1 ዳዊታ ዎꬋና መላ ሳኦል ባ ናኣ ዮናታናስነ ባ ኦሳንቾታስ ኦድስ። ሽን ሳኦላ ናአይ ዮናታን ዳዊታ ዳሮ ዶሴስ። 2 ሄሳ ግሾ፥ ዮናታን ዳዊታኮ፥ “ታ አዋይ ሳኦል ነና ዎꬋናዉ ኮይያ ግሾ ዎንቶ ዎንታ ነና ናጋ፤ እስ በሳን ቆሰታዳ ደኣሻ። 3 ታኒ ታ አዋራ ባዳ፥ ኔኒ ቆሰትዳ ጋድያን ኤቃና፤ ታኒ ነባ እያዉ ኦዳዳ፥ እያፐ ስእያባ ነዉ ኦዳና” ያግድ ኪትስ።

4 ዮናታን ዳዊታ ናሽድ፥ ባ አዋ ሳኦላኮ ሀይሳዳ ያግስ፤ “ካዎይ ባ አይልያ ዳዊታ ቆህድ ናጋራ ኦꬆፎ፤ እ ነና ቆህቤና፤ እ ኦꬅዳባይ ነና ዳሮ ጎእስ። 5 እ ፍልስፄመ አድያ ዎꬍዳ ዎደ ባ ሸምፑዋስ ቃትቤና። ጎዳይ እስራኤለ ኡባስ ግታ ፆኖ እሚስ፤ ሄሳ በአዳ ነካ ኡፋይታዳሳ። ያትን፥ ኔኒ ጌሻ አስ ቆሀናዉ አይስ ቆፓይ? ጋሶይ ባይና ዳዊታ ዎꬋናዉ አይስ ኮያይ?” ያግስ።

6 ሳኦል ዮናታን ኦድዳባ ስእድ፥ “ደኦ ፆሲ ኤርያ መላ፥ ታኒ ዳዊታ ዎꬍከ” ያግድ ጫቅስ።

7 ዮናታን ዳዊታ ፄግድ ኤንቲ ኦደትዳባ ኡባ እያዉ ኦድስ። ያትድ ዳዊታ ሳኦላኮ ኤህን ዳዊቲ ካሰይሳዳ ሳኦላራ ደእስ።

8 ፍልስፄመታራ ዛሪድ ሀራ ኦል ደንድስ፤ ዳዊቲ ከይድ ፍልስፄመታራ ኦለትድ፥ ኤንታ ግታ ሾቹ ሾጭን፥ ኤንቲ እያ ስንꬃፈ ባቃትዶሶና።

9 ሄሳፈ ስምን፥ ሳኦል ቶራ ኦይክድ ባ ሶን ኡትዳሽን፥ ኢታ አያን ጎዳፐ ኪተትድ እያ ኦይክስ። ያትን፥ ዳዊቲ ዲꬅ ዲፅሽን፥ 10 ሳኦል ዳዊታ ጎዳራ ጋꬅድ ስካናዉ ቶራ ፆንግስ፤ ሽን ዳዊቲ እያፐ ደሽ ግድ አትን፥ ቶራይ ጎዳን ቶከትስ። ሄ ቃማ ዳዊቲ ከስ ኤክድ ባቃትስ።

11 ዳዊታ ኬꬃን ናግድ ዎንታ ዎꬋና መላ ሳኦል አሰ ኪትስ።

ዳዊታ ማችያ መልኮላ፥ “ሀች ቃማ ኔኒ ነ ሸምፑዋ አሾና እፅኮ፥ ዎንቶ ሀይቃሳ” ያጋዳ ዳዊታስ ኦዳሱ። 12 ምልኮላ ዳዊታ ማስኮተራ ከስን፥ ዳዊቲ ከስ ኤክድ ባቃትስ። 13 ሄሳፈ ጉየ መልኮላ ኤቃ ምስለ ኤካዳ አርሳን ዝንእሳሱ፤ ሁጰሶን ዴሻ እክሰ ዎꬃዳ አፍላ ማይዛሱ።

14 ዳዊታ ኦይክድ ኤሀና መላ ሳኦል አሰ ኪትን ምልኮላ፥ “ዳዊቲ ሳከትስ” ያጋሱ።

15 ዳዊታ በአና መላ ሳኦል ሄ አሳታ ጉየ ኪትድ፥ “ታኒ ዳዊታ ዎꬋና መላ እያ አልጋራ ቶክድ ኤክ ዪተ” ያግስ። 16 ሽን አሳት ሶ ገልያ ዎደ ኤቃ ምስለይ አርሳን ዝንእዳይሳነ እያ ሁጰሶን ዴሻ እክሰይ ደኤይሳ ደምዶሶና።

17 ሳኦል መልኮሎ፥ “ኔኒ አይስ ሀይሳዳ ኦꬃዳ ታና ጭማዲ? ታ ሞርከይ ከስ ኤካና መላ አይስ ኦꬃዲ?” ያግስ።

ምልኮላ ዛራዳ፥ “እ ታኮ፥ ‘ታና ከሳዳ የዳ፤ እፅኮ ታ ነና ዎꬋና’ ያግስ” ያጋሱ።

18 ዳዊቲ ከስ ኤክድ ራማን ደእያ ሳሜላኮ ብድ ሳኦል ባና ኦꬅዳ ኡባ እያዉ ኦድስ። ዳዊትነ ሳሜል ናዮታ ብድ ያን ኡትዶሶና። 19 ሳኦል ዳዊቲ ራማን ደእያ ናዮታን ደኤይሳ ስእስ። 20 ዳዊታ ኦይክድ ኤሀና መላ አሰ ያ ኪትስ። ሽን ናበ ጩጋይ ሳሜላ ካለꬁዋን ትንብተ ኦድሽን በእዳ ዎደ ሳኦል የድዳ አሳታ ቦላ ፆሳ አያናይ ዎꬍን፥ ኤንትካ ትንብተ ኦድዶሶና። 21 ሳኦል ሄሳ ስእዳ ዎደ ሀራ አስ የድስ፤ ኤንትካ ቃስ ትንብተ ኦድዶሶና። ሳኦል ሄꬓንꬆ አሰ የድን ኤንትካ ትንብተ ኦድዶሶና። 22 ዉርሰꬃን፥ ሳኦል ባ ሁጰን ራማ ብድ፥ ሴኩን ደእያ ግታ ኦላ ጋክድ፥ “ሳሜልነ ዳዊቲ አዉን ደኦና?” ያግድ ኦይችስ።

ኤንቲ፥ “ህንን ራማን ደእያ ናዮታን ደኦሶና” ያግድ ዛርዶሶና።

23 ሄሳ ግሾ፥ ሳኦል ራማን ደእያ ናዮታ ብስ፤ ቃስ ፆሳ አያናይ እያ ቦላካ ዎꬍን፥ ራማን ደእያ ናዮታ ጋካናዉ ትንብተ ኦድሸ ብስ። 24 እ ባ ማኡዋ ቃርድ፥ ሳሜላ ስንꬃን ትንብተ ኦድስ፤ ጋላስነ ቃማ ኩመꬅ ካሎ ዝንእስ። አሳይ፥ “ሳኦልካ ናበታፐ እሱዋ ግድደየ” ገይስ ሄሳሳ።

<- 1 ሳሜላ ማፃፋ 181 ሳሜላ ማፃፋ 20 ->