1 ይሁዳ ካዎይ እዮሳፈፅ ካዎትዳ ታማነ ሆስፑንꬆ ላይꬃን፥ አካባ ናአይ እዮራም ሳማረን እስራኤለ ቦላ ካዎትስ፤ እ ታማነ ናምኡ ላይꬅ ካዎትስ። 2 እ፥ ጎዳ ስንꬃን ኢታባ ኦꬅስ። ሽን ባ አዋነ ባ አየ ኤልዛቤል መላ ኢታ ግደና፤ እያ አዋይ ኦꬅዳ ባኣለ ኤቃ ድግስ። 3 ናባፃ ናአይ እዮርባም እስራኤለ አሳ ኦስስዳ ናጋራን ኦይከትስ፤ እያፐ ሃክቤና።

4 ሞአበ ካዎይ ሞስ ዶርሰ ሄምያ አስ። እ እስራኤለ ካዋስ 100,000 አንቃራ ዶርሳታነ 100,000 ኡርገ ዶርሳታ እክስያ ላይꬃን ላይꬃን ጊሬስ። 5 ሽን እስራኤለ ካዎይ አካብ ሀይቅዳፐ ጉየ፥ ሞአበ ካዎይ ሞስ እስራኤለ ቦላ ማካልስ።

6 ሄ ዎደ ካዎይ እዮራም ሳማረ ከይድ፥ እስራኤለ ኡባ ሺሽስ። 7 ይሁዳ ካዋ እዮሳፈፅ ኪታ የድድ፥ “ሞአበ ካዎይ ታ ቦላ ማካልስ፤ ሞአበራ ኦለታናዉ ኔኒ ታራ ባኔ?” ያግስ።

እዮሳፈፅ፥ “ኤ ባና፤ ታኒ ነና፤ ታ አሳይ ነ አሰ፤ ታ ፓራይ ነ ፓራ ያግድ” ዛርስ። 8 እዮሳፈፅ፥ “ኑኒ አዉራ ብድ ኤንታ ኦላኔ?” ያግድ ኦይችስ።

ካዋ እዮራም፥ “ኤዶመ መላ ቢታ ኦግያራ ካንꬅ ብድ ኦላና” ያግድ ዛርስ።

9 ሄሳ ግሾ፥ እስራኤለ ካዎይ፥ ይሁዳ ካዎይነ ኤዶመ ካዎይ ኦላስ ከይዶሶና። ኤንቲ ላፑን ጋላሳ ኦገ ዩይድ ብዳፐ ጉየ፥ ኦላንቾታስነ ኤንታ መህያስ አይብ ሃꬅ አትቤና። 10 ሄ ዎደ እስራኤለ ካዎይ፥ “ጎዳይ ኑና ሀ ሄꬑ ካዎታ እስፈ ሞአበ ካዋስ አꬅድ እማናዉ ፄግዳ ግሾ ኑና አየ!” ያግስ። 11 ሽን እዮሳፈፅ፥ “ኑኒ እያ ባጋራ ጎዳ ኦይቻናዉ ሀይሳን ናበይ ባዌ?” ያግድ ኦይችስ።

እስራኤለ ካዋ ቶራ ሞጮናታፐ እሶይ፥ “ኤልያሳ ኩሸን ሃ ቆልያ ሳፋፃ ናአይ ኤልስ ሀይሳን ደኤስ” ያግድ ዛርስ። 12 እዮሳፈፅ፥ “ኤ፥ እ ቱማ ናበ” ያግስ። እስራኤለ ካዎይ፥ እዮሳፈፅ፥ ኤዶመ ካዎይነ ኤልሳኮ ብዶሶና።

13 ኤልስ እስራኤለ ካዋኮ፥ “ታናነ ነና ጋይ አይቤ? ባዳ ነ አዋይነ ነ አይያ ኦይችዳ ናበታ ኦይቻ” ያግስ።

እስራኤለ ካዎይ ዛሪድ፥ “አካይ፥ ሀ ሄꬑ ካዎታ እስፈ ሞአበ ካዋስ አꬅድ እማናዉ ኑና ፄግዳይ ጎዳባይ!” ያግስ።

14 ኤልስ፥ “ታኒ እያዉ ኦꬅያ ደኦ ጎዳይ ኤሮ! ይሁዳ ካዋ እዮሳፈፃ ግሾ ጎናኮ ታኒ ነና አይፈንካ ፄልከሽን። 15 አነ ሀእ ታዉ ዲꬅ ዲፅያ አስ ኤህተ” ያግስ።

