13 ህንተ ሎኦባ ኦꬃናዉ አሞትኮ ህንተና ቆሀናይ ኦኔ? 14 ሀር አቶሽን፥ ፅሎተꬃ ግሾ ህንተ ዋየትኮ አንጀትዳይሳታ። አሳስ ያዮፍተነ ህርጎፍተ። [f] 15 ክርስቶሳ ህንተ ዎዛናን ቦንችተነ ጎዳይተ። ፆሳይ ህንተዉ እምዳ ኡፋይሳስ ጋሶ ኦይችያ ኦደስካ ዛሮ እማናዉ ኡባ ዎደ ጊግድ ኡትተ፥ ሽን ሄሳ አሽከተꬃንነ ያሻን ኦꬅተ። 16 ቃስ ክርስቶሳን ህንተ ደእያ ሎኦ ደኡዋ ኢታባ ኦꬅዳባዳ፥ ህንተና ጫይያ አሳይ ዝግርያባን ዬላታና መላ ህንተ ካሀይ ጌሽ ግዶ። 17 ፆሳይ ግዳባ ግድኮ ኢታባ ኦꬅዳ ግሾ ዋየ ኤከይሳፈ ሎኦባ ኦꬅዳ ግሾ ዋየ ኤከይስ ሎኦ። 18 ክርስቶስ ኑና ፆሳኮ ሺሻናዉ ባዉ ፅሎ ግድድ ደእሸ፥ ናጋራንቾታ ግሾ እስ ቶሆ ናጋራ ኡባስ ሀይቅስ፤ እ ባ አሳተꬃን ሀይቅስ፥ ሽን አያናን ፓፅስ። 19 ቃስ ሄ አያናን እ ብድ ቃሾን ደእያ ሸምፖታስ ቃላ ኦድስ። 20 ኖሄይ ማርካብያ ኬፅያ ዎደ ሄ ሸምፖት ፆሳስ ኪተቶና እፅዶሶና፥ ሽን ፆሳይ ኤንታና ዳንዳእ ጋምእስ። ሆስፑን አሳ ፃላል ማርካብያን ገልድ፥ ꬋዮ ሃꬃፈ አትዶሶና። [g] 21 ሄ ꬋዮ ሃꬃይ ሀእ ህንተና አሽያ ፅንቃተ ሌምሶ ግድስ። ሀ ፅንቃተይ ቦላ ቅታ ሜጮ ግዶናሽን፥ ሎኦ ካሀ ፆሳፈ ኤካናዉ እያ ዎስያ ኦገ ግድድ፥ ክርስቶሳ ደንዱዋ ባጋራ ህንተና አሼስ። 22 እ ሳሎ ብድ ፆሳ ኡሻቻን ኡትድ፥ ኪታንቾታ፥ ማታ አዋታነ ዎልቃማታ ሃሬስ።