3 ኑ ኦድያ ዎንገላይ ጌምዳባ ግድኮካ፥ ጌምዳይ ꬋዮ ኦገን ደእያ አሳሳ። 4 ሀ አላምያ ሃርያ ፆሳይ አማኖና አሳ ዎዛና ጎዝስ። ኤንቲ ፆሳ መላ ግድዳ ክርስቶሳ ቦንቾ ዎንገላ ፖኡዋ በኦና መላ ድግስ። 5 ኑኒ፥ የሱስ ክርስቶሲ ጎዳ ግደይሳነ ኑ እያ ግሾ ህንተ ኦሳንቾ ግደይሳ ኦዶስፐ አትሽን፥ ኑባ ኦዶኮ። 6 “ꬉማን ፖኦይ ፖኦ” ግዳ ፆሳይ፥ ክርስቶሳ ሶምኡዋን ፖእያ ፆሳ ቦንቹዋ ኤራ ፖኡዋ እማናዉ ባ ፖኡዋ ኑ ዎዛናን ፖእስስ። [a]
7 ሽን ኡባፈ አꬍያ ዎልቃይ ኑባ ግዶናሽን፥ ፆሳባ ግደይሳ በሳናዉ ሀ ቦንቾ ሻሎይ መቃ ሚሸ [b] ግድዳ ኑ አሳተꬃን ደኤስ።
8 ኑ ኡባ ባጋራካ ዋየትዳ፥ ሽን መቀረትቦኮ። ኑስ ሀድርስ ግድስ፥ ሽን ኡፋይስ ቃንፅቦኮ። 9 ኑ፥ ሞርከታን ጎደትዳ፥ ሽን ላገ ꬋይቦኮ። ኑ ሞርከታን ሾጨትድ ኩንድዳ፥ ሽን ꬋይቦኮ። 10 የሱሳ ደኦይ ኑ አሳተꬃን ቆንጫና መላ እያ ሀይቁዋ ኡባ ዎደ ኑ አሳተꬃን ቶክድ ዩዮስ። 11 የሱሳ ደኦይ ሀይቅያ ኑ አሳተꬃን ቆንጫና መላ ፓፃ ደእያ ኑኒ እያ ግሾ፥ ኡባ ዎደ ሀይቆስ አꬍድ እመቶስ። 12 ህዛ፥ ሀይቆይ ኑናን ኦꬅያ ዎደ ደኦይ ህንተናን ኦꬄስ።
13 ጌሻ ማፃፋን፥ “ታ አማናስ፤ ሄሳ ግሾ ኦዳስ”[c] ያገትስ። ሄሳ መላ አማኖይ ኑስ ደእያ ግሾ ሃሳዮስ። 14 ጎዳ የሱሳ ሀይቆፐ ደንꬅዳ ፆሳይ፥ ኑናካ የሱሳራ ሀይቆፐ ደንꬃናይሳነ ህንተራ እስፈ ባ ስን ሺሻናይሳ ኤሮስ። 15 ሄስ ኡባይ ሀንዳይ ህንተ ግሾሳ። ፆሳ አꬎ ኬሀተꬃይ ዳሮ አሳ ጋክያ ዎደ አሳይ ፆሳ ቦንቹዋስ ዳሮ ጋላታ እማና።
16 ሄሳ ግሾ፥ ኑኒ ኡፋይስ ቃንፆኮ። ኑ በንትያ አሳተꬃይ ዳቡርሸ ብያባ ግድኮካ፥ ኑ አያና አሳተꬃይ ጋላስ ጋላስ ኦራፄስ። 17 ሀእስ ኑኒ ዋየትያ ሀ ካዉሻ ዋየይ፥ ኡባፈ ኬህ ግታትያ መርና ቦንቹዋ ኑስ እምሳና። 18 ኑኒ በንትያባ ግዶናሽን፥ በንቶናባ ፄሎስ። በንትያባይ ሀእሳ፥ ሽን በንቶናባይ መርናሳ።