1 ዳዊቲ ደርያ ሁጵያራ ሄፍንꬅ አꬍሽን፥ ሲባ ጌተትያ መምፕቦስተ አይለይ እያራ ጋሄትስ። ናምኡ ፄቱ ኡይꬁ፥ እስ ፄቱ ዛብበ ኑካ፥ እስ ፄቱ ትያ አይፈ፥ እስ ኦጎሮ ዎይነ ኡሹ ናምኡ ሀረታን ጫንስ።

2 ካዎይ፥ “ሀይሳ አይስ ኤሀዲ?” ያግድ ኦይችስ።

ሲብ፥ “ሀረታ፥ ካዋ ሶ አሳይ ቶጋና መላ፥ ኡይꬃነ ትይያ አይፍያ አሳይ ማና መላነ ዎይነ ኡሻይ ባዞን ዳቡርያ አሳት ኡያና መላሳ” ያግስ።

3 ካዎይ፥ “ነ ጎዳ ናኣ ናአይ አዉን ደኢ?” ያግድ ኦይችስ።

ሲብ፥ “ ‘እስራኤለ አሳይ ታ አዋ ካዎተꬃ ሀች ታዉ ዛር እማና’ ያግድ የሩሳላመን ኡትስ” ያግስ።

4 ካዎይ፥ “መምፕቦስተስ ደእያባ ኡባይ ነዉ ግዶ” ያግስ።

ሲብ፥ “አቤት ጎዳዉ፥ ካዋዉ! ታኒ ነ ስንꬃን ቴሞ ደማይስ” ያግድ ቢታን ጉፋንዳ ዝጋይስ።

5 ካዎይ ዳዊቲ ብራቅማ ካታማ ያ ዎደ ሳኦላ ዳቦ ግድዳ እስ አደይ ያፐ ከይስ። እያ ሱንꬃይ ጌራ ናኣ ሳም። እ ዳዊታ ባድሸ ከይስ። 6 ኦላንቾትነ ካዋ ናገይሳት ኡሻቻራነ ሀድርሳራ ዳዊታ ተቅድ ደእሽን፥ ሳም ዳዊታ ቦላነ ካዋ ሞርናታ ቦላ ሹቹ ሆልስ። 7 ሳም ዳዊታ ባድሸ፥ “ክቻ፤ ሀ ኢታይ ክቻ! አሳ ሱꬁ ጉስያ ሀ ፓꬆናይስ ክቻ። 8 ኔኒ ሳኦላ በሳን ካዎታዳሳ፤ ኔኒ ጉስዳ ሳኦላ ሶ አሳ ሱꬃ ኡባ ጎዳይ ነ ቦላ ዛርስ። ጎዳይ ካዎተꬃ ነ ናኣ አበሰሎመስ እሚስ፤ ኔኒ ሱꬁ ጉስዳ አስ ግድያ ግሾ፥ ነዉ ꬋዮ ዎደይ ጋክስ” ያግስ።

9 ሄሳፈ ጉየ፥ ፃሩያ ናአይ አብስ፥ ካዋኮ፥ “ሀ ባዉታ ካናይ፥ ታ ጎዳ ካዋ አይስ ባዲ? ታኒ ባዳ እያ ቆꬍያ ቃንፃና” ያግስ።

10 ካዎይ፥ “ህንተኖ፥ ፃሩያ ናይቶ፥ ህንተራ ታራ አይብ ጋꬂ? ጎዳይ፥ ‘ዳዊታ ባዳ’ ያግዳ ግሾ እ ባድያባ ግድኮ፥ ‘ኔኒ አይስ ሄሳ ኦꬃይ?’ ያግድ ኦይቻናዉ ዳንዳኤይ ኦኔ?” ያግስ።

11 ሄሳፈ ጉየ፥ ዳዊቲ አብሳነ ባ ሞርናታ፥ “ታ ናአይ፥ ታ አሾይ፥ ታና ዎꬋናዉ ኮዬስ፤ ያትን፥ ሀ ብንያመ አደይ ዋት አጋነ! ጎዳይ እያ ኪትዳ ግሾ እ ባዴስ፥ እያ ቦቾፍተ። 12 ኦን ኤር፥ ጎዳይ ታ መቱዋ በእድ፥ ታኒ ሀች ኤክያ ባደꬃ ግሾ ታዉ ኬሀ ቆፓኔኮ” ያግስ።

13 ሄሳፈ ጉየ፥ ዳዊቲነ እያ አሳይ ኦግያ ኦይክድ ቦሶና። ሳም ዙማ ምያራ ብሸ ዳዊታ ባዴስ፤ ሹቹ ሆሌስ፤ እያ ቦላ ቢታ ላሌስ። 14 ካዎይነ እያራ ደእያ አሳት ባንታ ብያ በሳ ዳቡርድ ጋክን ካዎይ ያን ሸምፕስ።

15 አበሰሎመይነ እስራኤለ አሳ ኡባይ የሩሳላመ ገልዶሶና፤ አክፆፈል ኤንታራ ደኤስ። 16 ዳዊታ ላገይ አርካያ ኮቻይ ኩስ አበሰሎመኮ ይድ፥ “ካዎይ ብራታ ቱሱ ግዶ! ካዎይ ሙኩሉ ላይꬅ ካዎቶ!” ያግስ።

17 አበሰሎመይ፥ “ኔኒ ነ ላግያ ዶስያ ዶሶይ ሀይሴ? ነ ላግያራ አይስ ባብኪ?” ያግስ።

18 ኩስ፥ “አካይ! ጎዳይ፥ ሀ አሳይነ እስራኤለ አሳይ ዶርዳይሳስ ታኒ አቃና፤ ታኒ እያራ አታና። 19 ህዛ ታኒ ታ ጎዳ ናኣስ ኦꬆና ኦደስ ኦꬃኔ? ታኒ ነ አዋስ ኦꬅዳይሳዳ ሀእ ነዉካ ኦꬃና” ያግስ።

20 አበሰሎመይ አክፆፈላኮ፥ “ኔኒ አነ ኑና ዞራ፤ ኑኒ አይ ኦꬅኖ?” ያግስ።

21 አክፆፈል፥ “ካዎ ጋꬎ ናጋናዉ ሶን አትዳ ነ አዋ ላገꬆታራ ባዳ ዝንአ። ኔኒ ነ አዋ ካዉሽዳይሳ እስራኤለ አሳ ኡባይ ስአና፤ ኔራ ደእያ ኡባ ኩሸይ ምናና” ያግስ። 22 ካዎ ኬꬃ ፖቅያ ቦላ አበሰሎመስ ዱንካነ ቶክዶሶና፤ አሳ ኡባይ ፄልሽን አበሰሎመይ ገልድ ባ አዋ ላገꬆታራ ዝንእስ።

23 ሄ ዎደ አክፆፈል ዞርያ ዞረይ እስ አስ ጎዳ ኦይችድ ኤክያ ዞረ መላ። ዳዊቲነ አበሰሎመይ አክፆፈላ ዞርያ ሄሳዳ ኦꬅድ ኤክዶሶና።

<- 2 ሳሜላ ማፃፋ 152 ሳሜላ ማፃፋ 17 ->