ዲፀይስ ዲፅሽን፥ ጎዳ ዎልቃይ እያ ቦላ ዎꬍስ። 16 ኤልስ፥ “ሀ መላ ዛንጋራ ኡባን ኦላ ቦክተ። 17 ጎዳይ፥ ‘ጫርኮ ዎይኮ እራ በኤከታ፥ ሽን ሀ ቦክዳ ዛንጋራን ሃꬅ ኩማና፤ ህንተ፥ ህንተ መሄይነ ህንተ ጫና መሄይ ኡያና’ ያጌስ። 18 ሀይስ ፆሳ ስንꬃን ላፋባ፤ ቃስ እ ሞአበ ህንተዉ አꬅድ እማና። 19 ግምበትዳ ካታማታነ ግታ ካታማታ ኡባ ህንተ ፆናና። ሎኦ ምꬃታ ኡባ ቃንፃና፤ ሃꬃ ፑልቶታ ኡባ ህንተ ባራና፤ አራዳ ሾቃታ ኡባ ኢስድ ሹች ኩምዳ ቢታ ኦꬃና” ያግስ።

20 ዎንተꬃ ጋላስ ዎንታ ያርሾ ያርሽያ ዎደይ ጋክን፥ ኤዶመ ባጋራ ሃꬅ ጎግድ፥ ቢታን ኤልስ።

21 ሞአበ አሳይ፥ ሄꬑ ካዎት ኤንታ ኦላናዉ ይዳይሳ ስእድ፥ ናአተꬅ፥ ጭም፥ ኦላ ሚሸ ቶካናዉ ዳንዳእያ አሳ ኡባይ ፄገትድ፥ ባንታ ቢታ ዛዋ ናግዶሶና። 22 ኤንቲ ጉራ ደንድያ ዎደ ሃꬃ ቦላ ዎꬍዳ ፃልቀይ ዞእድ፥ ኤንታዉ ሱꬁ ዳንድ በንትስ። 23 ኤንቲ፥ “ሀይሳ ሱꬃ በእተ! ካዎት ባንታ ግዶን እሶይ እሱዋራ ኦለትድ፥ ሀይቅ ዉርዶሶና። ሞአበ ብድ፥ አነ ኤንታ ሚፃ ቆጭሮስ” ያግዶሶና።

24 ሞአበ አሳይ እስራኤለ ሚፃ ብን፥ እስራኤለት ደንድድ፥ ኤንታ ሾጭዶሶና። ሾጭድ ኤንታ ቢታ ኦይክድ፥ ሞአበ አሳ ዎꬍዶሶና። 25 ካታማታ ኦልድ ꬋይስዶስና። አሳ ኡባይ ሁጰን ሁጰን እስ እስ ሹቹ ኤክድ፥ አራዳ ሾቃት ኡባይ ካመታና ጋካናዉ፥ ኤንታ ቦላ ሆልዶሶና። ፑልቶ ኡባ ባርድ፥ ሎኦ ምꬃ ኡባ ቃንፅዶሶና። ቅር-ሄሬሰራ ካታማ ግምብያ ፃላል አትስ፤ ሽን ያምባርሻን ኦልያ አሳት ሄ ካታማ ሾጭዶሶና።

26 ሞአበ ካዎይ ኦላይ ባ ቦላ ጎብዳይሳ በእዳ ዎደ ማሻ ዳንጭዳ ላፑን ፄቱ አሳታ ኤክስ። ኦላ ግዱዋ ዳክድ፥ ኤዶመ ካዋኮ ፕናናዉ ደንድስ፤ ሽን እያዉ ሀኖና እፅስ። 27 ሄሳፈ ጉየ፥ ባ በሳን ካዎታናዉ ደእያ ባ ባይራ ናኣ ኤክድ፥ ካታማ ግምብያ ቦላ ታማን ፁግድ ያርሽስ። ሞአበት እስራኤለታ ቦላ ሀንቆ ሱልዶሶና። እስራኤለት ሄ ካታማ አግድ፥ ባንታ ቢታ ስምዶሶና።

<- 2 ካዎታ ማፃፋ 22 ካዎታ ማፃፋ 4 ->