1 ፍልስፄመት ፆሳ ታቦትያ ድእዳፐ ጉየ አበንኤዘራፐ አሽዶዳ ኤፍዶሶና። 2 ፆሳ ታቦትያ ኤፍድ፥ ዳጎነ ኤቃ ኬꬃን ገልስድ፥ ዳጎነ ምስልያ ማታን ዎꬅዶሶና። 3 አሽዶዳ አሳይ ዎንተꬃ ጋላስ ጉራ ደንድድ በእያ ዎደ ጎዳ ታቦትያ ስንꬃን ዳጎን ጉፋንዳይሳ በእዶሶና። ዳጎነ ደንꬅድ፥ ካሰ በሳን ኤስዶሶና። 4 ቃስ ዎንተꬃ ጋላስ ጉራ ደንድድ በእያ ዎደ ጎዳ ታቦትያ ስንꬃን ዳጎን ሳአን ጉፋንዳይሳ በእዶሶና። ሄ ዎደ ዳጎነ ሁጰይነ እያ ናምኡ ኩሸይ መቅድ ፐንግያ ቦላ ደኤስ፤ ሀንኮ አሳተꬃይ ዱማ አትስ። 5 ሀች ጋካናዉ ዳጎነ ካህነትነ አሽዶዳን ደእያ ዳጎነ ኬꬃ ገልያ አሳት ኡባይ ዳጎነ ፐንግያ የꬎና ፃምባል አይ ሄሳ ግሾሳ።

6 አሽዶዳ ካታማ ቦላነ እያ ሄራን ደእያ አሳ ቦላ ጎዳ ኩሸይ ዴፅስ፤ ጎዳይ ክፃ ሀርገ የድድ ኤንታ ሴርስ።

7 አሽዶዳ ካታማ አሳይ ሀንዳባ በእዳ ዎደ፥ “እስራኤለ ፆሳ ኩሸይ ኑ ቦላነ ኑ ፆሳ ዳጎነ ቦላ ዴፅዳ ግሾ፥ እስራኤለ ፆሳ ታቦተይ ኑ ማታን ጋምኦፎ” ያግዶሶና። 8 ሄሳ ግሾ፥ እቻሹ ፍልስፄመ ሀላቃታ ኡባ ፄግድ፥ “እስራኤለ ፆሳ ታቦትያ ዋትኖ?” ያግድ ኦይችዶሶና።

ሀላቃት፥ “እስራኤለ ፆሳ ታቦተይ ጋተ ካታማ ቦ” ያግድ ዛርዶሶና። እስራኤለ ፆሳ ታቦትያ ጋተ ኤፍዶሶና።

9 ሽን ታቦተይ ጋተ ጋክዳፐ ጉየ፥ ጎዳ ኩሸይ ሄ ካታማ ቦላ ዴፅድ፥ ዳሮ ዳጋንꬅስ። ካታማን ደእያ አሳ ናአፐ ጭማ ጋካናዉ ክፃ ሀርገን ሾጭስ። 10 ሄሳ ግሾ፥ ፆሳ ታቦትያ ኤቅሮና ካታማ የድዶሶና።

ፆሳ ታቦተይ ኤቅሮና ገልያ ዎደ፥ ኤቅሮና አሳይ፥ “ኑናነ ኑ አሳ ꬋይሳናዉ እስራኤለ ፆሳ ታቦትያ ኑኮ ኤህዶሶና” ያግድ ዋስዶሶና። 11 ሄሳ ግሾ፥ ኤንቲ ፍልስፄመ ሀላቃታ ፄግድ፥ “ኑናነ ኑ አሳ ꬋይሳናፐ ስን እስራኤለ ፆሳ ታቦትያ ሀይሳፈ ድግተ፤ እያ እያ በሳ ጉየ ዛርተ” ያግዶሶና። ጎዳ ኩሸይ ካታማ ቦላ ዴፅዳ ግሾ ካታማ ኡባይ ሀይቆ ዳጋማን ኦይከትስ። 12 ሀይቆፐ አትዳ አሳ ክፃ ሀርገይ ኡንኤꬅዳ ግሾ ሄ ካታማ አሳ ዬሆይ ሳሎ ጋክስ።

<- 1 ሳሜላ ማፃፋ 41 ሳሜላ ማፃፋ 6 ->