1 ዚፋ አሳይ ሳኦላኮ ግብአ ብድ፥ “ዳዊቲ ያስሞና ስንꬃን ደእያ ሀክላ ዙማን ቆሰትስ?” ያግዶሶና። 2 ሳኦል፥ እስራኤለታፐ ዶረትዳ ሄꬑ ሙኩሉ አስ ኤክድ፥ ዳዊታ ኮያናዉ ዚፋ መላ ቢታ ብስ። 3 ሳኦል ያስሞና ስንꬃን ደእያ ሀክላ ዙማ ቦላ ደእያ ኦግያ ማታን ዱንካንስ፤ ሽን ዳዊቲ ሄ መላ ቢታን ኡትስ። ሳኦል እያ ካልድ ይዳይሳ ዳዊቲ ኤርዳ ዎደ፥ 4 ዎችያ አስ የድድ፥ ሳኦል ቱማ ሄ በሳ ጋክዳይሳ ሻክድ ኤርስ። 5 ዳዊቲ ደንድድ፥ ሳኦል ዱንካንዳ በሳ ብድ ሳኦልነ ቶራ ሞጮናይ ኔራ ናአይ አበኔር ዝንእዳ በሳ በእስ። ሳኦል ዱንካንዳ ጉታን ኦላንቾት እያ ዩሹዋ ተቅን እ ꬍስክስ።

6 ዳዊቲ ህተ አድያ አብመለከነ ፃሩያ ናኣ እዮኣባ እሻ አብሳያ፥ “ሳኦል ዱንካንዳ በሳ ታራ ባናይ ኦኔ?” ያግድ ኦይችስ።

አብሳይ፥ “ታኒ ኔራ ባና” ያግስ።

7 ሄሳ ግሾ፥ ዳዊቲነ አብሳይ ሄ ቃማ ኦላንቾታኮ ያ ዎደ ሳኦል ባ ሁጰ ሶን ቶራ ኤስድ፥ ዱንካንያ ግዶን ዝንእዳይሳ ደምዶሶና። አበኔርነ ኦላንቾት እያ ዩሹዋን ዝንእዶሶና።

8 አብሳይ፥ “ፆሳይ ነ ሞርክያ ሀች ነ ኩሸን አꬅድ እሚስ፤ ታኒ ቶራን እያ እስ ቶሆ ሳአራ ኦይꬃዳ ጫዳና፤ እያ ዛራ ጫዳናዉ ኮሸና” ያግስ።

9 ሽን ዳዊቲ አብሳያኮ፥ “ኔኒ እያ ዎꬎፓ፤ ጎዳይ ትይዳ ካዋ ቦላ ባ ኩሽያ ደንꬅያ ኦናካ ጎዳይ ሴራና። 10 ደኦ ጎዳይ ኤርያ መላ፥ ፆሳይ እያ ዎꬋና፤ እ ባ ጋላሳን ዎይኮ ኦላን ሀይቃና። 11 ጎዳይ ትይዳ ካዋ ቦላ ታ ኩሽያ ደንꬆናዳ ታና ጎዳይ ተቆ። አነ እያ ሁጰ ሶን ደእያ ቶራነ ሃꬃ ኦይክያ ሚሽያ ኤክድ ቦስ” ያግስ።

12 ዳዊቲ ሳኦላ ሁጰ ሶን ደእያ ቶራነ ሃ ኦይክያ ሚሽያ ኤክን፥ ኤንቲ ብዶሶና። ኤንታ ኦንካ በእቤና ዎይኮ ኦንካ ኤርቤና ዎይኮ ኦንካ ባርክቤና። ጎዳይ ኤንታ ቦላ ዎልቃማ ꬍስኮ የድዳ ግሾ ኡባይ ꬍስኮ ሀይቅ አግዶሶና።

13 ዳዊቲ ሄፍንꬅ ፕንድ፥ ኤንታፈ ሃክድ ሀራ ደረ ቦላ ከይድ ኤቅስ። 14 ዳዊቲ ሳኦላ ኦላንቾታነ ኔራ ናኣ አበኔራ ፄግድ፥ “አበኔራ፥ ታኒ ፄግያ ዎደ ስእኪ?” ያግድ ዋስስ።

