1 ህዛ፥ ዎሳ ኬꬃ ጭማታራ ጭማ ግድዳይስ፥ ክርስቶሳ ዋይያ ማርካተይስነ ቆንጫናዉ ደእያ ቦንቹዋ ሻከታናዉ ደእያ ታኒ፥ ህንተ ግዶን ደእያ ጭማታ ዞራይስ። 2 ህንተ አዋተꬃፈ ጋርሳን ደእያ ፆሳ ዉድያ ሄምተ። ፆሳይ ኮየይሳዳ ዶሳናፐ አትሽን፥ ኡንኤትድ ሄሞፍተ። ቃስ ሚሸ ኮሻን ግዶናሽን፥ ሀጋዛናዉ ደእያ ሎኦ ቆፋን ሄምተ። [a] 3 ህንተ አዋተꬃፈ ጋርሳን ደእያ ዉድያስ ሌምሶ ግድተፐ አትሽን፥ ጎዳቶፕተ። 4 ሄመይሳታ ሀላቃይ ቆንጭያ ዎደ ቆለቶና ቦንቾ ካላቻ ህንተ ኤካና።

5 ሄሳዳካ፥ ያላጋቶ፥ ጭማታስ ሃረትተ። ህንተ እሶይ እሱዋስ አሽከ ግድተ። ጌሻ ማፃፋን፥ “ፆሳይ ኦቶራንቾታ እፄስ፥ ሽን አሽከታስ አꬎ ኬሀተꬃ እሜስ” ያጌስ። [b] 6 ፆሳይ ባ ዎደ ህንተና ቦንቻና መላ ዎልቃማ ፆሳ ኩሽያፐ ጋርሳን ህንተና ካዉሽተ። [c] 7 እ ህንተዉ ቆፕያ ግሾ ህንተና ህርግስያ ኡባ እያ ቦላ የግተ።

8 ህንተ ሞርከይ ፃላሄይ፥ ምትያባ ኮይድ፥ ጋሞዳ ጉድሸ ህንተ ማታራ ዩይያ ግሾ ህንተና ሃርተነ ባርክተ። 9 አላመን ደእያ ህንተ እሻት ሄሳዳ ዋየ ኤከይሳ ኤርድ፥ አማኖን ምንድ፥ ፃላህያራ ኤቀትተ። 10 ባ መርና ቦንቹዋስ ክርስቶስ የሱሳ ባጋራ ህንተና ፄግዳ አꬎ ኬሀተꬃ ኡባ ፆሳይ፥ ጉꬃ ዎደስ ህንተ ዋየትዳፐ ጉየ፥ እ ባ ሁጰን ህንተና ሺሻና፥ ካትሳና፥ ምንꬅድ ኤሳና፥ ፃልሳና። 11 መርናፐ መርና ጋካናዉ ፆሳይ ካዎቶ። አምንእ።

12 አማነትዳ እሻ ጋዳ ታ ኤክያ ስላሰ ባጋራ ሀ ዳብዳብያ ህንተዉ ቃንꬃን ፃፋስ። ታ ሄሳ ህንተዉ ፃፍዳይ፥ ህንተና ዞራናዉነ ፆሳ አꬎ ኬሀተꬃይ ቱማ ግደይሳ ማርካታናሳ። ሄ አꬎ ኬሀተꬃን ምንድ ኤቅተ። [d]

13 ህንተራ እስፈ ዶረትዳ ባብሎነን [e] ደእያ ዎሳ ኬꬃ አሳይነ ታ ናኣ ማርቆስ ህንተና፥ “ሳሮ ሳሮ” ያጌስ። [f] 14 ሲቆ ዬረተꬃ ዬረትሸ፥ እሶይ እሱዋ ሳሮꬅተ።

ክርስቶሳን ደእያ ህንተ ኡባስ ሳሮይ ግዶ። አምንእ።

<- 1 ጰፅሮሳ ኪታ 4