1 ካዎይ ሶሎሞነይ እስራኤለ ቢታ ኡባ ቦላ ካዎትስ። 2 እ ሹምዳ አሳይ ሀይሳፈ ካልድ ፃፈትዳይሳታ፤ ሳዶቃ ናአይ አዛርያስ ካህነ፤ 3 ሺሻ ናይት ኤልሆረፍነ አክይ ዋና ፃፈታ፤ አህሉዳ ናአይ እዮሳፈፅ ታርከ ፃፈ፤ 4 ዮዳሄ ናአይ ባናይ ቶራ ሞጮና፤ ሳዶቅነ አብያታር ካህነታ። 5 ናታና ናአይ አዛርያስ ደርያ አይሰይሳታ ሀላቃ፤ ናታና ናአይ ካህነይ፥ ዛቡድ ካዋ ዞረይሳ፤ 6 አህሳር ካዎ ጋꬎ ሀላቃ፤ አብዳ ናአይ አዶንራም ማዳ ኦይሳታ ሀላቃ።

7 ቃስ ሶሎሞነስ እስራኤለ ቢታን ታማነ ናምኡ ደረ አይስያ ሀላቃት ደኦሶና፤ ኤንቲ ካዋስነ ካዋ ሶን ደእያ አሳ ኡባስ ምያ ካꬃ ኤሄይሳታ። ኤንታፈ እሶይ እሶይ ላይꬃ ግዶን እስ እስ አጌና ካꬅ ኤሄስ። 8 ኤንታ ሱንꬃይ ሀይሳፈ ካልድ ፃፈትስ።

በንሁር ደረይ ዳርያ ኤፍሬማ ቢታ አይሰይሳ። 9 ባንፀቃር ማቃፃ፥ ሻአልብማ፥ ቤት-ሳሜሳነ ኤሎን-ቤት-ሀና ካታማታ አይሰይሳታ። 10 በንሄሰድ አሩቦታ ቢታ አይሰይሳ፤ ሶኮ ቢታይነ ሄፌራ ቢታይ ኡባይ እያባ። 11 በን-አምናዳብ፥ በናፎታ ዶራ ቢታ አይሰይሳ፤ እ ሶሎሞነ ናእዉ ፃፋቶ ኤክስ። 12 አህሉዳ ናአይ ባአና፥ ታናካነ ማግዶ ካታማታ፥ እዝራኤለፐ ጋርሳን ፃርታና ማታን ደእያ ቤት-ሳና ቢታ ኡባ፥ ቤት-ሳናፐ ብድ አቤል-ማሆላራ ካንꬅድ፥ ዮቅማኣማ ፕንꬅ ጋካናዉ ደእያ ካታማታ አይሴስ። 13 በንግቤር ጋላዳን ራሞታ ካታማ፥ ጋላዳን ምናሰ ናኣ ያእራ ካታማታ፥ ባሳነን አርጎባ ቢታነ ዩሾን ግምበይነ ግምበ ፐንገታስ ናሰ ብራታ ልዮት ደእያ ኡሱፑን ታሙ ካታማታ አይሴስ። 14 እዶ ናአይ አህናዳብ ማሀናይማ ቢታ አይሴስ። 15 አክማስ ንፍታለመ ቢታ አይሴስ፤ እ ሶሎሞነ ናእዉ ባስማቶ ኤክስ። 16 ኩሳ ናአይ ባኣን አሴራ ቢታነ ባሎታ ካታማ አይሴስ። 17 ፓሩሀ ናአይ እዮሳፈፅ ይሳኮራ ቢታ አይሴስ። 18 ኤላ ናአይ ሳም ብንያመ ቢታ አይሴስ። 19 ኡረ ናአይ ጋቤር፥ ጋላዳ ቢታን አሞረ ካዎይ ስሆንነ ባሳነ ካዎይ ኦገይ ካዎትዳ ቢታ አይሴስ፤ ሄ ቢታታ አይሰይ እያ ፃላላ።