አበኔር፥ “ቃላ ꬎቁ ኦꬅ ፄግድ ካዋ ꬍስኮ ድገይ ኦኔ?” ያግስ።

15 ዳዊቲ፥ “ኔኒ ዎዛናማ አስ ግድኪ? እስራኤለ ግዶን ነ መላ አስ ኦኔ? ያትን፥ ካዋ፥ ነ ጎዳ አይስ ናግኪ? እስ አስ ካዋ፥ ነ ጎዳ ዎꬋናዉ ብስ። 16 ነ ኦꬅዳባይ ሎኦ ግደና። ደኦ ጎዳይ ኤርያ መላ፥ ነነ ነ ኦላንቾት ፆሳይ ትይዳ ህንተ ጎዳ ናግቦና ግሾ ህንተ ሀይቃናዉ በሴስ። ካዋ ቶራይነ እያ ሁጰ ሶን ደእያ ሃ ኦይክያ ሚሸይ አዉን ደእያኮ በአ” ያግስ።

17 ዳዊታ ቃላ ግደይሳ ሳኦል ኤርድ፥ “ታ ናአዉ ዳዊታ፥ ሄስ ነ ቃሌ?” ያግስ።

ዳዊትቲ፥ “ኤ፥ ታ ጎዳዉ፥ ካዋዉ፥ ሄስ ታ ቃላ። 18 ታ ጎዳዉ፥ ታና ነ አይልያ ኔኒ አይስ ካላይ? ታኒ አይ ኦꬃድና? ታ ባላይ አይቤ? 19 ታ ጎዳዉ፥ ካዋዉ፥ ኔኒ ነ አይልያ ቃላ ስአና መላ ታ ነና ዎሳይስ። ጎዳይ ነና ታ ቦላ ደንꬅዳባ ግድኮ፥ እ ያርሾ ኤኮ። ሽን አስ ነና ደንꬅዳባ ግድኮ፥ ‘ባዳ ሀራ ፆሳታ ጎይና’ ያግዶሶና። ጎዳ ቢታን ታዉ ደእያ ላታፐ ኤንቲ ታና ጎድዳ ግሾ ኤንቲ ጎዳ ስንꬃን ባደትዳባ ግዶ! 20 ሀእ ጎዳ ስንꬃፈ ሃክድ፥ አላጋ ቢታን ደእያ ኡራ ሱꬃ ጉሶፋ። እስ አስ ኩራቾ ሻንካታናዉ ደረ ቦላ ከየይሳዳ፥ እስራኤለ ካዎይ ካስቶለ ኮያናዉ ከይስ” ያግስ።

21 ሳኦል፥ “ታኒ ነና ቆሀስ። ታ ናአዉ፥ ዳዊታ፥ ሃ ስማ! ሀች ነ ታ ሸምፕዉ ሀይቆፐ አሽዳ ግሾ ታኒ ነና ዛራዳ ገንከ። ቱማ ታኒ ኤያባ ሀናስ፤ ግታ ባላ ባላስ” ያግስ።

22 ዳዊቲ ዛሪድ፥ “ካዋዉ፥ ነ ቶራይ ሀይስሽ፥ ነ አሳፐ እስ አስ ይድ ኤኮ። 23 እስ እስ አሳስ እያ ፅሎተꬃ መላነ እያ አማነተꬃ መላ ጎዳይ ጋተ ቃንፄስ። ሀች ጎዳይ ነና ታ ኩሸን አꬅድ እሚስ፤ ሽን ጎዳይ ትይዳ ካዋ ቦላ ታኒ ታ ኩሽያ ዎꬃናዉ ኮያብከ። 24 ሀች ነ ሸምፑዋ ታ አሽዳይሳዳ ጎዳይ ታና መቶ ኡባፈ አሽድ ቦንቾ” ያግስ።

25 ሳኦል፥ “ታ ናአዉ፥ ዳዊታ፥ ኔኒ አንጀታ። ኔኒ ግታባ ኦꬃና፤ ነዉ እንጀታና” ያግስ። ዳዊቲ ባ ኦግያ ብስ፤ ሳኦልካ ባ ሶ ስምስ።

<- 1 ሳሜላ ማፃፋ 251 ሳሜላ ማፃፋ 27 ->