳኦላ ሞግዳይሳ ስእዳ ዎደ፥ 5 እ አሰ ኪትድ፥ “ህንተ ህንተ ጎዳ ሳኦላ ሞግዳ ግሾ ሄ ኬሀተꬃስ ጎዳይ ህንተና አንጆ። 6 ጎዳይ ሲቁዋነ ቱማተꬃ ህንተዉ ቆንጭሶ፤ ታንካ ሀ ኬሀተꬃ ግሾ ህንተዉ ሎኦ ኩሸ ዛራና። 7 ህዛ ምንተ፤ ፃልተ፤ ህንተ ጎዳይ ሳኦል ሀይቅስ። ይሁዳ አሳይ ታና ትይድ፥ ባንታ ቦላ ካዎꬅዶሶና” ያግስ።

8 ሳኦላ ቶራ ሞጮናይ ኔራ ናአይ አበኔር ሳኦላ ናኣ እያቡስተ ኤክድ፥ ማህናይማ ጌተትያ በሳ ኤፍስ። 9 እያ ጋላዳን፥ አሴራን፥ እዝራኤላን፥ ኤፍሬማን፥ ብንያመንነ እስራኤለ ቢታ ኡባን ካዎꬅስ። 10 ሳኦላ ናአይ፥ እያቡስተይ እስራኤለ ቦላ ካዎትያ ዎደ እያዉ ኦይታሙ ላይꬅ፤ እ ናምኡ ላይꬅ ካዎትስ። ግዶሽን፥ ይሁዳ አሳይ ዳዊታ ካልዶሶና። 11 ዳዊቲ ከብሮናን ይሁዳ ቦላ ላፑን ላይꬅነ ባጋ ካዎትስ።

12 ኔራ ናአይ አበኔርነ ሳኦላ ናአይ እያቡስተ አሳይ ማህናይማፐ ጋባኦና ብዶሶና። 13 ፃሩያ ናአይ እዮኣብነ ዳዊታ አሳይ ጋባኦና ኦላ ሃꬃ ማታን ኤንታራ ጋሄትዶሶና። እስ ጩጋይ ኦላ ሃꬃፈ ሄፍንꬃን ኡትን፥ እስ ጩጋይ ሀፍንꬃን ኡትስ። 14 አበኔር እዮኣባኮ፥ “አነ ህንተፈነ ኑፐ ፓንꬃት ደንድድ፥ ኑ ስንꬃን ኦለቶ” ያግስ።

እዮኣብ፥ “ኤሮ፥ ደንድድ ኦለቶ” ያግስ። 15 ሄሳ ግሾ፥ ብንያመፐ ሳኦላ ናኣ እያቡስተስ ታማነ ናምኡ አሳት ከይድ፥ ዳዊታስ ኤቅዳ ታማነ ናምኡ አሳታራ ኦላ ጋሄትዶሶና። 16 እሶይ እሶይ ባ ሞርክያ ሁጵያ ኦይክድ፥ ማሻን ምየን ጫድስ፤ ሄሳዳ ሀንድ ላታማነ ኦይዳይ ሀይቅዶሶና። ሄሳ ግሾ ጋባኦናን ደእያ ሄ በሳይ ማሻ ቢታ ጌተትስ። 17 ሄ ጋላስ ዎልቃማ ኦላ ኦለትድ፥ ዳዊታ አሳይ አበኔራነ እስራኤለ አሳ ፆንስ።

18 ፃሩያ ናይት ሄꬓይ እዮኣብ፥ አብስነ አሳሄል ሄ በሳን ደኦሶና፤ አሳሄል ዎሽኤዳ ኤሶን ዎፅድ፥ 19 አሳሄል አበኔራ ኡሻች ዎይኮ ሀድርስ ጎና የደꬅስ። 20 አበኔር ጉየ ስሚድ፥ “አሳሄላ፥ ነኔ?” ያግድ ኦይችስ።

አሳሄል፥ “ኤ ታና” ያግስ።

21 አበኔር፥ “ኡሻች ዎይኮ ሀድርስ ስማዳ፥ አሳታፐ እሱዋ ኦይካዳ እያ ኦላ ሚሽያ ኤካ” ያግስ። ሽን አሳሄል እያ የደይሳ አጎና እፅስ።

22 ቃስካ አበኔር፥ “ታኒ ነና ሳአራ ጋꬃዳ ኦይꬆና ደእሽን፥ ታና የደይሳ አጋ! ነና ዎꬋዳ ታኒ ነ እሻ እዮኣባ ሶምኡዋ ዋታዳ ፄላኔ?” ያግድ ዋስስ። 23 ሽን አሳሄል እያ የደይሳ አጎና እፅስ። ሄሳ ግሾ፥ አበኔር ቶራ ጉየ የድድ፥ አሳሄላ ኡሉዋ ጫድን ቶራይ ዞኮራ ካንꬅድ ከይስ። አሳሄል ሄ በሳን ኩንድድ ሀይቅስ፤ አሳሄል ሀይቅዳ በሳ ጋክዳ አሳ ኡባይ ያን ኤቅስ።

24 ሽን እዮኣብነ አብስ አበኔራ ጎድዶሶና፤ አው ዉልያ ዎደ ጋባኦና መላ ቢታኮ ኤፍያ ኦግያን ጋዳፐ ስንꬃ ባጋራ ደእያ አማ ዙማኮ ጋክዶሶና። 25 ብንያመ አሳይ አበኔራኮ ሺቅዶሶና፤ እስ ጩጋ መꬍድ እስ ዙማ ቦላ ኤቅዶሶና። 26 አበኔር እዮኣባ ፄግድ፥ “መርናዉ ኦለትሸ ዳነዬ? ሀይሳ ዉርሰꬃይ ጫሞ ግዳናይሳ ኔኒ ኤርኪ? ነ አሳይ፥ ባንታ እሻታ ጎደይሳ አጋና መላ አይስ ኦድኪ?” ያግስ።

27 እዮኣብ፥ “ደኦ ፆሳይ ኤሮ! ኔኒ ኦዶናባ ግድያኮ ታ አሳይ ባ እሻታ ሳእ ዎንታና ጋካናዉ ጎዳ አጎኮና” ያግስ። 28 እዮኣብ ሞይዘ ፑንን አሳ ኡባይ ኤስስ። እስራኤለታ ዛር ጎድቦኮና ዎይኮ ኦልቦኮና። 29 አበኔርነ እያ አሳይ ሄ ቃማ ኩመꬅ ሄመትድ አራባ ጋꬋ ጋክዶሶና። ዮርዳኖሰ ሻፋ ፕንድ፥ በትሮና ካንꬅድ ማህናይመ ይዶሶና።

30 እዮኣብ አበኔራ ጎደይሳ አግድ፥ ባ አሳ ኡባ እስ በሲ ሺሽድ ፄልያ ዎደ፥ አሳሄላ ጉጆና ዳዊታ አሳፐ ታማነ ኡዱፉን አስ ፓጭስ። 31 ሽን ዳዊታ አሳይ አበኔራራ ደእያ ብንያመ ኮቻታፐ ሄꬑ ፄታነ ኡሱፑን ታሙ አስ ዎꬍዶሶና። 32 አሳሄላ አሀ ኤክድ፥ ቤተለመ ካታማን ደእያ እያ አዋ ዱፎን ሞግዶሶና። እዮኣብነ እያ አሳይ ቃማ ኩመꬅ ሄመትድ ሳእ ዎንትያ ዎደ ከብሮና ጋክዶሶና።

<- 2 ሳሜላ ማፃፋ 12 ሳሜላ ማፃፋ 3 ->