20 ይሁዳ አሳይነ እስራኤለ አሳይ አባ ጋፃን ደእያ ሻፈዳ ዳርዶሶና፤ ኤንቲ ምሸነ ኡይሸ ኡፋይትድ ደእዶሶና። 21 ሶሎሞነይ ኤፍራፂሳ ሻፋፐ ዶምድ ፍልስፄመ ቢታ ጋካናዉ፥ ያፐ ካንꬅድ ግብፀ ዛዋ ጋካናዉ ደእያ ካዎተꬃታ ኡባ ሃርስ። ሄ ቢታ አሳት እያዉ ጊራ ጊርዶሶና፤ እያ ደኦ ላይꬃ ኡባን እያዉ ሃረትዶሶና።

22 ሶሎሞነስ ጋላስ ጋላስ ሺቅያ ካꬅ፤ እሻታሙ ኩንታለ ሎኦ ꬊለ፥ ፄቱ ኩንታለ ጮ ꬊለ፥ 23 ꬊከትዳ ታሙ ሳንጋታ፥ የዳን ምዳ ላታሙ መሄነ ፄቱ ዶርሳታ፤ ቃስ ጮፎሾታ፥ ጋራታ፥ ገንኤታነ ኦርደ ኩቶታ ኮሼስ።

24 ሶሎሞነይ ኤፍራፂሳ ሻፋፐ ዶሎሀ ባጋራ ደእያ ካዎተꬃታ ኡባ ትፍሳ ካታማፐ ዶምድ ጋዛ ካታማ ጋካናዉ ሃርስ፤ ባ ዩሹዋን ደእያ ቢታ ኡባራ ሳሮ ደእስ። 25 እያ ደኦ ላይꬃ ኡባን ይሁዳ አሳይነ እስራኤለ አሳይ ዳነፐ በርሳበ ጋካናዉ፥ ኡባይ ባ ዎይነ ጋርሳንነ ባላሰ ጋርሳን ሳሮ ደእዶሶና።

26 ሶሎሞነስ ኦላ ፓራ ጋረታ ጎችያ ኦይታሙ ሙኩሉ ጋፃታ ፓራትነ ታማነ ናምኡ ሙኩሉ ፓራ አሳት ደኦሶና። 27 ሄ ደርያ አይሰይሳት አጌናን አጌናን ካዎይ ሶሎሞነይነ እያ ግብራ ማናዉ ይዳ አሳ ኡባይ ምያባ ሺሾሶና። ኤንቲ እያፐ አይባካ ፓጭሶኮና። 28 ኤንቲ ጋረ ፓራትነ ሀንኮ ፓራት ማናዉ ባንጋነ ፔን ኤንታ ጋክዳ ዳላ ኤህድ እያ ምንጃ ኬꬃን ዎꬅዶሶና።

29 ፆሳይ ሶሎሞነስ ጭንጫተꬅ፥ አኬካነ ዳልጋ ዎዛና እሚስ። 30 ሶሎሞነ ጭንጫተꬃይ ዶሎሀ ባጋራ ደእያ አሳ ጭንጫተꬃፈነ ግብፀታ ጭንጫተꬃፈ አꬌስ። 31 እ አሳ ኡባፈ አꬍያ ጭንጫ፤ እያ ጭንጫተꬃይ፥ ኤዝራሄ አድያ ኤታናፐ፥ ማሆላ ናይታ ሄማናፐ፥ ካልኮላፐነ ዳርዳአፐ አꬌስ። እያ ሱንꬃይ ዩሹዋን ደእያ ካዎተꬃታ ኡባ ጋክስ። 32 እ ሄꬑ ሙኩሉ ሌምሶታ ኦድስ፤ እያ ማዝሙረት እስ ሙኩሉነ እቻሻ። 33 ሶሎሞነይ ልባኖሰ ዝጋፐ ዶምድ፥ ግምበ ኬꬃ ቦላ ዶልያ ህሶጰ ምꬃ ጋካናዉ ሌምስድ ኦድስ። ሄሳዳካ፥ መሄታባ፥ ዶአታባ፥ ካፎታባ፥ ሳአራ ጎሸትያ መተꬃታባ ሞሎታባ ታማርስስ። 34 እያ ጭንጫተꬃ ስእዳ ሳአን ደእያ ካዎት ኡባይ ኪትን፥ ካዎተꬃ ኡባፈ አሳይ ሶሎሞነ ጭንጫተꬃ ስአናዉ ዮሶና።

<- 1 ካዎታ ማፃፋ 31 ካዎታ ማፃፋ 5 ->