1 እስ አጌናፐ ጉየ፥ [a] አሞነ ካዎይ ናኦስ ደንድድ፥ ጋላዳን ደእያ ያበሳ ካታማ ተቅስ። ያበሳ አሳይ፥ “ኔኒ ኑራ ጫቃ፤ ኑኒ ነዉ ሃረታና” ያግዶሶና።

2 ናኦስ፥ “ታኒ ህንተራ ጫቃናይ ህንተ ኡሻቻ አይፍያ ዎጫ ከሳዳ እስራኤለ ካዉሽዳፐ ጉየና” ያግስ።

3 ያበሳ ጭማት ናኦሳኮ፥ “እስራኤለ ቢታ ኡባ ኑኒ ኪታ የዳና መላ ላፑን ጋላስ ታካ፤ ኑና አሽያ አስ ꬋይኮ ኑኒ ነዉ ኩሸ እማና” ያግዶሶና።

4 ኪተትዳ አሳይ ሳኦል ደእያ በሳ ግብአ ጋክድ ሀ ኦዳ አሳስ ኦድዶሶና፤ አሳ ኡባይ ባንታ ቃላ ꬎቁ ኦꬅድ ዬክዶሶና። 5 ሄ ዎደ ሳኦል ባ ቦራታ ላግድ ጎሻፈ ይሸ፥ “አሳይ ዋንዴ? አይስ ዬኮና?” ያግድ ኦይችስ። ኤንቲ ያበሳ አሳይ ግዳባ እያዉ ኦድዶሶና።

6 ሀ ቃላ ሳኦል ስእዳ ዎደ ፆሳ አያናይ እያ ቦላ ዎልቃን ዎꬍስ፤ ሳኦል ሸነ ኤፅስ። 7 ሳኦል ዋፃ ቦራታ ሙፀረꬅድ፥ “ሳኦላነ ሳሜላ ካልድ፥ ከዮና አሳ ቦራት ሀይሳዳ ሙፀታና” ያግድ ኪተትዳ አሳታ ቦላ እስራኤለ ቢታ ኡባ የድስ።

ሄ ዎደ አሳ ኡባይ ጎዳስ ያይዶሶና፤ ኤንቲ እስ አሳዳ ሀንድ ከይዶሶና። 8 ሳኦል ቤዘቃን ኤንታ ሺሽድ ታይብዳ ዎደ እስራኤለ አሳይ ሄꬑ ፄቱ ሙኩሉ፤ ይሁዳ አሳይ ሀስታሙ ሙኩሉ ግድስ። 9 ኪተትዳ አሳይ፥ “ብድ ያበሳ ጋላዳ አሳስ፥ ‘ዎንቶ ፃልቀይ ምችያ ዎደ ኑኒ ህንተና አሻና ያግድ ኦድተ’ ” ያግዶሶና። ኪተትዳ አሳይ ብድ፥ ያበሳ አሳስ ሄሳ ኦድን፥ ኤንቲ ዳሮ ኡፋይትዶሶና።

10 ያበሳ አሳይ አሞነታኮ፥ “ኑኒ ዎንቶ ህንተዉ ኩሸ እማና፤ ህንተ ኑ ቦላ ዶስዳባ ኦꬅተ” ያግዶሶና።

11 ዎንተꬃ ጋላስ ሳኦል ባ አሳ ሄꬑ ጩጋን ሻክስ። ኤንቲ ሳእ ዎንትያ ዎደ አሞነ አሳይ ዱንካንዳ ጉታ ገልድ፥ ፃልቀይ ምቻና ጋካናዉ አሞነታ ጎይርዶሶና። ጎይረተꬃፈ አትዳይሳት ናምኡ አስ እስፈ ዶናዳ ባዉ ባዉ ባቃቲስ።

12 እስራኤለ አሳይ ሳሜላኮ፥ “ሳኦል ኑ ቦላ ካዎታነ ያግዳ አሳት ኦናንቴ? ኤንቲ ኦነኮ ከስተ፤ ኑ ኤንታ ዎꬋና” ያግስ።

13 ሽን ሳኦል፥ “ሀች ጎዳይ እስራኤለ አሽዳ ግሾ እስ አስካ ሀይቀና” ያግድ ዛርስ።

14 ሳሜል፥ “ሃይተ፤ ጋልጋላ ብድ፥ ያን ሳኦል ካዎ ግደይሳ ዛሪድ ኤርሶስ” ያግስ። 15 ሄሳ ግሾ፥ አሳ ኡባይ ጋልጋላ ብድ፥ ጎዳ ስንꬃን ሳኦል ካዎ ግደይሳ ኤርስዶሶና። ያን እስፈተꬃ ያርሾ ጎዳ ስንꬃን ያርሽዶሶና። ሳኦልነ እስራኤለ አሳ ኡባይ ሄ በሳን ባኣለ ኡፋይሳን ቦንችዶሶና።

<- 1 ሳሜላ ማፃፋ 101 ሳሜላ ማፃፋ 12 ->